KPOP購物指南 | 首爾專輯&偶像週邊專門店推薦（2026最新版）
去首爾邊度買 K-pop 專輯、小卡同官方周邊？呢篇整理明洞、弘大、首爾林等熱門購物區，附店舖推薦、預算同實用貼士。
- 韓國專輯同週邊專門店有邊幾種？
- 想買唔同類型嘅KPOP產品，首爾邊區最啱你？
- 首爾邊度可以買到專輯同官方週邊？
- 首爾邊度可以買到小卡、卡套同粉絲自製周邊？3
- 首爾邊度有偶像Pop-up快閃活動空間？
- 點樣可以搵到偶像Pop-up快閃活動資訊？
- 想喺韓國買偶像專輯/週邊要預幾多錢？
- 韓國KPOP專輯及週邊常見問題FAQ
Hello，大家好，我哋係由韓國人每日提供最新韓國旅行資訊嘅Creatrip。
唔知大家平時去韓國旅行，通常係為咗咩呢？除咗觀光同美食之外，相信都有唔少人係為咗自己鍾意嘅K-POP偶像演唱會或者活動而專程飛去韓國。
小編自己之所以會選擇住喺韓國，唔單止係想體驗韓國工作同生活文化，另一個好大嘅原因係追星都會比較容易！身為一個自稱資深嘅KPOP Fans，呢幾年嚟都有去過首爾各大偶像專輯同週邊專門店，今日就等小編按照個人經驗同2026年最新資訊幫大家整理出首爾各地區嘅買週邊好去處，下次飛韓國嘅時候記住要去朝聖啦！
首爾KPOP專輯&週邊專門店推薦
韓國專輯同週邊專門店有邊幾種？
想去韓國買同偶像相關產品之前，要知道其實韓國有好多種KPOP商品專門店！大致可以分為專輯鋪、官方週邊店、小卡店、粉絲周邊店同各種Pop-up快閃活動空間。
專輯店主要賣未拆新碟，回歸期間貨量一般會較多，部分店舖亦會附送活動贈品；官方週邊店就以應援棒、經紀公司推出嘅官方週邊商品同藝人品牌商品為主。韓國另外仲有粉絲自己開嘅週邊精品店，主要會賣卡套、卡冊、公仔衫（娃衣）同鎖匙扣等粉絲小物，適合想慢慢揀週邊配件嘅朋友們去。
而小卡店顧名思義就係只會買各大團體小卡嘅專門店，適合想收藏小卡、買指定成員或特定小卡嘅朋友們去不過留意價格及卡況差異可能會比較大；至於Pop-up快閃活動空間通常都會係經紀公司趁團體回歸，推出新專輯嘅時候擺設嘅期間限定空間，不過出發前最好先確認最新活動日期及相關安排，如果唔係有可能會撲空！
💡追星小編小貼士：揀去咩地區之前，建議先諗清楚自己想買咩，根據自己需要再揀去邊度掃貨！
想買唔同類型嘅KPOP產品，首爾邊區最啱你？
嚟韓國時間有限，但又想善用所有時間買齊想要嘅KPOP商品，不妨可以參考下面呢個懶人包比較表，睇下邊一區嘅KPOP專門店最符合你嘅需求啦！
地區 | 最適合 | 推薦原因 | 注意事項 |
明洞、東大門 | 專輯、官方週邊 | 地點方便、對遊客友善，可以一次過行幾間鋪頭更方便 | 比較商業化 |
弘大 | 應援小卡、毛公仔、卡套、粉絲自製週邊 | 最有追星氣氛，行下沿街小店好易有驚喜 | 店鋪比較分散，有啲係樓上或者比較隱蔽 |
COEX、江南、蠶室 | Pop-up、商場購物 | 室內夠舒服、可以喺去演唱會場地前行 | 除非有指定舖頭想行或者有活動，如果唔係唔值得專程去 |
仁寺洞、鐘路 | Pop-up、觀光 | 易於配合傳統首爾一日遊行程 | 值唔值得去好睇當期有冇活動 |
首爾林 | SM偶像官方商品 | 公司大樓就喺呢度，SM Fans必去 | 如果你唔追SM藝人未必啱你 |
龍山、汝矣島 | HYBE旗下偶像官方商品 | HYBE Fans必去 | 如果你唔追HYBE藝人未必啱你 |
💡小編小貼士：睇埋下面介紹，睇下你想去嘅鋪頭位於邊一區，安排行程更方便！
首爾邊度可以買到專輯同官方週邊？
