Hello，大家好，我哋係由韓國人每日提供最新韓國旅行資訊嘅Creatrip。
相信K-POP係唔少朋友接觸韓國呢個國家嘅第一條渠道，不過大家又有冇發現而家嘅K-POP同以前有咩唔同？早前就有韓國網友整理咗幾個現今K-POP嘅特徵，一齊嚟睇吓啦！
而家嘅K-POP同以前有咩唔同？
1. 歌詞同歌名大部份都係英文
小編以前聽K-POP歌，通常一句都唔會聽得明，因為全部都係韓文（或者間中會有幾個英文字咁）XD 但係而家K-POP歌越嚟越多英文，甚至有好多歌係全首都係英文歌詞！有時真係會唔知到底係聽緊外國pop song定K-POP！
而且最近真係越嚟越少韓文歌名！2023年9月Melon排行榜韓國流行音樂TOP50入面，上榜嘅idol歌入面得5首係韓文名，分別係LE SSERAFIM《이브, 프시케 그리고 푸른 수염의 아내（Eve, Psyche & the Bluebeard’s wife）》、SEVENTEEN《손오공（Super）》、夫碩順《파이팅 해야지（Fighting）》、JISOO《꽃（FLOWER）》同H1-KEY《건물 사이에 피어난 장미（Rose Blossom）》！
2. 副歌經常都係重覆嘅詞語
成日都話副歌係全首歌嘅靈魂 + 高潮，但係而家啲副歌好多都係重覆嘅詞語，有時候亦唔係有咩特別意思。就好似ITZY最新推出嘅《CAKE》咁，副歌不斷重覆「Cake」呢個詞語。
另外一個例子係SOMI嘅《금금금（Gold Gold Gold）》，副歌歌詞係講緊自己有好多金銀財寶，4句歌詞跟住旋律不斷重覆「금（金）」同「화（貨）」呢個兩個字，的確係幾洗腦。相信係因為而家好多Idol出歌就會同其他明星合作拍Challenge影片，而通常呢種重覆性嘅歌詞同洗腦嘅旋律比較容易引起熱潮！
3. 舞蹈超難
其實以前嘅偶像刀群舞（特別係男團）都出名好難，但係而家嘅idol舞整體難度急增，特別係女團舞動作難咗超多+勁大動作，喺呢個情況之下仲要唱live，真係好勁！
4. 好少見到男idol同女idol合作
講起男女偶像合作，一定唔少得以前2PM同少時嘅合作歌曲同舞台（真係超經典)！
但係而家男偶像同女偶像一有少少身體接觸，甚至係眼神交流，fans們就已經好唔滿意，甚至仲會互相攻擊。
其實唔單止係idol，最近ENHYPEN推出嘅新歌《BITE ME》都因為編舞入面同女dancer接觸太多而引起粉絲抗議，最後改為冇dancer版本。
5. 分工定位冇咁明確
以前韓團出道，都一定會介紹自己喺團體入面擔當咩角色(例如主唱、rapper、舞蹈等等），而家好似除咗隊長之外，大家都冇一個好明確嘅定位，每個人都好全能！
6. 好少出正規專輯
可能係製作正規專輯需要用好多錢，而家好多團都係偏向出多幾張迷你專輯或者單曲就算，好少會有完整1x首歌嘅專輯！
連人氣女團aespa出咗道就嚟3年，雖然每首主打歌都好膾炙人口，但係都仲未出過一張正規專輯。
7. 歌詞比起齋講愛情 越嚟越多係講自己
以前嘅K-POP歌10首有9首都係講緊愛情，但係隨住社會風氣逐漸偏向要愛錫自己、重視自我，而家好多歌（特別係女團歌）都係講緊要做自己！
最好嘅例子相信就係ITZY嘅《WANNABE》同 LE SSERAFIM嘅《Fearless》啦！
以上係7個而家K-POP同以前唔同嘅地方，大家又同唔同意呢？
如果你都想親自去睇韓國演唱會...
而家透過Creatrip都可以搶到演唱會飛啦！韓國每年年尾都會搞好多頒獎典禮同演唱會，但係真係超難搶到飛... 每年我哋都會積極幫大家爭取各大活動門票，先到先得，記住唔好錯過一年一度嘅難得機會啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
