狎鷗亭「London Bagel Museum(島山店)」介紹
吸引EXO、少女時代去朝聖嘅Bagel專門店!有咩咁值得韓國人一大早去排隊?
Hello,大家好,我哋係由韓國人每日提供最新韓國旅行資訊嘅Creatrip。
講到最近最多韓國人去排隊嘅餐廳,一定唔少得「London Bagel Museum(런던베이글뮤지엄)」!其實呢間鋪頭已經開咗一段時間,但仍然都係咁hit,無論係平日定weekend都超多人排隊,而且仲有好多韓國明星都係呢度嘅擁躉!今日就跟小編一齊去探索呢間超紅Bagel專門店啦!
狎鷗亭「London Bagel Museum(런던베이글뮤지엄)」
狎鷗亭「London Bagel Museum(島山店)」資訊
- 地址:서울 강남구 언주로168길 33
- 營業時間:08:00 - 18:00
- 小Tips:狎鷗亭羅德奧站(압구정로데오역)5號出口行7分鐘
狎鷗亭「London Bagel Museum(島山店)」推薦原因
- 「London Bagel Museum」可以話係呢排韓國最hit嘅餐廳,超多韓國人都會一大早去排隊等位!
- 有好多款口味嘅Bagel同Cream Cheese任君選擇,唔想諗嘅話仲可以揀Bagel三文治,每款都好高質!
- EXO伯賢&燦烈、TWICE志效、IVE秋天、少女時代秀英&Tiffany&潤娥、演員崔賢旭等韓星都曾經嚟過呢度影相打卡,fans們唔可以錯過!
狎鷗亭「London Bagel Museum(島山店)」價錢
招牌Menu | 價錢 |
芝士薯仔Bagel 감자치즈 베이글 | ₩5,500 |
香葱忌廉芝士Bagel 쪽파 베이글 | ₩8,500 |
倫敦巴士Bagel三文治 런던 버스 샌드위치 | ₩11,800 |
雙重煙肉薯仔Bagel三文治 더블 베이컨 감자 샌드위치 | ₩14,800 |
番茄忌廉濃湯 토마토 로제스프 | ₩10,500 |
蘑菇濃湯 머쉬룸 스프 | ₩12,800 |
狎鷗亭「London Bagel Museum(島山店)」介紹
「London Bagel Museum」島山店係一棟有兩層嘅西式建築,淨係睇呢張相都已經見到有超多人等緊位!
天氣好嘅時候坐露天位應該會好正好有feel~
頭先都有講到有好多韓國明星都經常嚟呢度,其中最出名嘅相信就係EXO嘅伯賢同燦烈啦!特別係當Fans知道伯賢鍾意食呢間鋪頭嘅Bagel之後,都相繼去朝聖,仲有人好好彩咁遇到真人添啊!
1樓
叫到你號碼之後店員會帶你入去,記住搵好位坐之後先再去買嘢食!
而家啲Cafe同餐廳都流行將所有餐點擺曬出嚟俾客人自己夾,呢度都唔例外!所以揀嘢食之前記住要攞個餐盤、墊張牛油紙,再攞埋個麵包夾~
全部睇落都好吸引,有選擇困難嘅小編真係揀唔落手!不過如果遲去嘅話可能會有好多款Bagel都賣曬,所以建議大家早少少去,咁就可以有多啲選擇啦!
揀完Bagel之後仲可以額外買Cream Cheese搽嚟食,有好多款口味,梗有一款大家會鍾意!另外湯同飲品就要去Counter叫,俾埋錢就成功買完嘢食啦!
1樓裝修到好似真正嘅倫敦麵包鋪咁,超有feel!
呢度亦都有賣杯、環保袋、布海報、鉛筆等等各種週邊商品,大家可以買返幾件返去做手信。雖然地方唔大,但係每個角落都佈置得好靚~
攞到嘢食之後就可以上2樓啦!