1. 首爾林 | KWANGYA@SEOUL(광야@서울)
- 地址：서울 성동구 왕십리로 83-21 B1F
- 營業時間: 10:30-20:00
- 前往方法：首爾林站（서울숲역）5號出口
[이미지 슬라이더] 
如果你係SM嘅粉絲，就一定唔可以錯過KWANGYA@SEOUL！呢間官方週邊店位於SM公司大樓入面，同首爾林站直通，交通非常方便。
對於追開東方神起、Super Junior、SHINee、EXO、Red Velvet、NCT、aespa、RIIZE同NCT WISH嘅人嚟講，呢度真係可以話係必去朝聖地。店內有齊各個SM旗下藝人嘅官方週邊同專輯，就算淨係為咗影幾張打卡紀念相，都已經好值得專程去。
💡追星小編小貼士：去KWANGYA@SEOUL仲可以影到得呢度先影到嘅人生四格特別相框，記住去影返張到此一遊相啦！
2. 仁寺洞 | the SameE(더세임)
- 地址：서울 종로구 인사동길 49 3F
- 營業時間：10:30-20:00
- 前往方法：安國站（안국역）6號出口
另一個好多人都鍾意嘅韓國大型經紀公司YG都有推出官方週邊店，鋪面位於「你好仁寺洞（안녕인사동）」大樓入面，前身叫做YG PLACE。除咗普通專輯、應援棒之外，仲有賣得呢度先有嘅YG家族週邊同專輯，如果你係 BIGBANG、BLACKPINK、TREASURE、BABYMONSTER，或者其他YG旗下藝人嘅粉絲記住一定要去行下！
3. 仁寺洞 | KTOWN4U(케이타운포유 인사)
- 地址：서울 종로구 인사동길 49 3F
- 營業時間：12:00-20:00
- 前往方法：安國站（안국역）6號出口
KTOWN4U係一間首爾專輯專賣店，同the SameE一樣都係位於「你好仁寺洞（안녕인사동）」大樓。KTOWN4U係偶像回歸期間舉辦快閃活動同抽獎嘅地點之一。如果你夠好彩，仲有機會喺活動期間見到偶像親身到場！
如果你本身都有計劃去行仁寺洞感受韓國傳統氣氛，順路過嚟都好方便。
4. 龍山 | HYBE(하이브)
- 地址：서울 용산구 한강대로 42 1F
- 營業時間：10:30-20:00
- 前往方法：新龍山站（신용산역）2號出口
HYBE
HYBE由今年3月起，正式將總部1樓打造成期間限定嘅快閃空間，俾粉絲去參觀同買嘢！
第一組藝人就係BTS，為咗紀念 《Arirang》回歸，快閃店會喺龍山HYBE總部1樓大堂開放至4月12號，去到現場唔單止可以睇到專輯展覽，仲可以直接買官方周邊。
💡追星小編小貼士：呢個快閃空間必須事先透過Weverse預約先可以入場，而且每一期藝人都可能唔同，去之前最好先確認目前係邊位明星嘅Pop-up，同仲有冇位，避免出現撲空情況。
5. 明洞/弘大/蠶室 | WITHMUU(위드뮤)
明洞店
- 地址：서울 중구 명동7길 16
- 營業時間：11:00-21:00
- 前往方法：乙支路入口站（을지로입구역）6號出口
AK PLAZA 弘大店
- 地址：서울 마포구 양화로 188 AK PLAZA 2F
- 營業時間：
- 星期一至五 11:00–22:00
- 星期六及日 10:30–22:00
- 前往方法：弘大入口站（홍대입구역）4號出口
蠶室樂天店
- 地址：서울 송파구 올림픽로 240 B1F
- 營業時間：10:00-21:00
- 前往方法：蠶室站（잠실역）3號出口
[이미지 슬라이더] 
WITHMUU係其中一個KPOP追星族必知嘅專輯店，佢哋嚟首爾主要地區都有分店，而最多人去嘅分店係今日要介紹嘅明洞店、AK PLAZA弘大店同蠶室樂天店。
