弘大韓妝體驗｜MOI hair&makeup
想知道韓仔韓妹嘅妝到底係點化？等韓星御用化妝師教你啦！
Hello，大家好，我哋係由韓國人每日提供最新韓國旅行資訊嘅Creatrip。
相信唔少朋友都對韓國美妝有興趣，而且有時候都想知道到底自己啱化咩妝、點化妝先好睇。今日要介紹嘅「MOI hair&makeup」係一間化妝室&髮型屋，除咗提供基本妝髮服務之外，仲有化妝班可以上！
弘大「MOI hair&makeup」資訊
- 地址：서울 마포구 양화로 183 효성홍익인간 B1F b06호
- 營業時間：05:00 - 18:00
- 可預約時間：10:00-16:00
- 語言：韓文、中文、英文、日文
弘大「MOI hair&makeup」推薦原因
- 化妝班會喺專業翻譯人員陪同下進行，唔需要擔心溝通唔到！
- 可以學化韓國美妝，根據個人臉型、風格同皮膚色調化出最啱自己嘅妝！
- 唔單止有化妝師嘅示範，仲可以親自落手落腳試化妝！
- 化妝師幫過少女時代等無數韓星化妝，經驗豐富，可以學到好多嘢！
- 位於弘大入口站3號出口附近，化完妝上完堂可以直接去弘大玩！
弘大「MOI hair&makeup」價錢
化妝班（包翻譯） | 1:1（60分鐘） | ₩295,000 （HKD 1,324.22） |
1:2（90分鐘） | ₩455,000 （HKD 2,324.74） | |
日常妝髮服務（不含翻譯） | 1:1（60分鐘） | ₩135,000 （HKD 794.53） |
※化妝班：化妝師會逐步教大家化妝，先喺半邊臉示範要點化，然後另外半邊就由大家親自試吓跟住化
※日常妝髮服務：只包括妝髮服務，唔會有翻譯人員陪同
※如非參加體驗，隨行人士（家人、朋友等）唔可以一齊入去聽。
※只有化妝班會有翻譯人員在場，其他選項一律唔提供翻譯服務。
弘大「MOI hair&makeup」退款政策
| 預約後至體驗3日前取消 | 全額退款 |
| 體驗2日前取消 | 不設退款 |
弘大「MOI hair&makeup」注意事項
日常妝髮服務注意事項
- 如果有想整嘅風格，建議妝容&髮型分別準備3張圖片，以供參考。
- 唔包括洗頭同剪髮服務。
- 同一時段預約人數上限為4人。
預約注意事項
- 請最少喺3日前完成預約。
- 如需要卸妝，請提前通知。
- 體驗當日請提早15分鐘到達。
- 如遲到15分鐘或以上，預約將自動取消，訂金亦不設退還。
- 如非參加體驗，隨行人士唔可以一齊入去聽，如果需要有監護人同行，請事前同化妝師協議。
- 請準確輸入所有資訊。
- 提供泊車位，如有需要請提前通知。
- 如果想更改預約，或者有任何問題，請send email到help@creatrip.com查詢。
弘大「MOI hair&makeup」預約流程
| STEP 1. | |
| STEP 2. | 請詳細輸入所有相關資訊。 我哋會喺2個工作天內確認預約，然後通知你最終預約時間。 |
| STEP 3. | 請務必準時到達，然後向職員出示預約記錄。 |
| STEP 4. | 開始體驗！ |
弘大「MOI hair&makeup」化妝師資歷
Won Kyoung院長
- CANON 100D廣告化妝師
- SM TOWN世界巡迴演唱會化妝師
- 少女時代《I got a boy》、《mr. mr.》表演及MV化妝師
- 少女時代TTS《Twinkle》化妝師
- 少女時代孝淵《Dancing With The Stars》、《青春不敗》、少女時代Yuri電影《屏息》等拍攝化妝師
- 少女時代日本ARENA演唱會化妝師
- 2AM 鄭珍雲、4men御用化妝師
- 演員李是英 TVN電視劇《有理的愛情》化妝師
