Hello，大家好，我哋係由韓國人每日提供最新韓國旅行資訊嘅Creatrip。
最近好多朋友都話離開韓國嘅時候勁多人要排長龍，今次小編就想介紹仁川機場智能通行證SMART PASS俾大家，到底SMART PASS同SeS自助通關有咩唔同，又要點整同用？
飛韓國前記住準備定✨
仁川機場快速通關系統「SMART PASS」
咩係SMART PASS？
Smart Pass係一個人臉識別系統，透過事先登記護照、臉部數據、機票等等嘅資訊之後，離開韓國嘅時候只要掃一掃塊臉就可以讀取登記咗喺系統入面嘅資料，唔洗再人手去掃機票同護照。
註冊完Smart Pass之後大家可以唔洗排隊，直接去過機行李同過關，可以慳返唔少時間！
SMART PASS註冊方法
STEP 1. 下載SMART PASS
STEP 2. 選擇語言（簡體中文）
STEP 3. 同意條款、進行電郵認證
STEP 4. 設定快速密碼、完成註冊
- 日後可以用指紋或臉部辨識登入
STEP 5. 登錄護照&臉部資訊
- 手機版本需為Andriod 9或IOS 14以上
點選畫面
拍攝護照
感應護照晶片時建議除低手機殼
掃瞄臉部（睜眼/閉眼）
STEP 6. 登錄登機證/機票
如果你有電子登機證，就要揀「手機登機牌二維碼登記」；如果有實體機票嗰張紙，就要揀「掃描紙質登機牌上的條形碼」。
實體機票要掃呢個Barcode
STEP 7. 咁就搞掂啦！
SMART PASS使用方法
STEP 1. 去離境出口搵專用通道
行到離境出口附近，大家可以見到地下有呢個SMART PASS嘅指示，跟住行就可以去到SMART PASS專用通道。
STEP 2. 按指示完成SMART PASS人臉辨識
按照工作人員指示進行臉部掃描，就可以直接去到行李過機區域啦！
SMART PASS常見問答
Q1. 小朋友用唔用到？
A：7歲以下小朋友無法使用，未滿14歲兒童就需要有監護人同意（亦都建議一部手機登記一個人嘅資訊）。
Q2. 目前有邊幾個機場可以用？
A：暫時得仁川機場先用到，大家記住一定要check清楚+排SMART PASS條隊！
Q3. 我張機票點解登錄/用唔到？
A：大家只可以喺乘坐有參與呢個計劃嘅航空公司嘅航班先可以用到SMART PASS（暫時得大韓航空、韓亞航空、濟州航空、真航空、德威航空同達美航空，相關詳情可以參考仁川機場官網）
Q4. 登記一次之後就可以每次都直接用同一套資料出境？
A：因為你每次搭嘅航班都會唔同，所以每次都需要重新登記登機證/機票，不過護照同臉部資訊有效期為5年，如果大家喺5年內會飛韓國就唔需要另外登錄相關資料。
Q5. 登記完SMART PASS就可以揼走張機票？
A：唔可以！最後登機嘅時候仍然需要用登機證/機票，Smart Pass唔可以取代機票。
Q6. SMART PASS等於SeS自動通關？
A：SMART PASS同SeS自動通關係兩回事，需要分開申請。
※韓國出境流程係：機場Check-in ➜ 喺離境出口用Smart Pass入行李過機區域 ➜ 檢查隨身行李 ➜ 過關（呢個時候可以用SeS自動通關出境）➜ 進入免稅店區域 ➜ 登機
SeS相關介紹👇🏻
Q7. 入境韓國都可以用SMART PASS？
A：唔可以，SMART PASS係離境韓國專用系統。
Q8. 如果換過一次護照，需唔要重新註冊SMART PASS？
A：要，重新註冊嘅時候需要刪除原本個APP，然後重新下載同註冊（可以用同一個email）
以上就係小編幫大家整理好嘅仁川機場SMART PASS快速通關系統嘅攻略同注意事項，希望可以幫到大家啦！
你仲可以參考埋..💡
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