WITHMUU明洞店位於明洞主街，可以話係遊客最容易搵到、亦最容易行嘅K-POP週邊店之一。店內有唔少專輯同官方週邊商品，如果你本身已經喺明洞行街、購物或者觀光，順路過去就非常方便。
[이미지 슬라이더] 
而相信好多KPOP Fans都去過嘅WITHMUU弘大店，位於弘大入口站4號出口AK Plaza，同樣有齊好多唔同藝人嘅官方週邊同專輯，選擇夠多，如果你想一次過睇多幾個團，又唔想逐間細舖慢慢搵，呢度就特別適合你。
小編自己之前想買官方應援棒嘅時候都係去WHTHMUU弘大店，因為存貨夠多，而且好多團都有，所以行起上嚟會更加方便同舒服，呢度亦都係小編自己買專輯嘅首選店鋪。
[이미지 슬라이더] 
至於WITHMUU蠶室分店喺2025年新開幕，位於蠶室站附近、連接樂天世界嘅地下商街入面。商品方面都非常齊全，如果你本身打算去樂天世界，或者住喺蠶室一帶，就會更方便順路。
💡追星小編小貼士：WITHMUU會定期舉辦幸運抽獎活動，尤其係遇到藝人回歸期嘅時候更加常見，特別係弘大店經常都會有，去之前不妨先睇下官方社交平台有冇最新消息！
6. 明洞 | MusicKorea明洞2號店(뮤직코리아)
- 地址：서울 중구 퇴계로 134
- 營業時間：10:00-22:00
- 前往方法：明洞站（명동역）2號出口
明洞站2號出口一出，大型Daiso隔離就有一間叫MusicKorea嘅鋪頭，位置都好易搵。呢間唱片行專輯選擇多，一直都好受海外遊客歡迎。雖然以前喺6號出口Nature Republic入面嗰間旗艦店已經冇咗，但而家呢間分店依然照常營業，有興趣嘅話記住唔好去錯地方！
7. 明洞 | C.T.Record(씨티레코드)
- 地址：서울 중구 퇴계로 124 E-1, 2
- 營業時間：10:00-22:00
- 前往方法：明洞站（명동역）2、4、5、6、7號出口方向
相信有去過明洞，或者有經過過明洞站嘅朋友們都一定見過呢間專輯鋪！C.T.Record位於明洞站地下商街，雖然鋪面唔大，但就放滿曬韓國偶像專輯，價錢都算親民實惠。
💡追星小編小貼士：除咗呢度，其實成個明洞站地下街仲有幾間賣偶像專輯嘅平價鋪頭，如果你想搵特定專輯，或者想格下價，建議大家可以慢慢行一圈！
8. 弘大 | BEATROAD(비트로드)
- 地址：서울 마포구 잔다리로6길 35 3F
- 營業時間：11:00-22:00
- 前往方法：弘大入口站（홍대입구역）9號出口
弘大專輯店BEATROAD嘅專輯選擇好多，最正係呢度仲有個幾闊落嘅Cafe，買完可以即場坐低拆專輯。加上回歸期成日都有活動，好多歌手都會親臨現場！如果想舒舒服服揀專輯、慢慢行，推薦大家可以去BEATROAD。
💡追星小編小貼士：小編自己通常都會先去弘大其他地方行，中途再嚟呢度買專輯同坐低，一邊休息、一邊拆專輯同戰利品！
9. 弘大 | MUSICPLANT(뮤직플랜트)
- 地址：서울 마포구 어울마당로 140 3F
- 營業時間：11:00-22:00
- 前往方法：弘大入口站（홍대입구역）8號出口
Music Plant 都係一間幾值得去嘅專輯店，新推出嘅專輯同之前嘅舊款都搵到，選擇算幾平均。加上佢哋本身都幾出名會搞抽獎同專輯開箱活動，本地粉絲都成日去！如果你係回歸期去，不妨先留意下當時有冇特別活動。
10. 永登浦 | Soundwave Times Square店(사운드웨이브 타임스퀘어점)
- 地址：서울 영등포구 영중로 15 B1F
- 營業時間：10:30-22:00
- 前往方法：永登浦站（영등포역）6號出口
(X @soundwave_TS)
本身喺樂天百貨公司嘅Soundwave而家搬咗去永登浦站附近嘅Times Square。呢度新碟上架都幾快，仲成日有幸運抽獎同簽，所以有機會攞到額外應援小卡同預購特典。如果你本身會去汝矣島或者永登浦附近，都值得去行一轉！
首爾邊度可以買到小卡、卡套同粉絲自製周邊？
1. 弘大/明洞 | POCA SPOT(포카스팟)
弘大店
- 地址：서울 마포구 와우산로29길 48-14 2-3F
- 營業時間：11:00-21:00
- 前往方法：弘大入口站（홍대입구역）7號出口
明洞店
- 地址：서울 중구 명동8나길 33 1-3F
- 營業時間：10:30-22:30
- 前往方法：明洞站（명동역）5號出口
[이미지 슬라이더] 
想搵緊特定嘅偶像小卡，但又唔可以好似韓國人咁直接交易同郵寄，咁非常推薦大家去弘大同明洞都有分店嘅偶像小卡專門店POCA SPOT！
呢度有齊唔同人氣團體嘅小卡，甚至連稀有版小卡都有。唔需要買專輯抽，可以直接用平板電腦落單（有中文、英文、日文同西班牙文可以揀），更加唔洗另外等郵寄或者俾運費，早去嘅話仲可以即日攞！而且仲有各種卡套同裝飾小卡嘅配件，如果你自己本身鍾意儲小卡，真係好容易喺度洗超多錢XD
[이미지 슬라이더] 
POCA SPOT明洞店營業時間更長，而且有大量人氣偶像同罕有的應援小卡，如果唔會出到去弘大嘅話推薦嚟呢度。另外大家仲可以透過Creatrip買盲袋小卡，一包入面有你揀嘅男團/女團嘅小卡，而且仲唔會重覆！而且所有透過Creatrip預約嘅客人都可以得到一張95折優惠券，填寫評論仲會隨機送多張卡，記住唔好錯過！
[스팟] KPOP小卡專門店 | POCA SPOT（弘大）
[스팟] KPOP小卡專門店 | POCA SPOT（明洞）
2. 弘大 | pocaboo(포카부)
- 地址：서울 마포구 와우산로29나길 26 103호
- 營業時間：11:00-22:00
- 前往方法：弘大入口站（홍대입구역）7號出口
如果想特別啲，推薦大家可以去弘大pocaboo自動販賣機抽小卡。揀好想抽邊個團，入錢之後就會隨機出一張卡。價錢唔貴、夠好玩，而且老實講真係幾易上癮。你有機會抽到稀有款，但都有可能又抽中自己已經有三張嘅成員卡，就同去扭蛋一樣！
3. 弘大 | DUCKY WORLD(더키월드)
- 地址：서울 마포구 와우산로29길 60
- 營業時間：10:00-23:00
- 前往方法：弘大入口站（홍대입구역）7號出口
弘大DUCKY WORLD係好多追星族都一定去過嘅平價小卡套天堂，成間鋪有啲似專做大量掃貨嘅倉庫型店，想一次過掃貨會買得好開心。而且搬咗新舖之後，款式仲多咗、價錢都真係幾平。如果你係會儲好多卡套、收藏冊嘅話，小編推薦你必去！
4. 弘大 | Archive(악하입으)
- 地址：서울 마포구 와우산로29라길 22
- 營業時間：星期一、二、四至日 11:00-21:00
- 前往方法：弘大入口站（홍대입구역）8號出口
Archive位於弘大生日Cafe區附近，好啱想用比較平嘅價錢買啲細細件粉絲周邊嘅人。小編上次去睇，呢度嘅小卡套一個大概都係₩4,000(4000)左右，另外仲有公仔衫、鎖匙扣同其他小配件，價錢都算幾實惠。
💡追星小編小貼士：如果你今次行程會包括上面介紹嘅小卡專門店POCA SPOT，可以順便去買埋小卡套，一次過行更方便！
