景福宮美食 | I'M SO SEOUL
高級韓牛Fine Dining餐廳！用現代方式演繹韓國傳統菜式！
- 景福宮「I'M SO SEOUL」資訊
- 景福宮「I'M SO SEOUL」推薦原因
- 景福宮「I'M SO SEOUL」價錢
- 景福宮「I'M SO SEOUL」退款政策
- 景福宮「I'M SO SEOUL」注意事項
- 景福宮「I'M SO SEOUL」預約流程
- 景福宮「I'M SO SEOUL」介紹
Hello，大家好，我哋係由韓國人每日提供最新韓國旅行資訊嘅Creatrip。
通常大家去旅行都會去搵地道美食，體驗當地風情。不過當遇上紀念日等等嘅特別日子，自自然會想去啲比較有氣氛嘅地方慶祝！早幾日小編去咗一間位於景福宮附近嘅Fine Dining餐廳，跟住小編一齊去睇吓啦！
*暫時未開放預約，敬請見諒*
景福宮「I'M SO SEOUL」資訊
- 地址：서울 종로구 새문안로 76 콘코디언빌딩 B1F
- 營業時間：11:30 - 22:00（Break Time 15:00 - 18:00）
- 語言：韓文、簡單英文
景福宮「I'M SO SEOUL」推薦原因
- 附近有光化門站、市廳站、鐘閣站同景福宮站，交通夠曬方便！
- 位於首爾必去景點景福宮附近，大家可以參觀完之後去食！
- 融合韓國傳統同現代文化，提供全新韓式美食體驗！
- 呢度用嘅韓牛全部都係36個月以下未經懷孕生產歷程嘅母牛，肉質鮮嫩品質好！
景福宮「I'M SO SEOUL」價錢
選項 | 價錢 | 包括 |
班家（Standard） | ₩76,500/人 | 韓國之夏（3種一口料理）、甘苔生牛肉捲、扁柏蒸魚配綠茶、甜蜜雪、炭燒韓牛西冷、飯&湯、飯後茶點 |
班家（Signature） | ₩96,500/人 | 韓國之夏（4種一口料理）、甘苔生牛肉捲、扁柏蒸魚配綠茶、甜蜜雪、炭燒韓牛西冷、飯&湯、白藍瓷器（甜品）、飯後茶點 |
宗家 | ₩156,500/人 | 韓國之夏（4種一口料理）、南瓜花餃子、甘苔生牛肉捲、烤鮑魚、扁柏蒸魚配綠茶、甜蜜雪、炭燒韓牛西冷、韓牛肉乾釜飯配牛骨湯、白藍瓷器（甜品）、飯後茶點 |
水剌 | ₩186,500/人 | 韓國之夏（6種一口料理）、南瓜花餃子、甘苔生牛肉捲、烤鮑魚、扁柏蒸魚配綠茶、牛舌串燒、甜蜜雪、炭燒韓牛西冷配紫蘇籽油拌麵、韓牛肉乾釜飯配牛骨湯、白藍瓷器（甜品）、飯後茶點 |
※全部Menu最少要叫2人份。
※加₩15,000可以將白飯轉做韓牛肉乾釜飯。
景福宮「I'M SO SEOUL」退款政策
| 預約後至到訪4日前取消 | 全額退款 |
| 到訪3日前取消 | 不設退款 |
景福宮「I'M SO SEOUL」注意事項
- 請最少喺3日前完成預約。
- 請務必準時到達。
- 如希望加購其他餐點，請喺現場支付所需金額。
- Last Order時間係用餐時段結束前1小時。
- 預約時請確保已選擇正確日期及時間。
- 遲到超過10分鐘預約會自動取消。
- 如果想更改預約，或者有任何問題，請send email到help@creatrip.com查詢。
景福宮「I'M SO SEOUL」預約流程
| STEP 1. |
|
| STEP 2. | 請填寫所有相關資訊，我哋會喺1-2個工作天內確認預約。 |
| STEP 3. | 體驗當日請準時到達，向職員出示預約記錄。 |
| STEP 4. | Enjoy！ |
景福宮「I'M SO SEOUL」介紹
今日小編帶大家嚟到光化門站同景福宮附近嘅韓牛專門店「I'M SO SEOUL」！
平時高級餐廳裝修色調都會比較沉穩，呢度無論係燈光定窗都比較色彩繽紛，唔會有一種太嚴肅嘅感覺。
除咗頭先見到嘅餐枱位，「I'M SO SEOUL」另外仲有幾間房可以預約，令客人可以享受私人時間！
小編今次都好好彩咁可以坐房！呢間SAMSUNG Smart Dining Room內部都算幾大，入面有好多韓國傳統瓷器同擺設，好似去咗睇展覽咁！
呢度仲好sweet咁準備咗衣櫃同衣物護理機，坐低之前可以先將外套放入去，咁就唔洗怕會有味啦！
無論係餐具定餐牌都好有韓國特色，而且職員仲會親自服務大家，幫大家打開餐牌介紹同鋪好餐巾，令人有一種被招待嘅感覺。
呢度嘅餐牌有齊韓文、中文、英文同日文，就算唔識韓文都冇問題！小編今次就揀咗最豐富嘅「水剌」Set，一齊睇吓有咩食啦！
首先會先上一杯蓮葉茶，呢款茶可以淨化血液，有助消除疲勞。
