首爾美食 | Gop(江南店/麻浦直營店/文來總店)
韓國人最愛烤腸餐廳之一!連美食家都大讚!
Hello,大家好,我哋係由韓國人每日提供最新韓國旅行資訊嘅Creatrip。
唔知大家嚟韓國玩嘅時候有冇食過烤腸呢?其實對香港人嚟講動物內臟唔陌生,不過好少會燒嚟食,好多人都一試愛上!如果大家都想挑戰吓,不如去小編今日準備介紹俾大家嘅「Gop」,食返餐高質烤腸啦!
首爾「Gop」分店資訊
Gop 江南店
- 地址:서울 강남구 역삼로3길 12
- 營業時間:星期一至六 16:00 - 24:00、星期日 14:00 - 23:00
- 可預約時間:星期一至三 16:00 - 18:30(預約時段以1小時為單位)
- 語言:韓文、英文、日文
Gop 麻浦直營店
- 地址:서울 마포구 도화길 31-1
- 營業時間:星期一至六 16:00-23:30、星期日 15:00-23:00
- 可預約時間:星期一至四 16:00 - 22:00
- 語言:韓文、英文、日文
Gop 文來總店
- 地址:서울 영등포구 당산로 34 1F 118호
- 營業時間:星期一至六 16:00-24:00、星期日 15:00-24:00
- 可預約時間:星期一至日 17:00-18:30
- 語言:韓文、中文
首爾「Gop」推薦原因
- 上過無數韓國美食節目,更加入選咗韓國美食指南Blue Ribbon,味道有保證!
- 只會用每日朝早新鮮屠宰嘅黃牛牛腸,更加完全唔會用鬆肉粉,可以品嘗到原汁原味!
- 提供多種配菜同主食,等客人可以用自己鍾意嘅配搭享用美食!
- 環境夠闊落,更加提供手機充電服務、毛氈、圍裙、衣物除臭劑,超貼心!
- 三間分店全部位於地鐵站附近,交通夠方便!
首爾「Gop」價錢
Menu | 價錢 |
---|---|
綜合拼盤 (牛心臟、牛小腸&大腸) 모둠구이 (염통,곱창,막창) | ₩25,000 (HKD 146.09) |
韓牛小腸 한우곱창 | ₩26,000 (HKD 151.93) |
韓牛大腸 한우대창 | ₩26,000 (HKD 151.93) |
蒜頭小腸 수제마늘곱창 | ₩28,000 (HKD 163.62) |
燒牛肚 특양구이 | ₩27,000 (HKD 157.78) |
首爾「Gop」退款政策
預約後至到訪3日前取消 | 全額退款 |
到訪2日前或其後取消 | 不設退款 |
首爾「Gop」注意事項
- 請最少喺3日前完成預約,你亦可以喺30日前進行預約。
- 請按人頭數點餐同預約。
- 預約時請準確選擇日期及時間。
- 請準時到達,如果遲到超過10分鐘預約將會自動取消。
- 嚴禁攜帶外來食物及飲品。
- 如需更改預約,或有任何疑問,請send email到help@creatrip.com查詢。
首爾「Gop」預約流程
STEP 1. | |
STEP 2. | 請詳細輸入所有相關資訊及付款,我哋會喺1-2個工作天內確認預約,如果需要更改日期/時間我哋會另外通知你。 |
STEP 3. | 當日請準時到達,向職員出示預約記錄。 |
STEP 4. | Enjoy! |
首爾「Gop」介紹
「Gop」係一間烤腸專門店,佢上過《週三美食匯》等等嘅韓國著名飲食節目,更加入選咗韓國美食指南Blue Ribbon!「Gop」喺首爾總共有3間分店,包括係江南店、麻浦直營店同文來總店,而今日小編嚟到位於江南站附近嘅分店,真係勁期待!
「Gop」江南店有兩層,環境好闊落,好啱一大班人一齊聚餐,而且枱同枱之間唔會話太逼!
1樓仲有窗邊位,可以望到出面街景,雖然係烤腸店,但係就有一種嚟到高級餐廳嘅感覺!
「Gop」最重視食材嘅新鮮度,只會用每日朝早新鮮屠宰嘅黃牛牛腸,再用水果代替鬆肉粉,可以品嘗到原汁原味!
每一份餐點都係落單之後先開始煮,牆上仲有寫住每份餐點大概要等幾耐先會上菜(1人份 10分鐘左右、2人份 15分鐘左右、3人份 20分鐘左右、4人份 25分鐘左右),高峰時間可能會再需要多5-10分鐘,大家點餐嘅時候可以參考!
基本小菜有芽菜、酸椰菜同「Gop」嘅招牌小菜大葱泡菜,全部都同充滿油脂嘅烤腸好夾!
大家如果有需要,可以自己去自助吧添,不過記住唔好眼闊肚窄啊!
餐前仲會有一份辣炒年糕,甜甜辣辣好開胃,小編準備好食今日嘅主菜 —— 烤牛腸啦!
今日小編同朋友叫咗3人份嘅綜合拼盤,入面包括有牛心臟、牛小腸同大腸,上菜前會先用火輕輕燒一次,所以一上枱就好香炭烤味!每次食烤腸見到牛腸好似用緊油炸咁煎緊嘅時候,雖然覺得好邪惡,不過真係勁香!
牛小腸同大腸燒得差唔多之後,就可以落埋牛心同薯仔一齊煎,咁可以呢兩款食材吸曬烤腸嘅香味,更加香口好食!
最後加埋韭菜同秘製調味粉錦上添花,影落都超上鏡!
上枱之前職員會好貼心咁幫大家將牛腸剪成一口大細,食落都方便啲,只要等牛心煮熟之後就可以開餐!
小編推薦大家可以喺鐵盤中間整個空位放大葱泡菜落去燒,大葱泡菜遇上烤腸嘅油之後會釋放更多甜味,同烤腸一齊食辣辣地好惹味!
記住要點埋「Gop」特製醬汁,香口烤腸+甜甜鹹鹹醬汁+韭菜真係冇得彈!
小編仲另外叫咗份生牛肉做配菜,因為牛肉本身已經有調味,所以唔洗另外點醬都好好食~
主餐方面,小編叫咗泡菜冷麵同韓國人必食嘅炒飯,唔單止味道好,仲好啱相機食先!
另外「Gop」最深得小編心嘅係有提供超多貼心服務,無論係手機充電服務、毛氈、圍裙、紥頭髮橡筋、牙線定簡單應急藥物都有,而且仲有準備好衣物除臭噴霧,食完烤腸噴一噴即刻咩味都冇曬!「Gop」無論係餐廳環境、食物質素定顧客服務都令小編好滿意,下次一定會帶埋其他朋友嚟encore!
首爾「Gop」前往方法
Gop 江南店
江南站(강남역)4號出口出。
直行。
轉左。
直行。
繼續直行。
轉右。
直行。
見到呢個招牌就去到「Gop」江南店啦!
Gop 麻浦直營店
Gop 文來總店
、
以上係首爾美食「Gop」嘅介紹,有任何問題請先詳讀呢篇文章。
如果睇完之後有任何問題,或者我哋語意、標示唔清嘅話,麻煩請send email告知,以方便我哋改進 。
如果有更多想知嘅內容,都可以隨時留言或者dm話俾我哋知:)
Instagram:creatrip.hk
Mail:help@creatrip.com