5. 弘大 | my jam(마이잼)
- 地址：서울 마포구 와우산로27길 26
- 營業時間：24小時、全年無休
- 前往方法：弘大入口站（홍대입구역）7號出口
my jam就喺頭先介紹嘅Archive附近，係一間24小時營業嘅無人週邊販賣店，專賣可愛小卡套同鎖匙扣。如果你日頭有其他行程，或者突然急需買小卡套，都可以隨時去行同掃貨。
小編自己都係個I人，唔太鍾意太多人、會俾人望住咁揀，或者店員突然嚟同我講嘢都會覺得好大壓力，所以每次去my jam都可以好舒服咁慢慢行！
6. 弘大 | Sopum Gongjang(소품공장)
- 地址：서울 마포구 와우산로21길 19-8 4F
- 營業時間：12:00-21:00
- 前往方法：弘大入口站（홍대입구역）9號出口
小編身邊有一個同為追星族嘅朋友，而佢比起小卡，更加鍾意收集各種偶像公仔。上次跟咗去弘大呢間「Sopum Gongjang」，入面有好多公仔，同埋各種好可愛嘅娃衣(公仔衫)，就算未必打算買，入去望下都會覺得幾療癒。
如果你都有一個鍾意嘅偶像嘅公仔，想幫佢襯衫打扮下，非常推薦大家去！
7. 弘大 | Idolllook(아이돌룩)
- 地址：서울 마포구 홍익로6길 74
- 營業時間：13:00-20:00
- 前往方法：弘大入口站（홍대입구역）8號出口
Idolllook都係一間主打偶像公仔嘅鋪頭，佢哋比較出名係賣啲比較少見公仔嘅配件同娃衣(公仔衫)。因為選擇夠多，所以如果你平時好鍾意幫公仔換衫、襯造型，小編會建議你就算要兜少少路都要抽時間去望望！
8. 明洞 | OREN
- 地址：서울 중구 명동4길 13
- 營業時間：11:00-23:00
- 前往方法：明洞站（명동역）6號出口
OREN位於明洞最熱鬧嘅街道正中間，係一間可以用自己最鍾意嘅偶像相片，自訂製作T恤、帆布袋、應援扇等，打造只屬於你自己嘅專屬物品！而家下載Creatrip優惠券就可以享用全單9折優惠，仲可以免費得到一張小卡，記住唔好錯過！
💡追星小編小貼士：唔一定要用明星相，就算你唔係KPOP Fans都可以用同家人朋友、寵物影嘅相去整，夠曬獨一無二！
[景點] 明洞 K-pop Goods Shop | OREN
9. 明洞/東大門 | K-MECCA(케이메카)
明洞總店
- 地址：서울 중구 명동8나길 5
- 營業時間：10:00-23:00
- 前往方法：明洞站（명동역）6號出口
東大門店
- 地址：서울 중구 장충단로13길 20 2F
- 營業時間：
- 星期一至四 10:30-21:00
- 星期五至日 10:30-21:30
- 前往方法：
- 東大門站（동대문역）8號出口
- 東大門歷史文化公園站（동대문역사문화공원역）14號出口
[이미지 슬라이더] 
如果今次飛韓國想幫喺香港嘅KPOP Fans朋友們買手信，小編推薦大家去明洞同東大門都有分店嘅K-MECCA，無論係鎖匙扣、貼紙、海報同精品都有。同場亦都會賣偶像應援棒同人氣團體專輯，不過選擇就會少過正式專輯店。
K-MECCA明洞店位於6號出口附近，推薦大家如果會安排時間去明洞行街，可以順便去望一望，可能會發掘到唔少可愛吊飾可以買返去送俾人。小編自己之前就喺度買過Idol襟章送俾身邊朋友，反應好好！
[이미지 슬라이더] 
而東大門店就位於現代Outlet入面，同樣都有賣專輯同各種週邊商品，不過規模就細過明洞店。如果大家想喺東大門買到偶像相關產品，去行outlet shopping嘅時候可以去參觀下。