然後職員就會攞出一個盒，佢係由韓國珍珠母貝藝術家專門為「I'M SO SEOUL」製作嘅作品，實物真係好靚！入面放滿今日會用到嘅食材，包括有莞島鮑魚、超甜粟米、南瓜、魚子醬、黑松露等等，仲有中間最搶眼嘅韓牛。職員話呢度用嘅韓牛全部都係36個月以下未經懷孕生產歷程嘅母牛，肉質夠鮮嫩！
終於上第一道菜啦！首先係6款「一口前菜」，包括有醬牛肉蕎麥Taco、超甜粟米蓉、魷魚刺身等等，將傳統韓式料理用現代方式呈現出嚟，特別得嚟又好味。
小編個人覺得醬青口同南瓜粥最好食！醬青口炭香味濃，配埋下面嘅意粉粒粒口感好特別；而南瓜粥就好似一碗好濃嘅忌廉南瓜湯咁，甜甜地好開胃！
下一碟菜係「南瓜花餃子」，南瓜花入面包住豬肉、芽菜等等，食嘅時候配埋青豆蓉同翠玉瓜片，層次會更加豐富！小編真係冇諗過南瓜花都可以整成餃子，食落去比普通用麵粉皮整嘅餃子更加清新無負擔。
跟住就係「I'M SO SEOUL」嘅招牌菜之一 —— 「甘苔生牛肉捲」，甘苔屬於海藻類，同紫菜有異曲同工之妙！甘苔上面有生牛肉、白飯、蛋絲、飯焦脆脆等等，用甘苔包住成嚿嘢食就得！咬落去口感豐富，鮮甜嘅生牛肉配上香口嘅甘苔同飯焦脆脆真係好match，唔怪得係呢度嘅招牌菜！
下一碟係「烤鮑魚」，有4塊炭火燒過嘅鮑魚，加上辣椒醬紫菜脆片同用綠豆整嘅醬汁，無論係口感定味道都非常好，令小編印象好深刻！
跟住就係「扁柏蒸魚配綠茶」，餐廳會根據當日邊款魚新鮮同當造去整，而小編去嘅時候就係食鱈魚。魚肉上面有一嚿炸楤木芽，下面就有白蘿蔔同蘆筍，而職員倒嘅係一款用魚仔乾同綠茶茶葉熬製而成嘅湯。整體味道比較清淡，凸顯到魚肉嘅鮮甜，而且鱈魚都好滑！
聽職員講最近呢度換咗新Menu，而呢款「牛舌串燒」就係新加嘅菜式啦！以韓國傳統美食為靈感，一支串燒上面有三款唔同味道同口感嘅牛舌，上菜嘅時候仲會放喺炭爐仔上面，好睇得嚟仲會增添炭香味！
食到一半左右就會上呢款叫做「甜蜜雪」嘅甜品俾大家清吓個口。柑橘雪葩配柑橘醬同用紅茶、蜜糖同薑整成嘅泡沫，酸酸甜甜好清新，令人隨時ready食主菜！
今日嘅主菜係「炭燒韓牛西冷配紫蘇籽油拌麵」，牛肉會先幫你燒到3成熟，大家可以根據自己個人喜好再燒熟啲食。
建議大家唔好燒咁熟，咁就可以食到嫩滑又juicy嘅韓牛啦！大家亦都可以配埋葱、金菇同其他調味料一齊食~
「紫蘇籽油拌麵」望落好似冇咩味咁，但係味道真係出乎小編意料之外！呢款拌麵用嘅係天使麵意粉，一開頭撈勻之後先食原味，感受紫蘇籽油同銀針魚魚露嘅鹹香味，然後食到咁上下可以倒埋側邊嘅水泡菜湯落去，酸酸地更加清新！
跟住就係食飯嘅環節啦！見到Menu上面寫住「韓牛肉乾釜飯」嘅時候小編都真係打咗個突，冇諗過牛肉乾同飯可以一齊食XD 上菜之後職員會先幫大家撈勻個飯，確保大家可以每一啖都食到牛肉乾同其他食材！
除咗釜飯，同時仲會上埋牛骨湯、紫菜同6款小菜（如果唔夠飽，小菜可以再添，亦都可以免費加白飯）。
職員仲俾咗個小貼士小編，佢話用頭先燒完牛肉嘅火爐燒一燒啲紫菜嘅話會更加脆更加香口！烘好一塊紫菜之後，將飯同鍾意嘅小菜放上去，一啖食落去真係好match！
另外呢碗牛骨湯小編都好鍾意，味道夠濃之餘仲有好多肉，配埋飯食真係超暖胃！
跟住就到甜品時間啦！一開頭見到「白藍瓷器」完全expect唔到會係咩嘢食，不過一上菜就明點解會叫呢個名啦，因為真係同真嘅瓷器一樣樣！
雖然好可惜，不過食嘅時候要用匙羹敲碎外面層白朱古力，入面係韓國米酒味嘅雪糕同覆盆子雪葩，配埋下面嘅海綿蛋糕、蛋白脆片同朱古力脆脆食就得。米酒味比想像中濃，加埋雪葩食味道會更加有層次，無論係外觀定味道都好新奇同有驚喜！
成個course最後仲會上埋飯後茶點，包括有4款韓式傳統茶點，對眼睛、呼吸道有益嘅柿葉茶。4款茶點嘅味道都好唔同，分別可以食到甜味、酸味同苦味，超特別！
連擺收據本簿仔都整到好似韓屋嘅門咁，令呢餐由頭到尾都充滿韓國傳統風情！
如果想試特別啲嘅韓國傳統美食，又想去比較高級、氣氛又好嘅餐廳，小編真係非常推薦大家嚟「I'M SO SEOUL」！
景福宮「I'M SO SEOUL」前往方法
喺光化門站（광화문역）6號出口出。
向出口反方向行，然後轉左。
直行，然後過斑馬線。
繼續直行。
直行到見到上面呢棟大廈，行入去之後落B1/F。
咁就去到「I'M SO SEOUL」啦！
*暫時未開放預約*
以上係景福宮「I'M SO SEOUL」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk