廣藏市場美食 | hidden hour
喺鬧市中享受浪漫氣氛！原來廣藏市場入面有間咁潮嘅Rooftop Wine Bar？
Hello，大家好，我哋係由韓國人每日提供最新韓國旅行資訊嘅Creatrip。
講起廣藏市場，相信大家應該都會諗起韓國傳統街頭小食，大家又知唔知道原來呢度有一間Rooftop Wine Bar呢？今日就等小編帶大家去一探究竟啦！
餐廳內部正進行維修，暫時唔接受預約
廣藏市場「hidden hour」資訊
- 地址：서울 종로구 종로32길 21 4F
- 營業時間：星期二至六 17:00 - 23:00（Last Order 22:00）、逢星期日及一休息
- 可預約時間：星期二至五 17:00 - 21:00
廣藏市場「hidden hour」推薦原因
- 可以喺Rooftop Wine Bar俯瞰廣藏市場全景，仲可以享受美酒佳餚！
- 餐點夠高質，而且價錢比其他酒吧平，CP值高！
- 完全顛覆大家對廣藏市場嘅印象，可以喺人山人海嘅傳統市場享受悠閒時光！
- 喺廣藏市場掃完街之後可以去小酌一杯！
- 餐廳入面有好多個打卡位，點影都咁靚！
廣藏市場「hidden hour」價錢
| 選項 | 價錢 | 簡介 |
hidden原條牛仔骨 | ₩35,000 | 經過長時間燉煮嘅牛仔骨，配上用綠豆整嘅忌廉汁，味道濃郁！ |
醬油烤雞 | ₩10,000 | 將雞脾肉用醬油醃製，然後裹上紫蘇葉洋葱脆皮烤製而成。 |
牛肉辣椒醬拌麵 | ₩15,000 | 香濃牛肉辣椒醬加上清爽脆口嘅青瓜，係一款啱夏天食嘅拌麵。 |
醬油豬肉炒麵 | ₩13,000 | 將用薑同豉油醃嘅豬肉片煎到香口，再加上秘製醬汁炒成嘅韓式意粉。 |
辣椒生牛肉 | ₩20,000 | 用醃辣椒調味嘅生牛肉，配上炭火燒調糖辣椒。 |
檸檬涼拌鮮蝦 | ₩15,000 | 鮮蝦配醬油底調味料，係一款清爽涼拌料理。 |
紅蘿蔔泡菜 | ₩5,000 | 紅蘿蔔絲加上hidden hour秘製魚露醬汁，酸甜開胃。 |
※葡萄酒請到時候喺現場揀。
廣藏市場「hidden hour」退款政策
| 預約後至到訪3日前取消 | 全額退款 |
| 到訪2日前取消 | 不設退款 |
廣藏市場「hidden hour」注意事項
- 請最少喺3日前完成預約。
- 每枱最少要叫一支葡萄酒（現場付款）。
- 如希望加購其他餐點，請喺現場支付所需金額。
- 預約時請確保已選擇正確日期及時間。
- 如果遲到超過10分鐘，預約將自動被取消，屆時將不設退款。
- 嚴禁攜帶外來食物及飲品。
- 如果想更改預約，或者有任何問題，請send email到help@creatrip.com查詢。
廣藏市場「hidden hour」預約流程
| STEP 1. | 撳我預約 |
| STEP 2. | 請填寫所有相關資訊，我哋會喺1-2個工作天內確認預約。 |
| STEP 3. | 當日請準時到達，向職員出示預約記錄。 |
| STEP 4. | Enjoy！ |
廣藏市場「hidden hour」介紹
今日小編帶大家嚟到位於廣藏市場嘅「hidden hour」！呢間Rooftop Wine Bar隱身喺人山人海嘅廣藏市場某個角落入面，齋睇地圖搵可能會比較難搵到，大家可以參考下面嘅前往方法，咁就唔怕會盪失路啦！
喺門口就已經可以見到有一個紅酒陳列櫃，同樓下廣藏市場嘅氣氛差好遠！
入到去首先會見到有張大枱，行上樓梯就會見到有更加private嘅空間同座位。
呢款「1905」係「hidden hour」嘅代表紅酒，同廣藏市場嘅建立年份相近，非常有意義。
因為呢度係一間Wine Bar，所以餐廳規定每枱都最少要叫一支葡萄酒，大家可以參考呢張Menu。
同一層嘅室外有一個吸煙區，有需要嘅朋友可以出去食煙！亦都因為有個單獨吸煙區，所以室內完全唔會烏煙瘴氣~
小編跟住就上咗5樓天枱參觀！沿途仲有一個室內area，入面有幾張枱，大家可以一邊欣賞窗外風景，一邊享受美食！
天台上面有一張大枱同4張2~4人枱，建議大家夏天嘅時候可以夜晚嚟，成個mood超正！
天台最右邊有一個寫住「hidden hour」嘅招牌，夜晚著燈之後嘅感覺好唔同！
望出出面大家可以見到廣藏市場，因為四周圍嘅建築物都唔高，所以可以欣賞到一覽無遺嘅景色。
4樓同5樓之間仲有一個photo zone，見到有鏡點可以唔對鏡自拍啊！
嘢食終於上齊啦！呢度嘅嘢食大部分都係韓式fusion菜，用西式烹調方法去煮各種韓國特色料理，而且全部都同葡萄酒好夾！
「hidden原條牛仔骨」因為經過長時間燉煮，所以啲肉好腍，建議大家配埋下面creamy嘅醬汁中和返，唔會太鹹。
呢款係「牛肉辣椒醬拌麵」，辣椒醬入面加入免治牛肉，加埋清爽嘅青瓜同濃郁嘅蛋黃，真係好match！
「醬油烤雞」雖然係烤雞，不過外面有一層脆皮，而且好入味，記住要加埋下面嘅黃芥末醬一齊食啊！
「檸檬涼拌鮮蝦」同「紅蘿蔔泡菜」嘅口味比較清新，有時候飲紅酒會覺得個口澀澀地，呢個時候食呢兩款嘢食就啱曬啦！
而今日小編最鍾意嘅就係呢個「醬油豬肉炒麵」啦！醬油同葱嘅香味濃郁，配埋生洋葱食更加可以解膩同中和返個鹹味，味道一流！而且冇諗過原來同葡萄酒都幾夾吓~
最後呢款「辣椒生牛肉」，大家可能會怕佢辣，不過因為辣椒用火燒過，所以甜味會更加突出，配埋清新嘅生牛肉真係好正~
呢度每款嘢食嘅量唔多，可以叫多幾款同朋友share，而且menu上面每款嘢食隔離都會有推薦嘅葡萄酒，大家可以參考！好多韓國人一開始都唔知道原來廣藏市場有一間咁有mood嘅Rooftop Wine Bar，大家下次無論係同朋友嚟旅行，定同韓國朋友見面，小編都好推薦大家嚟呢度！
廣藏市場「hidden hour」前往方法
喺鍾路5街站（종로5가역）7號出口出。
直行。
大約行2分鐘之後會見到有一個轉彎位，喺呢度轉右。
直行。
見到市場入口之後轉右行入去。
行大約20米。
你會見到「hidden hour」嘅招牌喺你右手邊。
上到4樓就到啦！
以上係廣藏市場「hidden hour」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
