回基照相館 | STUDIO ZOOM IN
超多款主題風格任君選擇！仲可以免費加晒相！
Hello，大家好，我哋係由韓國人每日提供最新韓國旅行資訊嘅Creatrip。
以前大家嚟韓國影樓影相應該都只係會影證件相，不過而家好多影相鋪都會提供埋個人形象照拍攝服務，仲會幫大家P圖，留低大家最靚最青春嘅瞬間！今日小編就喺慶熙大學附近發現咗呢間同時可以影證件相同個人形象照嘅地方，跟住小編一齊去影返輯相啦！
回基「STUDIO ZOOM IN」資訊
- 地址：서울특별시 동대문구 회기로 121 B1F
- 營業時間：10:00 - 19:00
- 可預約時間：10:00 - 18:00
回基「STUDIO ZOOM IN」推薦原因
- 可以影證件相之餘，仲有超多款主題嘅個人形象照任君選擇！
- 可以免費攞返原圖，連額外沖晒都唔洗錢！
- 攝影師修圖嘅時候大家可以喺側邊睇同俾意見，包你滿意最後成果！
- 已經準備好服裝、配飾同道具，唔需要自己帶！
- 攝影師會教你擺pose同活用道具，就算係第一次影呢種相都唔洗擔心！
回基「STUDIO ZOOM IN」價錢
駕照 / 護照證件相 | ₩20,000 |
彩色證件相 | ₩35,000 |
寵物證件相 | ₩40,000 |
彩色上半身形象照 | ₩45,000 |
懷舊形象照 | ₩45,000 |
個人形象照 | ₩72,000 |
禮服&花球形象照 | ₩90,000 |
情侶形象照 | ₩54,000 |
友情形象照 | ₩54,000 |
家庭形象照 | ₩135,000 |
精簡版婚紗相 | ₩180,000 |
回基「STUDIO ZOOM IN」退款政策
| 預約後至體驗3日前取消 | 全額退款 |
| 體驗2日前取消 | 不設退款 |
回基「STUDIO ZOOM IN」注意事項
- 請最少喺2日前完成預約。
- 體驗大約需要1小時。
- 同時段最多接受5人預約。
- 攝影師識講簡單英文，不過唔識講中文。
- 唔接受walk-in，請務必準時到達。
- 如果遲到超過10分鐘，預約將自動被取消，屆時將不設退款。
- 拍攝前請自行準備妝髮。
- 為令最終效果更自然，建議以比較簡單整潔嘅髮型進行拍攝。
- 駕照證件相、護照證件相、普通證件相：沖晒6張相 + 提供電子版
- 形象照：修3張圖 + 提供最終修圖電子版
- 相會透過email send俾你，一段時間後就會被刪除，所以收到之後請儘快下載。
- 如有任何疑問，或者需要更改預約，請send email到help@creatrip.com查詢。
回基「STUDIO ZOOM IN」預約流程
| STEP 1. | 撳我預約 |
| STEP 2. | 請詳細輸入所有相關資訊。 我哋會喺2個工作天內確認預約，然後通知你最終預約時間。 |
| STEP 3. | 請務必準時到達，然後向職員出示預約記錄。 |
| STEP 4. | 開始影相！ |
回基「STUDIO ZOOM IN」參考圖
證件相
彩色上半身形象照
懷舊形象照
禮服&花球形象照
回基「STUDIO ZOOM IN」介紹
今日小編嚟到位於回基嘅「STUDIO ZOOM IN」！平時影相鋪可能得幾款風格同主題，不過喺「STUDIO ZOOM IN」唔單止可以影證件相，仲有超多種concept嘅形象照可以影，無論係自己嚟定同家人、朋友或者另一半嚟都可以影得開心！
鋪頭雖然唔大，不過所有嘢都一應俱全！「STUDIO ZOOM IN」更加會提供埋服裝同飾物，大家可以根據主題風格揀套衫嚟換！
另外亦都有提供埋梳、風筒、直髮夾、橡筋等等，等大家可以整理好頭髮之後先影~
小編今日就揀咗影「禮服&花球形象照」，禮服款式比想像中多，有選擇困難症嘅小編都揀咗一段時間先揀得落手XD
戴埋皇冠同耳環之後感覺會更加華麗，影相嘅時候都會更加上鏡~ 不過自己著禮服會有啲難，建議大家可以同朋友一齊嚟，叫朋友幫手！
最後揀埋花就準備好去影相啦！
因為成個過程大約需要1個鐘，老闆都好貼心咁幫小編準備咗支裝水~
順帶一提，攝影棚入面有一隻好溫馴嘅貓仔，而且都唔怕人，鍾意動物嘅小編一見到佢即刻心心眼，仲同佢玩咗陣XD 不過如果大家怕貓或者對貓毛敏感，可以同老闆講聲，佢哋會幫你將貓仔放入圍欄！
拍攝背景方面可以揀普通紙板背景或者窗簾背景，攝影師話如果係影「禮服&花球形象照」嘅話窗簾會比較襯~
正式開始影相啦！其實今次係小編第一次影個人形象照，所以唔係好似擺pose... 不過攝影師都會教小編點先可以影得自然，而且佢都好親切，所以完全唔會覺得尷尬~
比起只係用一個角度影相，攝影師會周不時換一換角度，等大家可以影出唔同效果嘅相，小編個人幾鍾意呢點！
影完就可以去揀相啦！影形象照嘅話總共可以揀3張相，然後攝影師就會即場幫你P圖同晒相。
P圖過程大約用咗20-30分鐘，因為可以望住佢執相，所以大家都可以主動同攝影師講有咩要求，晒出嚟之後仲會幫你放入紙相框~
老闆亦都會將最後執好嗰3張相用email send俾你，如果大家想晒多幾張相，或者想要返原圖都可以直接同老闆講，係免費提供㗎！不過如果係想額外晒其他版本嘅相就冇得即日攞，詳情可以同老闆傾傾~
回基「STUDIO ZOOM IN」有好多款主題可以揀，而且仲會準備埋衫同道具，連額外晒相同電子版原圖都係免費，真係好超值！如果大家住附近，或者有機會嚟呢頭，非常推薦大家嚟影返輯相！
回基「STUDIO ZOOM IN」前往方法
喺回基站（회기역）1號出口出。
向左邊行。
去到十字路口繼續直行。
喺下一個十字路口過馬路， 然後向左邊行。
直行一段時間就會見到右邊有寫住「STUDIO ZOOM IN」嘅招牌。
咁就去到啦！
以上係回基照相館「STUDIO ZOOM IN」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