首爾邊度有偶像Pop-up快閃活動空間？
1. 汝矣島 | THE HYUNDAI SEOUL(더현대 서울)
- 地址：서울 영등포구 여의대로 108
- 營業時間：
- 星期一至四 10:30–20:00
- 星期五至日 10:30–20:30
講起THE HYUNDAI SEOUL大家可能只會覺得佢係一個大型商場或者百貨公司，但其實呢度成日都會舉辦偶像Pop-up活動，通常都會B2/F設置各種攤位同展覽！大家去之前記住睇清楚佢哋嘅活動時間表，亦都可以參考自己鍾意嗰團偶像嘅官方賬號，睇下會唔會咁啱你嚟玩嘅時候搞活動。
💡追星小編小貼士：如果你今次行程係aim住齋睇追星嘢，唔會另外去買其他嘢或者shopping，咁小編就覺得除非THE HYUNDAL SEOUL有搞Pop-up活動，如果唔係其實唔需要專登過嚟，因為呢度冇其他KPOP專門店！
[블로그] The Hyundai Seoul總整理/行街攻略
2. 東大門 | WHOSFAN CAFE東大門店(후즈팬 카페)
- 地址：서울 중구 을지로 264 지하 1층
- 營業時間：10:30-21:00
- 前往方法：東大門歷史文化公園站（동대문역사문화공원역）11號出口
(X @WhosfanCafe)
東大門「dundun」B1/F有一間明星主題Cafe「WHOSFAN CAFE」，每逢有歌手回歸呢度就會轉一次主題，除咗可以坐低飲嘢同睇相關擺設，呢度仲有一部人生四格相機，相框亦都會定期更新，大家可以間接同明星合照XD
3. 新村 | Everline Music & Cafe(에버라인 뮤직&카페)
- 地址：서울 서대문구 신촌역로 29
- 營業時間：10:00-20:00
- 前往方法：梨大站（이대역）6號出口
Everline Music & Cafe位於新村，樓下可以買偶像週邊，2樓就有Cafe位，行到攰可以上去坐下。如果撞正做緊 Pop-up，店內一般都會有啲展示同主題裝飾，感覺會更加好行。
💡追星小編小貼士：大家會見到Naver Map叫你喺新村站落再行過去，但因為地圖上面所講嘅新村站係京義中央線（大家平時好少會搭嘅地鐵線），同2號線係完全另一個站嚟，所以建議大家喺梨大站落車行過去！
點樣可以搵到偶像Pop-up快閃活動資訊？
對追星族，特別係唔識韓文嘅朋友們嚟講，偶像Pop-up快閃活動係一個都幾令人頭痕嘅行程之一。有時候間鋪可能仲喺度，但你喺社交平台見到嗰個活動可能早就完咗；或者就算分店仲有開，你想要嘅限定週邊、抽獎活動都未必仲有。
所以，如果你係特登為某個Pop-up快閃活動去安排行程，千祈唔好淨係睇舊blog截圖就當真。去之前，最好先 check清楚以下幾樣官方 Instagram / X、商場活動頁、品牌或店舖嘅預約頁面、同一月份嘅相關分享文章。
想喺韓國買偶像專輯/週邊要預幾多錢？
細細件嘅週邊商品一件睇落好似唔貴，但一路買一路加埋，條數都可以升得好快。小卡就更加係咁，可能前一秒你仲覺得價錢合理，買多幾張就可能會覺得自己好似超出咗預算。
所以為咗幫各位KPOP Fans控制預算，小編根據真實經驗同官網資訊整理咗各種偶像週邊嘅平均價錢，大家計budget嘅時候可以參考下：
商品 | 平均價錢 | 備註 |
官方專輯 | ₩15,000-30,000 (15000-30000) | 視版本、發售週期同舖頭而定 |
特別/限量版專輯 | ₩30,000-50,000+ (30000-50000+) | 根據包裝或活動聯乘可能會貴好多 |
