首爾廣藏市場美食攻略
韓國「廣藏市場」有咩好食？2024私藏廣藏市場必食美食清單！
Hello，大家好，我哋係由韓國人每日提供最新韓國旅行資訊嘅Creatrip。
首爾廣藏市場係韓國最出名嘅傳統市場之一，唔單止多遊客嚟，其實韓國人都會喺收工之後去廣藏市場小酌一杯。廣藏市場亦都有一條小食街，各種類型嘅美食應有盡有，當中必食嘅唔少得火章魚、生牛肉同綠豆煎餅。今日就等小編推薦幾件餐廳俾大家啦！
想直接睇廣藏市場有咩必食？
打開目錄就知！
首爾廣藏市場美食攻略
故鄉刀削麵(고향칼국수)
- 地址：서울 종로구 종로32길 5
- 攤位號碼：A70號攤位
- 營業時間：08:00-23:00（每個星期一、第四個星期日休息）
餃子刀削麵（만두칼국수）
「故鄉刀削麵」曾經喺Netflix《Street Food》出現過，大家由正門行入去就會見到一塊印住Netflix同老闆娘個樣嘅板。小編特別推薦大家一定要食佢哋嘅餃子刀削麵，即搓即煮食落好彈牙，而且價錢一啲都唔貴，配埋呢度秘製嘅泡菜一流！
昌信生拌牛肉2號店(창신육회2호점)
- 地址：서울 종로구 동호로 403-17
- 營業時間：10:00-22:00（逢星期一休息）
生牛肉、牛肉刺身、生章魚
廣藏市場其中一樣必食美食係生牛肉！「昌信生拌牛肉2號店」除咗有生牛肉之外，仲有賣綠豆煎餅、葱煎餅等等嘅韓國傳統美食，就算唔食生嘢都一樣可以嚟。
昌信生拌牛肉4號店(창신육회4호점)
- 地址：서울 종로구 종로 206 2F
- 營業時間：10:00-21:50（逢星期一休息）
生牛肉、韓式煎肉餅
「昌信生拌牛肉」總共有4間分店，4位老闆都各有風格XD 而4號店環境會比較闊落，而且平時生牛肉調味都係甜甜鹹鹹，不過呢間分店嘅生牛肉落咗辣椒粉，所以會有少少辣！小編個人覺得辣辣地反而無咁漏，加埋清甜嘅梨絲仲可以解辣，記住叫埋熱辣辣又juicy嘅韓式煎肉餅啊！
晉州生拌牛肉(진주육회)
- 地址：서울 종로구 종로 206 2F
- 營業時間：10:00-21:50（逢星期一休息）
生拌牛肉、生牛肝&牛肚
「晉州生拌牛肉」係另一間小編私藏美食，呢度除咗生牛肉，仲有生牛肝同牛柏葉可以試，全部都唔會腥，鍾意食生嘢嘅朋友們不妨一試！另外呢度嘅綠豆煎餅都係招牌menu之一，冇油膉味，小編都帶過唔少朋友嚟！
聲牛生拌牛肉(성우육회)
- 地址：서울 종로구 종로 200-12
- 營業時間：09:00-21:30（逢星期三休息）
章魚生牛肉（육회탕탕이）
「聲牛生拌牛肉」嘅招牌Menu係章魚生牛肉，唔少節目同名人都有介紹過佢！不過因為章魚一上枱仲係識郁，識嘅時候可能會俾佢啜住，感覺好特別XD
朴家生拌牛肉(박가네 육회)
- 地址：서울 종로구 종로32길 9
- 營業時間：09:00-22:00
生牛肉拌飯、生牛肉紫菜包飯
「朴家生拌牛肉」同樣係NETFLIX原創節目嘅拍攝場地之一，好多韓國人同遊客都會慕名而來！呢度嘅招牌係生牛肉紫菜包飯，每枱都會叫一碟！
朴家綠豆煎餅2號店(박가네 빈대떡 2호점)
- 地址：서울 종로구 동호로 403-16
- 營業時間：08:00-22:00（每月第三個星期三休息）
韓牛煎餅、什錦煎餅、朴家三拼Set
朴家仲有韓式煎餅專賣店，鋪頭入面更加有唔少明星嘅簽名，證明真係好受歡迎！推薦大家可以叫朴家三拼Set，入面有綠豆煎餅、豬肉冷切肉片同生醃蠔，係喺其他餐廳食唔到嘅配搭！
Orai里脊(오라이등심)
- 地址：서울 종로구 종로5가 395-10
- 營業時間：10:30-00:00
「Orai里脊」最出名食辣椒醬烤豬肉同盲鰻，仲上過幾個韓國節目添啊！辣椒醬烤豬肉係將豬里脊肉捲成長筒狀之後切片，再加埋惹味辣醬調味嘅超特別燒肉！而且呢度用嘅係炭火，肉快熟得嚟仲有炭香味！
廣藏飯焦炸雞(광장 누룽지 닭강정)
- 地址：서울 종로구 동호로 403-8
- 營業時間：12:00-22:00
香蒜飯焦炸雞（마늘누룽지닭강정）
「廣藏飯焦炸雞」所有雞肉都係韓國本地雞，亦都保障絕對唔會用急凍雞，而且運用韓國蒜頭整嘅秘製醬汁不含任何人工調味料，包保每一嚿雞都夠嫩滑juicy夠惹味！而家買埋Creatrip Solo Foodie Pass，只要消費超過₩20,000就可以免費得到一罐飲品！
BHC炸雞 鐘路5街廣藏店(BHC치킨 종로5가광장점)
- 地址：서울 종로구 종로31길 7
- 營業時間：16:00-01:00
大家平時應該都會去食橋村炸雞，不過其實韓國人最鍾意嘅炸雞應該係「BHC」！廣藏市場附近有一間規模超大嘅BHC炸雞，大家可以喺度堂食，一邊欣賞韓國街道，一邊享受韓國炸雞店特有嘅氛圍！
姊妹元祖麻藥紫菜包飯(자매원조마약김밥)
- 攤位號碼：A08號攤位
連地獄廚神Gordon Ramsay都有嚟過呢間「姊妹元祖麻藥紫菜包飯」拍節目，味道唔錯之餘價錢非常親民，想簡單食韓國傳統小食嘅話一定唔可以錯過。
明洞一隻雞 巨成店(명동닭한마리 거성점)
- 地址：서울 종로구 종로 252-9
- 營業時間：10:00-23:00
一隻雞2人份套餐（雞+雞腎+年糕+麵）
廣藏市場隔離其實就係東大門嘅一隻雞一條街，呢度有超多一隻雞專門店，不過其實都大同小異。而「明洞一隻雞巨成店」最特別嘅係會有埋雞腎，想食熱湯類嘅話不妨可以考慮嚟呢度！
以上係小編幫大家精挑細選嘅首爾「廣藏市場」必食美食，唔知大家又去過邊間呢？如果仲未去過，推薦大家plan落今次韓國之旅嘅list入面，一齊享受韓國傳統美食！
如果有更多想知嘅內容，都可以隨時dm話俾我哋知：）
Instagram：creatrip.hk