Hello，大家好，我哋係由韓國人每日提供最新韓國旅行資訊嘅Creatrip。
講起韓國炸雞，相信大家第一個諗起嘅brand會係「橋村」！而早排佢哋開咗一間概念旗艦店，以筆墨為主題，門口仲有超大支毛筆！到底呢個神秘嘅地方有咩咁特別？同小編一齊去睇吓啦！
想book「橋村筆房」但係唔知點做好？🤔
橋村筆房（교촌필방）
- 地址：서울 용산구 보광로 127
- 營業時間：11:30 - 23:30（Last Order 22:00）
- 小貼士：梨泰院站（이태원역）4號出口行2分鐘
「橋村筆房」位於梨泰院地鐵站4號出口附近，門口出面支毛筆真係勁搶眼，幾乎所有人都會嚟影相打卡！相信大家喺網上都有睇過短片，其實佢係開門嘅裝置，只要輕輕一拉就可以打開大門！
「橋村筆房」有好多普通橋村炸雞分店冇嘅Menu，例如旗艦店限定嘅「筆房特製炸雞」同沙律、麵同漢堡等等。
鋪頭裝修簡單得嚟夠高級，牆上面仲有用各種食材做擺設，同平時嘅炸雞店好唔同！
「橋村筆房」每個位都好IG-able，特別係呢支喺鋪頭中間被煙霧圍繞嘅毛筆，就好似有魔法咁勁神秘！
另外一邊仲有一個鋼琴演奏區！「橋村筆房」唔單止有賣啤酒，仲有紅酒可以叫，夜晚喺呢度一邊聽住鋼琴音樂，一邊飲紅酒，一定超有mood！
另外呢度仲好sweet咁提供埋叉、夾同手套，大家食炸雞嘅時候就唔洗食到成手都係咁狼狽！
筆房經典拼盤（필방 시그니처 플래터）
小編叫完嘢食之後大概等咗20分鐘先上菜，雖然係有少少慢，不過大家等嘅時候可以食住爆谷、飲住啤酒吹吓水XD
小編叫嘅呢款「筆房經典拼盤」，有醬油、蜂蜜同原味炸雞，而且仲有配埋薯條同沙律。最特別嘅係大家可以用刷將醬料掃落炸雞度食，可以自己落手落腳調味，又fun又好食！
如果大家鍾意相機食先，又想食到普通炸雞店冇嘅Menu，大家不妨可以嚟「橋村筆房」食返餐，享受一個與眾不同嘅美食體驗！
冇時間去橋村筆房但又想食橋村炸雞？🍗
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