- 各種演奏會、面試、播報員化妝等
弘大「MOI hair&makeup」介紹
「MOI hair&makeup」位於弘大入口站3號出口附近，只要行30秒就到，好容易就搵到！「MOI hair&makeup」嘅化妝師同髮型師全部都有幫過韓國明星化妝同造型，位位都經驗豐富，今日小編就嚟到呢度學化妝！
鋪頭裝修以白色同木調為主調，有一種乾淨得嚟又高級嘅感覺。
行到入去就會見到大約有4張化妝枱，每張枱都放滿超多化妝品。
而呢度就係單人房，1:1化妝班通常都會喺呢度進行。
呢度眼影、遮瑕膏、胭脂、眼線、睫毛膏、唇膏等等一應俱全，而且每種化妝品都有超多款顔色，鍾意化妝品嘅朋友們嚟到對眼應該會發曬光XD 今日小編就同朋友一齊報咗1:2化妝班，一齊睇吓係點進行㗎啦！
化妝師嚟到之後先幫小編卸走咗原本嘅妝。
然後就搽咗保濕cream。化妝師話比起搽幾層粉底，事前護膚做得好嘅話個妝就唔會咁易溶。
跟住化妝師就幫小編修咗眉毛。
中途化妝師會同大家講解一吓基本化妝理論，真係要攞本簿仔去抄notes！
跟住就上底妝啦！化妝師會根據客人嘅膚質同顔色，建議客人要搽幾多層粉底液。而化妝師亦都有話，比起一開頭就用氣墊粉底上妝，用粉底液上妝先會比較好，cushion比較啱用嚟補妝。
跟住就會上碎粉，化妝師話比起用粉撲，用掃上會更加均匀。除此之外，化妝師仲講咗好多化妝小Tips俾小編聽~
小編覺得最神奇嘅係佢可以即刻catch到每個人嘅特徵，然後推薦啱對方嘅化妝方法！
搽眼影之前化妝師亦都有同小編講用咗邊款顔色，之後要自己化妝嘅時候都可以跟住做！
要點畫眼線、小編要用咩product，化妝師全部都有講，小編都有認真抄notes XD
韓式化妝點可以少得臥蠶！小編而家先知道原來臥蠶唔係只係上閃粉就得，仲要畫埋陰影！
上埋睫毛膏、陰影同highlight之後就完成半邊臉嘅妝啦！同另外一邊對比真係差好遠XD
化妝師亦都有教邊款掃要幾時用、用喺邊度等等，跟住就到小編自己試吓化妝啦！
跟住就到小編朋友，同樣地一開頭都會先卸妝同搽cream，整理好皮膚先。
化妝師亦都有教要用睫毛夾嘅方法，更加會親自示範點自己夾眼睫毛，所以好容易就明要點做。
跟住就會化埋眉毛、眼影、眼線、睫毛膏、陰影、highlight同臥蠶。
如果係化妝新手，或者平時唔會點化妝嘅朋友們，嚟到真係會學到好多好多嘢！
化完半邊臉之後，化妝師會再同你講頭先用咗邊幾款product同工具，跟住就要自己落手化啦。
因為小編係同朋友一齊參加1:2化妝班，所以當小編朋友開始自己化嘅時候，化妝師就嚟咗幫小編睇邊度化得唔好，亦都會教可以點改善呢個問題。
小編朋友畫眼線嘅時候唔小心畫到出曬界XD 不過化妝師都會幫大家畫返靚佢~
化得唔自然嘅位都會再教多次，真係好sweet！
最後就會上埋唇妝，化妝師會根據客人嘅妝同風格、感覺等等去幫你揀顔色！搽完就大功告成啦！
上完堂之後真心覺得，專家不愧係專家，化妝技術真係唔同啲！小編本身唔太識化妝，經過今次機會真係獲益良多，好多人都有話小編化妝靚咗~
Before
After
除咗呢排好hit嘅Personal Colour，小編都好推薦大家去上呢種化妝班，因為上一次就已經可以學到好多嘢！對化妝有興趣，或者想學識化妝，不妨可以嚟「MOI hair&makeup」參加化妝班，而且呢度仲有翻譯人員在場，唔洗擔心會聽唔明！
弘大「MOI hair&makeup」前往方法
向弘大入口站（홍대입구역）3號出口方向行。
上半層樓梯，行入呢個入口。
行前少少就會見到「MOI hair&makeup」門口。
咁就去到啦！
以上係弘大韓妝體驗「MOI hair&makeup」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
