北村美食 | 溫6.5
連GD、BTS、LE SSERAFIM都去過嘅北村超hit餐廳！用泡菜做主題嘅Dining Bar你又去過未？
Hello，大家好，我哋係由韓國人每日提供最新韓國旅行資訊嘅Creatrip。
最近韓國越嚟越多可以同時享用美酒佳餚嘅Dining Bar，今日要介紹俾大家嘅呢間韓式Dining Bar「溫6.5」位於北村，連GD、BTS同LE SSERAFIM都有去過！而家就跟住小編一齊去睇吓點解會咁受歡迎啦！
北村「溫6.5」資訊
- 地址：서울 종로구 북촌로1길 28
- 營業時間：星期一至五 17:30 - 23:00、星期六及日&公眾假期 15:00 - 23:00（Last Order 22:00）
- 可預約時間：
星期一至五 | 17:30、18:00、18:30、 20:00、20:30、21:00 |
星期六、日、公眾假期 | 15:00、17:00、19:00、21:00 |
北村「溫6.5」推薦原因
- 以泡菜為主要食材，以傳統同現代方式炮製優質餐點！
- BTS RM、Jimin、GD、太陽、LE SSERAFIM等韓星都有嚟過！
- 位於安國站附近，食飯前可以去著韓服行景福宮，食完亦都可以去附近嘅靚靚Cafe嘆！
北村「溫6.5」價錢
| 成人（1人） | ₩33,000 （溫6.5訂金 ₩30,000 + Creatrip手續費 ₩3,000） |
北村「溫6.5」退款政策
| 預約後至到訪3日前取消 | 全額退款 |
| 到訪2日前取消 | 不設退款 |
北村「溫6.5」注意事項
- 預約名額先到先得，所以有可能會預約唔到你想要嘅時間段。
- 因為餐廳本身每個月15號會開放下一個月嘅預約（例：7月15號開放8月預約），所以如果你喺15號前事先透過我哋預約，你嘅預約唔會即刻成立，負責嘅同事會喺15號之後按順序通知大家預約結果。
- 價錢包括「溫6.5」訂金（₩30,000）同Creatrip手續費（₩3,000），食完飯之後將會收取扣除訂金後餘下金額。
- 每枱最少要叫1支酒類飲品，所以只接受19歲或以上人士到訪。
- 飲剩嘅酒可以帶走，有需要嘅話同職員講就可以。
- 酒類飲品Menu每3個月會轉一次，blog入面嘅相關內容只供參考。
- 星期六及日&公眾假期限時2小時用餐。
- 如遲到10分鐘或以上，預約將自動取消，訂金亦不設退還。
- 可預約1~4人，如果需要預約5人或以上，請先send email去help@creatrip.com查詢。
- 如果想更改預約，或有任何疑問，請send email到help@creatrip.com查詢。
- 請按照到訪人數進行預約。
- 一人可預約2個（含）以上項目。
北村「溫6.5」預約流程
| STEP 1. | 撳我預約 |
| STEP 2. | 請詳細輸入所有相關資訊，我哋會喺1~2個工作天內確認預約。 |
| STEP 3. | 體驗當日請準時到達，向職員出示預約記錄。 |
| STEP 4. | Enjoy！ |
北村「溫6.5」介紹
今日小編帶大家嚟到位於安國站嘅「溫6.5」！講個冷知識俾大家聽，原來6.5度係發酵泡菜嘅最佳溫度~ 呢間Dining Bar秉持住為各位客人提供最好食嘅泡菜料理嘅信念，所以就改咗呢個名啦！
呢度就好似一個體驗泡菜文化嘅複合文化空間咁，提供各式各樣嘅泡菜，大家有冇諗過原來羅勒同芫荽都可以用嚟整泡菜呢！
之前GD同Nike合作搞咗個Event，當時嘅Dinner就係喺呢度食㗎啦！當日太陽、BTS RM同Jimin、LE SSERAFIM Kazuha同許允眞，仲有孫娜恩都有出席，聽講全部人都食到非常滿足！
