Hello，大家好，我哋係由韓國人每日提供最新韓國旅行資訊嘅Creatrip。
想食高質傳統韓國菜，但係又唔想食最common個幾款？小編之前去咗一間專賣韓國傳統牛肉料理嘅江南餐廳「Wusm」，「Wusm」發音同韓文嘅笑容（웃음）一樣，寓意希望每位客人食完都可以面帶笑容，開心過每一日。呢度菜式夠特別之餘味道真係唔錯，跟住小編一齊去睇吓啦！
撳我睇Menu&預約詳情👇🏻
江南「Wusm」基本資訊
- 地址：서울 강남구 강남대로122길 15
- 營業時間：00:00-24:00
- 語言：韓文、英文
江南「Wusm」實地探訪
今日小編嚟到位於江南新論峴站附近嘅「Wusm」，現代建築中間突然出現一間傳統韓屋style裝修嘅餐廳，真係好搶眼！而餐廳內部都係融合現代同韓屋裝修風格，特別得嚟夠簡單利落！
廚房最入面有兩個超大嘅煲，廚師話呢度每日都會煲超大煲湯同用特製湯底烚肉，大家可以見到煲湯已經熬到奶白色，望落都覺得會好濃郁！
「Wusm」有個好方便嘅地方係可以直接用手機點餐，只要打開手機NPC功能，然後將手機放喺呢張貼紙上面，就可以直接連到點餐頁面！
叫完嘢食職員就會幫大家上小菜，小餐方面有韓國菜最基本嘅泡菜、辣蘿蔔泡菜同小編都係第一次見嘅辣拌牛皮，煙煙韌韌好得意！
烤韓牛肉火鍋
銅鍋中間係韓牛牛肉，而側邊就有各種菇類、蔬菜同韓式粉絲，牛肉熟咗之後就可以連埋側邊用特製清湯煮嘅菜一齊食，鹹鹹甜甜嘅韓式烤牛肉調味加上暖笠笠嘅火鍋，味道熟悉得嚟又好特別！
白切肉雙拼(中)
嚟「Wusm」就一定要食呢個白切肉雙拼，入面一半係牛膝軟骨，一半係多種部位嘅牛肉，每款口感同味道都唔同！
牛膝軟骨
牛腩
牛舌
牛膝軟骨煮到夠軟糯，而且營養豐富卡路里低，食多啲都唔會咁有罪惡感；而牛腩同牛舌都煮到好入味同夠腍，推薦大家可以配埋韭菜同金針菇一齊食。
牛𦟌
牛臉頰肉
牛鼻肉
牛𦟌口感特別，而牛臉頰肉比想像中有咬口（不過唔係韌）！而最後牛鼻肉小編都係第一次食，口感煙韌、肉香味濃，可以一次過食到咁多個特別部位嘅肉真係好正！
香脆芝士薯仔絲煎餅
配菜方面，小編叫多咗個薯仔絲煎餅，每一啖都勁脆，好似食緊薯條咁XD 大家可以點茄汁或者蜂蜜食，兩款醬汁都好夾！
食完飯就梗係要食個甜品啦！小編叫咗一杯飯焦雪糕，脆卜卜嘅飯焦原來同雲呢拿雪糕好搭，為呢餐畫上一個完美句號！
如果大家鍾意食牛肉，又想試特色韓國菜，推薦大家有機會可以嚟江南「Wusm」！
江南「Wusm」前往方法
新論峴站（신논현역）3號出口出。
向出口反方向行。
直行。
過斑馬線，繼續直行。
直行。
過斑馬線。
直行。
轉右行入小路。
直行。
一直向前行就會見到餐廳喺你左邊。
咁就去到江南「Wusm」啦！
撳我預約👇🏻
以上係江南「Wusm」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Mail：help@creatrip.com
