仁川機場去釜山交通攻略
仁川機場去釜山方法總整理！機場巴士去釜山要搭5個鐘頭？機場國內線、KTX邊個最抵？
Hello，大家好，我哋係由韓國人每日提供最新韓國旅行資訊嘅Creatrip。
平時大家嚟韓國玩通常都會去首爾，亦都有唔少朋友會喺首爾玩幾日然後落釜山，亦都有人會問小編點樣可以直接喺仁川機場去釜山！如果要直接喺機場過去，大約可以分成3個方法，到底邊個方法最抵、邊個方法最慳時間？同小編一齊睇落去啦！
仁川機場去釜山交通攻略
最唔推薦👎搭仁川機場巴士
- 行經：仁川機場T2、仁川機場T1、釜山東部、釜山海雲台
- 車費：₩53,500
- 所需時間：最少5個鐘
| 頭班車 | 尾班車 | ||
| T2 | T1 | T2 | T1 |
| 06:00 | 06:20 | 23:30 | 23:50 |
| 仁川機場T2搭車位置 | 仁川機場T1搭車位置 | ||
| B1/F 4號閘口 | 1/F 11號閘口 | ||
如果去到仁川機場之後想直接出發去釜山，都可以考慮搭長途機場巴士，不過車程最少需要5個鐘，齋諗都覺得攰...
2024年1月時間表
呢架長途巴士班次都唔多，1日大約有10班車，要match到上車時間都幾難，所以小編唔太建議大家搭機場巴士XD
可考慮👍搭機場國內線
- 費用：根據航空公司會有所唔同
- 所需時間：大約1個鐘（需要預留轉機時間）
경향신문
大家都可以選擇喺仁川機場直接轉機去釜山金海機場！不過大家都知道轉機嘅timing都幾難夾XD 所以比起直接喺仁川機場轉機，小編會推薦大家好似韓國人咁，先搭車去金海機場，然後再轉機（因為航班班次會多好多）！
如果想喺仁川機場去金浦機場，建議大家喺仁川機場搭站站停嘅機場鐵路去「金浦機場站」（喺T2去大約需要44分鐘、喺T1去大約需要38分鐘）。
金浦機場
至於國內線航班時間應該要點預先好呢？小編建議買仁川機場到埗時間3~3.5個鐘頭後嘅機票，例如仁川機場嗰班機係13:00降落嘅話，釜山國內線航班機票可以買16:00或打後時間，扣返過海關、等行李同搭車去金浦機場嘅時間都夠充裕，唔洗趕頭趕命！
最推薦🎉去首爾站搭KTX
- 所需時間：約3小時
考慮到價錢同時間，小編最推薦大家先喺仁川機場搭機場快線AREX去首爾站，然後再喺首爾站搭KTX去釜山！喺機場搭AREX去首爾站50分鐘內就到，再計埋行去KTX站同搭車去釜山嘅時間，大約3個半鐘就可以去到釜山。
比起搭長途巴士會快好多，而比起搭國內線飛機班次選擇會更加多！如果用優惠價買嘅話₩8,700就有一張AREX車飛，首爾去釜山嘅KTX單程大約係₩59,800，加埋同國內線飛機機票差唔多，大家可以格吓價~
另外我哋都有提供KTX優惠套票，除咗有85折優惠，仲會送1張AREX車飛，等大家可以直接喺仁川機場順利開始旅程！
如果齋睇價錢，當然長途巴士會最平，不過因為班次比較少，而且真係要搭好耐，所以小編通常都唔會推薦大家咁做。去首爾站搭KTX嘅話就唔洗怕因為上一班飛機delay而趕唔切下一班飛機，亦都有多啲班次，相對上時間會鬆動啲！如果大家都plan住直接喺仁川機場去釜山，不妨可以參考上面呢3個方法！
釜山旅行必備
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