官方應援棒 | ₩45,000-65,000+ (45000-65000+) | 買之前記得確認型號/版本 |
應援小卡套/套頁/活頁簿配件 | ₩5,000-10,000 (5000-10000) | / |
娃衣(公仔衫)/配飾 | ₩5,000-20,000 (5000-20000) | 視細節同小眾需求而定 |
稀有偶像小卡(1張) | 價錢差異好大 | 小卡狀態、成員、時期同需求會大幅影響價錢 |
※2026年4月價錢，實際價格會因回歸期、團體人氣、活動庫存同店鋪類型而有所不同。
💡追星小編小貼士：偶像專輯同應援棒其實喺香港預購就得，或者推薦大家去官方經紀公司直營店買，價錢會比較平。而喺韓國就建議主要買返啲喺屋企冇嘅專輯同官方週邊，或者揀啲平價嘅相卡套同公仔衫，咁樣可以慳返唔少錢！
韓國KPOP專輯及週邊常見問題FAQ
Q1. 如果我得一個下晝嘅時間，去邊個地區行會最有效率？
A：弘大。弘大有齊專輯店、粉絲自製週邊店、小卡專門店同小卡配件店，而且大部分都係位於弘大入口7、8號出口附近，可以一次過行曬更加方便！
Q2. 想買官方週邊應該去邊度？
A：想買一般官方週邊，可以先去大型嘅WITHMUU或者KTOWN4U分店。想買某個經紀公司限定嘅官方週邊，就要去 KWANGYA@SEOUL買SM週邊，或者去The SameE買YG週邊。
Q3. 邊區最啱搵應援小卡同粉絲自製周邊？
A：弘大係更好嘅選擇，行應援小卡、卡套、毛公仔配件同細件週邊會比較多。
Q4. 外國人可唔可以參加抽獎或者買活動商品？
A：原則上可以，但要視乎活動規則、時間、庫存同平台而定，記得先睇返當日活動公告。
Q5. 偶像週邊店需唔需要提早預約入場？
A：一般店店鋪買嘢通常唔使，但如果係Pop-up、推廣活動或者要預約先有折扣嘅店鋪，就要事先睇清楚相關規定。
Q6. 韓國偶像商品預算應該要計幾多錢？
A：如果會買幾張專輯同啲細件週邊，預算大概係₩100,000-150,000（100000-150000），；如果打算買埋應援棒或者人氣小卡，就要再準備多啲錢。
Q7. 喺首爾買唔買到官方應援棒？
A：可以，通常喺以週邊為主嘅鋪頭，同埋部分官方或經紀公司相關嘅舖頭會有。但官方應援棒有時係限時限量發售，受歡迎嘅團體應援棒又會好快賣曬。
Q8. 偶像週邊專門店可唔可以用中文或者英文溝通？
A：通常遊客多嘅地區，例如明洞同弘大可能可以用簡單中文/英文溝通，不過通常商品分類夠直觀，就算溝通唔到都唔會影響到購買體驗。如果有特別想買嘅商品，可以事先準備定相關嘅相，到時候show俾店員睇。
Q9. 去買偶像週邊可唔可以退稅？
A：如果係官方週邊或者遊客區唱片行可能會提供，但普通粉絲自製週邊店、小卡店就通常都唔會提供退稅服務，建議向現場職員查詢。
追星小編推薦KPOP活動
[景點] [限時 40% 折扣] BTS WORLD TOUR 'ARIRANG' | 來回接駁往 Goyang Sports Complex 演唱會（由 Seoul 出發）+ 行李寄存服務
[Spot] Galaxy Ultra Rental | Snapshoot 弘大 Branch
[景點] SBS 人氣歌謠 入場門票 + Seoul 半日遊
[景點] KPOP ARCADE Seongsu | The First K-POP Experience Space · Idol Debut Experience
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
