Hello，大家好，我哋係由韓國人每日提供最新韓國旅行資訊嘅Creatrip。
天氣好嘅時候梗係要同朋友去野餐啦！如果要去野餐，韓國人最經常去嘅地方一定係漢江，因為仲可以去踩單車同食漢江公仔麵啊嘛~ 今日小編就打算介紹一間可以租野餐用品嘅鋪頭「Healing Tent」俾大家，下次嚟韓國旅行不妨可以去一轉！
撳我睇價錢&預約詳情👇🏻
[스팟] Healing Tent（纛島店）
「Healing Tent（纛島店）」資訊
- 地址：서울 광진구 능동로 25
- 營業時間：11:00 - 23:00（落雨嘅話可能會休息）
「Healing Tent（纛島店）」介紹
陽光普照、天氣好嘅時候梗係要把握機會去漢江野餐啦！今日小編要介紹嘅呢間「Healing Tent」係野餐用品租借專門店，當中纛島分店位於纛島遊園地站附近，交通夠方便！
入到去會有一個好nice嘅職員喺度歡迎大家。
鋪頭入面有好多露營/野餐用品，只要喺現場加錢就可以一次過租埋！
小編最滿意同驚喜嘅係呢度有得租尿袋（行動電源）！因為漢江公園唔會有插頭，手機冇電嘅話有時候真係唔知點算好，不過有尿袋就可以解決呢個問題啦！幾乎所有手機型號都適用，大家有需要嘅話記住租返個傍身啦~
職員會幫大家將野餐同露營用品放落呢架車仔度，大家可以直接拉車仔，唔洗雙手捧住咁多嘢。
去漢江公園嘅方法都好簡單，只要調頭行返嚟嗰陣嗰條路，去返纛島遊園地站1號出口，然後穿過條隧道就到！
穿過隧道之後你會見到2號外賣領取區，大家如果要叫外賣，記住要寫埋領取區號碼，方便到時候攞外賣！
如果大家要露營，記住一定要去指定區域啊（如果唔係會罰錢）！大家只要向左邊行就會去到可以用帳篷嘅area~
聽老闆講好多韓國人都會好似小編咁揀租帳篷，就好似去咗露營咁~
帳篷亦都比想像中大，同時幾個人瞓入去都冇問題！
只不過係將所有用品擺埋一齊就已經好IG-able，配埋後面個漢江景真係一流，記住要影返幾輯靚相打卡啦！
而嘢食方面，好似頭先所講，大家可以叫外賣或者去漢江之前先買定，望住漢江食真係零舍好味~
如果係預約「沙灘遮Set」就可以同時租到帳篷同沙灘遮，咁就唔怕曬啦！
天氣好嘅話真係點影都咁靚！下次嚟韓國旅行，不妨同家人、朋友、另一半一齊去「Healing Tent」租返套野餐用品，喺漢江享受悠哉遊哉嘅時間啦~
「Healing Tent（纛島店）」前往方法
喺纛島遊園地站（뚝섬유원지역）1號出口出。
左邊會有一條斑馬線，喺呢度過馬路。
直行大約200米就會見到「Healing Tent」喺你嘅左邊。
撳我預約👇🏻
[스팟] Healing Tent（纛島店）
以上係漢江野餐用品「Healing Tent（纛島店）」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