2樓
小編同朋友一共買咗兩款Bagel同兩款湯,係唔係全部都睇落好正呢~
倫敦巴士Bagel三明治(런던 버스 샌드위치) ₩11,800
呢款Bagel三文治個名超特別,不過又真係會令人聯想到英國嘅紅色雙層巴士~ Cream Cheese、羅勒醬同醃西班牙辣椒仔,仲有插喺中間嘅火箭菜,呢個配搭無論喺視覺定味覺上都超顯眼同特別!辣辣地嘅西班牙辣椒仔可以中和Cream Cheese漏嘅感覺,整體味道好Fresh。
雙重煙肉薯仔Bagel三文治(더블 베이컨 감자 샌드위치)₩14,800
超多薯蓉配原條煙肉、煙肉醬同番茄,好有飽足感,女仔們當做正餐食都得!
番茄忌廉濃湯(토마토 로제스프)₩10,500
呢款湯用到番茄、蒜頭、洋葱、煙肉同芝士熬製而成,酸酸甜甜夠開胃!
蘑菇濃湯(머쉬룸 스프)₩12,800
呢碗蘑菇湯超足料,食得出入面有好多洋葱同蘑菇粒,而且黑松露味都好濃,平時鍾意飲蘑菇湯嘅話就一定要叫啦~
2樓空間非常大,夠闊落,亦都有唔少位。
呢度裝修以紅磚做主調,簡約得嚟夠經典時尚!
牆上面仲有「London Bagel Museum」嘅招牌馬。
2樓中間有個打卡位,大家食到咁上下就可以嚟影返幾張相~
2樓後面有另一個以白色為主調嘅Area,呢度有賣週邊商品之餘亦都係另一個打卡位!
大家可以好似韓仔韓妹咁對住呢塊鏡影相~
除咗有環保袋、postcard同貼紙,仲有超cute嘅毛毛馬公仔~小編一見到就忍唔住買咗隻返屋企XD
室外
「London Bagel Museum」唔單止餐廳入面多打卡位,其實外面都有超多Photo Zone可以影相!
有好多明星都有對住呢兩塊鏡自拍過,快啲嚟同自己本命影返張一樣嘅相啦!
如果冇時間或者要趕下一個行程都唔緊要,大家可以外賣返住宿食,一樣咁好味!
而且如果堂食嘅時候食唔曬,大家都可以叫職員俾個盒你拎走。
「London Bagel Museum」仲有兩間分店(安國店、濟州店)!鍾意食Bagel,又想去最近韓國最hit嘅餐廳打卡嘅話,就一定唔可以錯過啦!
狎鷗亭「London Bagel Museum(島山店)」到訪韓星
2PM燦盛、TWICE志效
IVE 秋天
少女時代秀英、Tiffany、允兒
前IZ*ONE成員 李彩演
「London Bagel Museum」開張之後除咗吸引到唔少韓國年輕人嚟打卡,有好多偶像歌手都有喺度留低過佢哋嘅足跡!無論係國民女團少女時代,定係人氣不斷上升嘅IVE成員都有透過IG同YouTube打卡&介紹呢度!
Rain、崔賢旭
李先彬、高旻示
唔單止係Idol,有好多演員都曾經嚟過呢度朝聖!大家嚟嘅時候都幾大機會可以遇到明星~
狎鷗亭「London Bagel Museum(島山店)」前往方法
喺狎鷗亭羅德奧站(압구정로데오역)5號出口出。
直行,喺第二個路口(Paris Baguette)轉右。
繼續直行4分鐘。
咁就去到「London Bagel Museum」島山店啦!
「London Bagel Museum」其他分店位置
安國店(런던베이글뮤지엄 안국점)
- 地址:서울 종로구 북촌로4길 20
- 營業時間:08:00 - 18:00
濟州店(런던베이글뮤지엄 제주점)
- 地址:제주 제주시 구좌읍 동복로 85 제2동
- 營業時間:08:00 - 18:00
以上係狎鷗亭「London Bagel Museum(島山店)」嘅介紹,有任何問題請先詳讀呢篇文章。
如果睇完之後有任何疑問,或者我哋語言、標示唔清嘅話,麻煩請send email告知,以方便我哋改進。
如果有更多想知嘅內容,都可以隨時留言或者dm話俾我哋知:)
Instagram:creatrip.hk
Mail:help@creatrip.com