韓國無人駕駛巴士&的士面世
而家連巴士的士都唔再需要司機？韓國無人駕駛時代正式開啟！
- 全球首架深夜無人駕駛巴士
- 原來之前就已經有無人駕駛小巴？
- 8月起無人駕駛的士上路
Hello，大家好，我哋係由韓國人每日提供最新韓國旅行資訊嘅Creatrip。
科技日新月異，AI同無人技術真係發展得比想像中快好多，呢幾年喺世界各地都逐漸出現無人駕駛交通工具，而韓國都冇執輸，推出咗無人駕駛巴士同的士，就連最繁忙嘅江南都有？！到底可以喺邊度搭，又危唔危險？
想直接睇最想睇嘅部份？
打開目錄就可以跳去！
韓國無人駕駛車輛面世
全球首架深夜無人駕駛巴士
연합뉴스
有睇開我哋Instagram（未follow嘅撳我）嘅朋友們應該都知道，其實早喺上年12月，韓國已經推出咗全球第一架深夜無人駕駛巴士「深夜A21」，當時逢星期一至五嘅23:30至05:10有2架大型電動巴士提供來回合井同東大門嘅服務，路線經過好多遊客都會去嘅地方。
위즈경제
經過4~5個月嘅試行測試，總共有8,424位乘客搭過呢架無人駕駛巴士，亦都冇發生過任何意外！有見及此，韓國政府宣佈「深夜A21」將會喺7月正式投入服務，雖然車費價錢未定，不過應該會平過普通深夜巴士。
동아일보
另外亦計劃由10月開始加開清晨班次，預計頭班車會喺03:30開出，來回道峰山站、鐘路、麻浦站、汝矣島站、永登浦站等地，方便一班清潔工、看更等等需要一大早返工嘅市民，預計去到2026年會有超過100架無人駕駛巴士投入服務！
서울시
講少少背景知識俾大家聽啦XD 唔似得香港巴士會周圍穿插，因為韓國巴士有專用車線，大部分時間都會跟住同一條車線行，所以喺操控同設定上會比較簡單同方便，令發展無人駕駛巴士過程變得更加順暢。
原來之前就已經有無人駕駛小巴？
서울시
唔知大家又知唔知，其實喺清溪川同青瓦臺附近一直都有無人駕駛小巴提供緊來回交通服務！清溪川無人駕駛小巴喺2022年11月開始投入服務，來回清溪廣場同世運電子商街，上年路綫更加擴展到廣藏市場。不過因為需要download專用app預約先搭得，對外國遊客嚟講冇咁friendly。
서울시
而相對上青瓦臺嘅無人駕駛小巴——「青瓦臺A01」就比較容易搭到！只要年滿6歲，所有人都可以搭呢架小巴，只需要上落車拍卡就得（只係for記錄，唔會收錢）。「青瓦臺A01」由景福宮地鐵站4號出口開始，沿經國立古宮博物館、青瓦臺、春秋門同國立民俗博物館，總共有5個站可以上落車！
8月起無人駕駛的士上路
KBS뉴스
而喺2024年8月，韓國將會成為繼美國同中國之後，全球第三個引進無人駕駛的士技術嘅國家！
대한민국 정책브리핑
由8月尾開始，韓國政府將會喺首爾江南一帶進行為期6個月至1年嘅無人駕駛的士測試（測試期間車費全免），呢段期間將會有3架的士運行，如果冇咩大問題，就會正式投入服務！
江南係首爾最繁忙、最多人多車嘅地區，所以之前都好少會喺呢度進行無人駕駛交通工具嘅測試。今次韓國政府決定直接喺江南試行都幾令人驚訝，不過時間就會係比較少車嘅夜晚10點到凌晨4點。
SBS뉴스
無人駕駛的士同巴士最唔同嘅地方係，巴士會跟住同一條路線不斷重覆行，但係的士變數就比較多，乘客可以自由選擇上落車地點！不過大家唔需要擔心，首先車速最高只會去到50km/h，其次一開頭測試嘅時候唔會係完全無人，車上面會有一個職員負責管理成個過程，有咩突發事故都可以即時解決。
경향신문
另外由10月開始，首爾上岩洞亦都會出現無人駕駛私家車，除咗返放工peak hour，呢架私家車會沿住世界盃路同加陽大路循環行駛，方便附近市民出行。
KPI뉴스
唔少網友都表示覺得神奇，而且覺得咁可以減少醉酒駕駛導致嘅車禍，就算出現罷工問題都唔洗怕無車搭。不過另一方面就有人覺得時機尚早，而且如果之後無人駕駛公共交通工具普及化，失業率就會大大提升。大家又點睇？
想暢通無阻玩轉首爾？
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com