聖水隱世酒吧 | Cinderella Bar
聖水超特別Cocktail Bar！一齊行入童話世界，享受獨一無二嘅雞尾酒同餐點啦！
Hello，大家好，我哋係由韓國人每日提供最新韓國旅行資訊嘅Creatrip。
前幾日小編去咗聖水洞玩，發現咗一間以灰姑娘玻璃鞋做主題嘅Cocktail Bar，無論係裝修定Menu都勁特別，今日就等小編帶大家去睇吓啦！
撳我睇Menu&預約詳情👇🏻
聖水「Cinderella Bar」基本資訊
- 地址：서울 성동구 아차산로7가길 3-4
- 營業時間：
- 星期二至五 18:00-01:00
- 星期六及日 17:30-01:00
聖水「Cinderella Bar」實地探訪
聖水洞最近真係好受歡迎，呢度有好多特色餐廳、Cafe同酒吧，而其中一間最出名嘅就係今日小編要介紹嘅Cocktail Bar「Cinderella Bar」啦！
鋪頭外觀就好似鞋匠工坊咁，完全唔會聯想到係一間Cocktail Bar！
但係問題嚟啦，小編望咗勁耐都搵唔到門口喺邊XD 之後發現老闆喺鋪頭外面貼咗個提示，佢話講起灰姑娘大家都會諗起12點~（小編就唔喺度開估啦，希望大家都可以成功解謎！）
酒吧內部燈光比較暗，就好似行咗入童話故事入面嘅秘密空間咁！「Cinderella Bar」入面有Bar枱同普通枱，如果坐Bar枱仲可以望住調酒師幫大家整飲品，而坐普通枱就可以欣賞聖水洞街景！
鋪頭整體都幾闊落，唔會好逼狹，每張枱隔離都有一個籃俾大家擺個人物品，仲有衣架可以掛衫，相當貼心！
餐前首先會上一杯用紅酒、氣泡水同黑加侖子汁調製而成嘅Welcome Drink同南瓜脆片，飲品夠清新，而南瓜脆片真係好脆口，令人停唔到口！
「Cinderella Bar」嘅Cocktail都會用一個用3D打印機製作出高踭鞋杯架裝住，逼真得嚟超特別，影相效果一流！
小編同朋友叫咗Rossi、Vivi同Choo，嘢食方面就叫咗「搵玻璃鞋嘅時候偶遇嘅魚扒」同「繼母最愛嘅八爪魚料理」。
首先Choo嘅杯架係一隻閃令令嘅高踭鞋，連Cocktail入面本身都有珍珠光澤，睇落相當高級！而味道方面完全超乎想像，完全睇唔出佢係一款番茄&無花果味嘅飲品！
而Rossi就係一款西柚冰沙Cocktail，味道甜得嚟又清新；而放喺粉紅色高踭鞋入面嘅Vivi就係用牛奶做base嘅蜜桃迷迭香味Cocktail，非常易入口。
去到嘢食方面，「繼母最愛嘅八爪魚料理」原來係香煎八爪魚腳配紅蘿蔔蓉、燒葱段同開心果，八爪魚腳唔會韌，加埋其他配菜，口感豐富之餘更加充滿炭香味！
而「搵玻璃鞋嘅時候偶遇嘅魚扒」就係煎魚扒配番茄醬、蒜頭蛋黃醬同刁草，魚肉夠嫩滑，兩款醬汁都夠惹味，同飲品好夾！
聖水「Cinderella Bar」由鋪頭外觀到內部裝修，甚至係Cocktail同餐點都勁有特色，無論係想同朋友一齊影相打卡，定同另一半享受浪漫時光都好啱！小編已經約好朋友下次再嚟試埋其他Menu，大家如果有興趣嘅話不妨都可以預約定！
聖水「Cinderella Bar」前往方法
聖水站（성수역）1號出口出。
直行大約110米，然後唔好過馬路，直接轉右。
直行，過斑馬線。
繼續向前行之後會見到上圖嘅指示牌，跟住轉右。
行入巷仔。
咁就去到聖水「Cinderella Bar」啦！
撳我預約👇🏻
以上係聖水「Cinderella Bar」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Mail：help@creatrip.com