小編去嘅時候係預約咗星期日下晝3點，入面已經有好多人啦！餐廳外觀就好似一間畫廊咁，一入到去就會見到韓屋風嘅裝修，充滿韓國傳統感覺！
因為小編當日係日頭去，所以餐廳睇落比較光。不過呢度星期一至五只會做晚市，聽之前嚟過嘅朋友講話會更加有mood！
而家就跟住小編一齊去參觀吓間餐廳啦！大部份人嚟到都會叫支紅酒/白酒，所以餐廳有一個擺滿各種酒杯嘅櫃~ 順帶一提，「溫6.5」話明係Dining Bar，就一定唔少得要飲酒啦，所以呢度只會接待已經成年嘅客人！
餐廳嘅裝修沿用傳統韓屋建築風格，再加上現代嘅裝修，特別得嚟真係好靚。
Menu（2024年1月更新版本）
食物方面，因為呢度幾乎所有餐點都會運用泡菜做主要食材，所以就會見到有炸泡菜、芝士蘿蔔泡菜、白菜捲等等超特別嘅Menu！小編當日比較早去，所以決定叫多幾款嘢食當early dinner。
呢度提供嘅酒非常多樣化，由韓式傳統酒到葡萄酒都一應俱全，價錢大約係5~10萬韓幣。
小編揀咗好耐都揀唔落手，最後職員就推薦咗一款適合配搭「溫6.5」嘅餐點嘅白酒俾小編！
叫完嘢食之後職員就會先上Welcome drink&food！“獻酒”係朝鮮時代舉辦宴會嘅時候，皇帝為咗向貴賓表達感謝之情而請對方飲嘅酒，令小編都有種成為重要賓客嘅感覺~
而「溫6.5」獨家研發嘅“獻酒”不含酒精，酸酸甜甜咁幾開胃！另外仲會有一份用泡菜同蕃薯蓉整嘅小食，為呢一餐打開序幕！
Domaine Desire Petit Chardonnay Le Frapiot 2020 Jura France（₩125,000）
過多陣職員就攞咗頭先小編叫嘅白酒嚟~小編本身都鍾意飲葡萄酒，呢支可以話係小編飲過嘅白酒之中最爽口順滑嘅一款！大家可以根據自己口味同叫嘅嘢食揀~ 小編今次揀咗啲喺其他餐廳好少見到嘅Menu介紹俾大家，一齊睇落去啦！
醬鮑魚泡菜紫菜包飯（전복장 김치 김밥）₩18,000
甘苔、酸泡菜加上醬鮑魚，三款食材本身分開食就已經好好味，加埋一齊更加係一流~ 而且整體嚟講唔會好鹹，值得加分！
燉牛排骨（소 갈비찜）₩36,000
燉牛排骨上面亦都有泡菜，白泡菜加上燒烤汁同韓式辣椒醬超惹味！
炸泡菜（김치튀김）₩19,000
呢款炸泡菜原來係用紫菜包住白泡菜、蝦、醃蒜心同醃辣椒而整成嘅嘢食，味道比想像中更加有層次！
就咁食已經好好味，上面仲會加椰菜花水泡菜同酸忌廉，視覺效果爆棚！令小編都忍唔住即刻影返幾張相po IG xd
白菜捲（배추쌈）₩21,000
呢款係「溫6.5」嘅招牌Menu，白菜入面包住辣椒泡菜、桔梗泡菜、豬肉同牛肉，然後用紅酒醬燉煮而成。
呢個白菜捲真係好足料，入面仲有通心粉，整體食落味道濃郁，而且係喺其他地方食唔到嘅味！
海膽紫菜麵（성게 김 국수）₩27,000
2024年仲新加咗幾款menu！上面呢款海膽紫菜麵係用新鮮海膽、紫菜、芥菜泡菜同忌廉等食材炮製而成，聽落好似會好腥好重海水味，不過完全唔會，而且麵嘅口感唔會太腍有咬口！
泡菜辣炒年糕（김치떡볶이）₩16,000
講起韓國就會諗起泡菜同辣炒年糕，不過小編都係第一次食加入泡菜整嘅辣炒年糕，味道比想像中夾！
牛肝菌餃子神仙爐（포르치니만두 신선로）₩28,000
喺韓式料理神仙爐入面加入西式食材牛肝菌嘅呢個做法超有創意，餃子菇香味重，配埋鮮甜青口同新鮮蘆筍，清新得嚟夠特別！
小編呢餐真係食得好滿足！大家要注意如果喺weekend嚟，會有兩個鐘限時~ 想邊飲酒邊體驗韓國fusion菜？推薦大家嚟北村「溫6.5」！
北村「溫6.5」前往方法
喺安國站（안국역）1號出口出。
行入右邊第一個路口。
直行大約100m。
然後行入右邊條巷仔。
咁就到「溫6.5」啦！
以上係北村「溫6.5」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com