弘大「風川鰻魚」介紹
網上瘋傳弘大美食「風川鰻魚」！到底有冇咁好食？
Hello，大家好，我哋係由韓國人每日提供最新韓國旅行資訊嘅Creatrip。
喺韓國講起燒鰻魚，大家就會諗起全羅北道高敞禪雲山嘅「風川鰻魚」，因為呢度嘅鰻魚最好食，所以好多喺韓國賣鰻魚嘅鋪頭都會特別標榜係「風川鰻魚」XD 而位於弘大嘅呢間「風川鰻魚」尤其出名，到底佢有咩魅力呢？等小編帶大家一齊去試吓啦。
唔想排隊等？
弘大風川鰻魚（풍천장어）
- 地址：서울 마포구 동교로27길 39
- 營業時間：11:30 - 22:20（Lunch Break 15:00 - 16:30、Last Order 21:30）
- 前往方法：弘大入口站（홍대입구역）2號出口行6分鐘
小編揀咗平日Lunch Time去，先開門冇幾耐出面就有唔少客人等緊位！其實小編都算早到，不過當時1樓已經坐滿人，小編要上去2樓先有位坐。一入到餐廳就聞到好香碳烤味，令小編好期待！
枱上面已經擺好曬小菜同醬料，而呢度嘅Menu都好簡單，得燒鰻魚同麵。
叫完嘢食之後，職員就會即刻幫大家準備好即場劏好嘅鰻魚，新鮮到條鰻魚仲郁緊XD 呢度嘅網都係用一次就會換，大家唔需要擔心衛生問題。而職員全程都會幫手燒，就好似睇緊表演咁，而且仲唔洗擔心自己會燒唔熟或者燒過龍。
燒到金黃色之後職員就會將鰻魚剪成適當大細，亦都會放上蒜頭等大家可以燒嚟食。
鰻魚2條（기본장어2마리）₩78,000
呢度有兩款醬汁，包括係辣醬同甜甜地嘅秘製黑醬油，仲有薑絲同泡菜可以配住食，味道會冇咁油膩之餘仲可以去腥。順帶一提「風川鰻魚」可以一個人去食，不過最少要叫2條鰻魚，如果係自己一個嚟旅行嘅話就要注意啦！
自己一個嚟旅行都想食盡好西？
「風川鰻魚」嘅口感同小編以前食過嘅鰻魚唔太一樣，食落會比較有咬口同彈牙！
另外因為鰻魚本身冇任何調味，所以小編建議大家先點黑色嗰款醬試原味先，如果一開頭就點辣醬，就會試唔到鰻魚本身嘅鮮甜。
泡菜冷麵（김치말이국수）₩5,000
如果齋叫鰻魚大家有可能會食唔飽，呢個時候可以叫返一碗麵（有時候會係泡菜冷麵，有時候會係熱嘅宴會湯麵），飽肚啲之餘仲可以轉吓新口味冇咁漏！
可能係因為網上講到呢間餐廳太好食，搞到小編太期待XD 食完之後老實講，又唔係真係好食到會推薦大家嚟韓國必食，但係因為味道中上，所以如果平時鍾意食海鮮或者鰻魚，都可以嚟試吓香港食唔到嘅韓式燒鰻魚！
唔想排隊等？
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
