韓國7月天氣&穿搭小貼士

韓國7月會有幾熱？暴雨警告、酷熱天氣警告齊齊出現？一次過幫你整理好首爾/釜山7月天氣！

Jeongyeong Yeo

5 months ago

SquareListIcon目錄

Hello，大家好，我哋係由韓國人每日提供最新韓國旅行資訊嘅Creatrip。

嚟到7月，終於去到學生們期待已久嘅暑假+畢業旅行旺季啦！相信唔少朋友都plan住呢幾個月嚟韓國玩，到底夏天飛韓國旅行有咩要注意，會有幾熱/落幾多雨，又應該要帶咩衫好？

韓國各月份天氣&穿搭小貼士💡

韓國7月天氣&穿搭小貼士

韓國天氣韓國7月天氣韓國夏天韓國夏天天氣首爾天氣首爾7月天氣首爾夏天天氣釜山天氣釜山7月天氣釜山夏天天氣韓國梅雨首爾梅雨釜山梅雨韓國夏天穿搭韓國7月穿搭

韓國7月天氣只可以用一個字形容：「熱」！基本上嚟到7月，無論係去韓國邊個城市好，都係一樣咁熱，特別係中午/下晝真係會熱到溶... 加上7月係韓國梅雨季，所以經常都會落雨，亦都有報導話今年會降雨量更加高，所以記住一定要隨身帶把遮，無論係遮太陽定係擋雨都用得著。

韓國有個term叫做「三伏」，係一年當中氣溫最高、最潮濕同最焗嘅時候。「三伏」又分為「初伏」、「中伏」同「末伏」，今年嘅「初伏」係7月15號，「中伏」係7月25號，而「末伏」就會係8月14號。

韓國人認為三伏太悶熱，會令身體能量流失得更加快，所以有個傳統係大家都會喺「初伏」、「中伏」同「末伏」食參雞湯補身。如果大家呢段時間會喺韓國旅行，最緊要注意補充足夠水份同小心中暑，其次亦都可以學韓國人咁食參雞湯補充能量！

2023年7月首爾溫度（weatherspark）

首爾7月最高氣溫會上到36度，但係如果計體感溫度嘅話隨時會高達40度，所以記住一定要注意防曬同飲夠水，千祈唔好玩到中暑啊！

而以時間嚟睇嘅話，每日最熱嘅時候會係09:00~18:00，而早晚就會相對冇咁熱。對韓國上班族（aka小編）嚟講，因為最熱嘅時間咁啱係返工時間，所以匿喺office就得XD 不過如果大家係嚟旅行，無論係避雨定避太陽都好，，記住安排多幾個室內行程啦！

2023年7月釜山溫度（weatherspark）

釜山7月天氣都幾熱，不過因為7月頭係釜山梅雨季，所以整體溫度比起首爾會冇咁熱。

但係過咗雨季之後，由7月中開始炎熱天氣每日都會維持一段長時間，甚至去到夜晚9點都仍然會好似日頭咁熱。

무신사

7月穿搭方面以輕便、透氣為主，如果怕曬黑可以帶防曬用嘅外套，或者其實帶把遮+搽防曬都夠。

무신사

另外因為有可能會突然落大雨，所以建議大家可以著涼鞋出門口，唔會up住唔舒服之餘整體傳達睇落會比較襯夏天同更加清涼（不過記住腳都要搽防曬，如果唔係可能會曬到有涼鞋印XD）

今年梅雨季已經喺6月19號喺濟州一帶開始咗，6月尾開始會逐漸由南邊擴散到北邊。另外韓國天文台亦都表示，預計今年梅雨會有80%機會嚴重過上年，好有可能會突然落大雨！所以呢段時間準備嚟韓國玩嘅話，建議減少去海邊同溪谷附近，以免發生危險。

首爾2023年7月下雨分佈（weatherspark）

釜山2023年7月下雨分佈（weatherspark）

上面兩張圖嘅綠色部份代表嗰個時段落緊雨，而橙色部份就係落雷暴雨，顏色越深就等於雨越大。相比首爾，釜山喺7月頭到7月中會落更加多雨，而且一落就落好耐/幾日。而首爾7月都間中會落幾日大雨，所以plan行程嘅時候記住要安排埋plan B，廢事因為落雨而玩得唔夠盡興！

首爾喺2024年6月19號發出今年第一個酷熱天氣警告，比起上年早咗成1個禮拜！酷熱天氣警告發出嘅時候最高體感溫度會維持喺35度以上，而且預計會維持2日以上。大家手機亦都會收到警報，所以就算手機突然響都唔需要太擔心，但係一定要記住唔好安排咁多戶外活動，小心中暑！

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Mail：help@creatrip.com