Hello，大家好，呢度係由韓國人每日提供最新韓國旅行資訊嘅Creatrip。
首爾呢個大城市雖然好繁華，夠曬方便又多嘢玩，不過有時候想散吓心，都會想離開首爾去睇吓海。今日小編就幫大家整理咗幾個喺首爾搭地鐵就可以去到嘅睇海景點，一齊近近地去返轉旅行啦！
搭地鐵梗係要準備定交通卡!
首爾地鐵睇海景點推薦
1. 乙旺里海水浴場（을왕리해수욕장）
- 地址：인천 중구 용유서로302번길 16-15
機場鐵路仁川機場T1站（인천공항 1터미널）落車 → 111、306號巴士搭30分鐘 → 乙旺里海水浴場（을왕리해수욕장）站落車
「乙旺里海水浴場」可以話係仁川最受歡迎嘅沙灘之一，因為喺首爾搭地鐵個幾鐘就可以嚟到，而且算係首爾附近規模比較大嘅沙灘，所以天氣好嘅時候好多韓國人weekend都會一家大細或者同另一半嚟呢度玩。
2. 王山海水浴場（왕산해수욕장）
- 地址：인천광역시 중구 용유서로423번길 11-2
機場鐵路仁川機場T1站（인천공항 1터미널）落車 → 111、306號巴士搭30分鐘 → 王山海水浴場·王山遊艇競技場（왕산해수욕장·왕산요트경기장）站落車
「王山海水浴場」其實就喺「乙旺里海水浴場」附近，不過好多遊客都未必有聽過。呢度嘅日落被譽為龍遊八景中第一景，唔少韓國人都會喺黃昏時候嚟到呢個沙灘欣賞超靚日落景色！大家如果會去「乙旺里海水浴場」，不妨留多少少時間行過去「王山海水浴場」，睇埋日落先走~
3. 仙女岩海水浴場（선녀바위해수욕장）
- 地址：인천 중구 을왕동 678-188
機場鐵路仁川機場T1站（인천공항 1터미널）落車 → 111、306號巴士搭20分鐘 → 仙女岩海水浴場（선녀바위해수욕장）站落車
同「王山海水浴場」一樣，「仙女岩海水浴場」都係仁川其中一個日落勝地！呢度最特別嘅係有好多奇岩怪石，當中最顯眼嘅就係呢座被譽為龍遊八景中第三景嘅「仙女岩」啦！因為形狀好似仙女沿著彩虹下凡嚟人間玩嘅樣咁，所以被稱為「仙女岩」~
4. 馬嘶鞍海邊（마시안해변）
- 地址：인천 중구 마시란로 118
機場鐵路仁川機場T1站（인천공항 1터미널）落車 → 111號巴士搭15分鐘 → 마시란站落車
位於永宗島嘅「馬嘶鞍海邊」係一個同時可以睇到白沙灘同泥灘嘅海灘，而且因為喺機場附近，所以經常都會見到有飛機經過。另外因為呢度退潮嘅時候會出現一個黑色泥灘，所以好多家庭會帶埋小朋友嚟進行泥灘體驗。海灘周圍亦都有松樹林，好療癒！
5. 舂頭浦海水浴場（방아머리해수욕장）
- 地址：경기도 안산시 단원구 대부황금로 1531
4號線舍堂站（사당역）落車 → 搭6502號巴士喺EG the1（이지더원）站轉123號巴士 → 舂頭浦碼頭（방아머리선착장）站落車
「舂頭浦海水浴場」位於京畿道安山市大阜島，除咗海景靚，附近仲有主題公園、觀景台同觀光景點，大家如果有機會嚟，可以留多少少時間行埋周邊景點！
6. 始華防潮堤（시화방조제）
- 地址：경기 안산시 단원구 대부동동
4號線烏耳島站（오이도역）落車 → 123號巴士搭30分鐘 → 始華湖潮汐電廠（시화호조력발전소）站落車
同樣位於安山嘅「始華防潮堤」亦都係首爾近郊可以睇到海嘅景點之一，要經過呢度先入到大阜島，所以好多人都鍾意嚟遊車河！附近更加有休息站同觀景台，大家有機會可以去參觀！
7. 烏耳島碼頭（오이도선착장）
- 地址：경기도 시흥시 오이도로 156
4號線烏耳島站（오이도역）落車 → 30-2號巴士搭25分鐘 → 烏耳島綜合漁市場（오이도종합어시장）落車
就咁聽呢個名大家未必知道喺邊度，不過相信大家應該有見過呢個紅色燈塔！呢度係烏耳島嘅地標之一，好多韓劇同綜藝都有嚟過取景，喺首爾站只要搭個幾鐘車就到，不如搵個weekend嚟散心打卡啦！
8. 月尾島&月尾文化街（월미도&월미문화의거리）
- 地址：인천 중구 월미문화로 36
1號線仁川站（인천역）落車 → 45號巴士搭10分鐘 → 月尾文化街（월미문화의거리）站落車
相信唔需要小編介紹，大家都聽過「月尾島」呢個地方。小編身邊好多朋友想睇海嘅時候第一時候都會諗起「月尾島」，因為夠近，而且點影都咁靚！附近仲有個中國城同可以玩機動遊戲嘅地方，啱曬放假時去玩返日！
9. Solchan Park（솔찬공원）
- 地址：인천 연수구 컨벤시아대로391번길 20
首爾地鐵1號線富平站（부평역）轉仁川地鐵1號線 → 知識情報團地站（지식정보단지역）落車 → 6、6-1號巴士搭5-10分鐘 → 仁川大學工大（인천대학교공과대학）站落車
位於仁川嘅「Solchan Park」係松島其中一個出名睇海景嘅公園，海旁會有散步路同涼亭，大家可以好好享受悠閒時光！（記住買定蝦條去，因為會有好多海鷗出沒㗎！）
10. 蘇萊浦口（소래포구）
- 地址：인천 남동구 논현동 111-200
水仁·盆唐線蘇萊浦口站（소래포구역）行10分鐘
「蘇萊浦口」位於仁川，大家嚟到可以欣賞喺首爾唔會見到嘅漁村風景，如果好彩仲可以參加埋首都圈唯一以傳統漁港做主題嘅慶典 —— 「仁川蘇萊浦口慶典」！
11. 月岬浦口（월곶포구）
- 地址：경기 시흥시 월곶동
水仁·盆唐線月岬站（월곶역）行10分鐘
直至1991年，「月岬浦口」都仲係一個泥灘，之後始興市開始進行填海同重建，而家呢度成為咗一個新型休憩空間，無論係海旁散步徑、餐廳、娛樂設施通通都有！好多人會專程嚟食魚生同睇夜景，推薦大家可以搵個天氣好嘅夜晚嚟玩！
以上就係喺首爾搭地鐵都可以去到嘅睇海景點，相信大家都可能發現到大部分景點都係喺仁川，所以推薦大家嚟旅行嘅時候可以抽一兩日去仁川玩，睇盡超靚海景！
搭地鐵梗係要準備定交通卡!
如果有更多想知嘅內容，都可以隨時留言或者dm話俾我哋知：）
Instagram：creatrip.hk
