蠶室「Cafe Pepper」介紹
一開門就要排長龍？蠶室超特別Gluten-free Cafe，健康之餘味道夠高質，超多韓星都一試愛上！
Hello，大家好，我哋係由韓國人每日提供最新韓國旅行資訊嘅Creatrip。
最近韓國掀起一陣一股Vegan熱潮，無論係嘢食定化妝品都開始越嚟越多純素嘅選擇。而今次要介紹嘅「Cafe Pepper」就係一間專賣Gluten-free（零麩質）甜品嘅Cafe，吸引唔少韓國人去幫襯，甚至連ITZY 彩領、少女時代 Yuri、THE BOYZ 賢在、演員李帝勳同李陣郁都係呢度嘅熟客！一齊去睇吓到底呢間Cafe有咩咁吸引啦！
想去首爾最hit餐廳但唔想排隊？
買一套即享10間人氣店鋪即時入場 + 獨家優惠！
蠶室「Cafe Pepper（카페 페퍼）」
蠶室「Cafe Pepper」資訊
- 地址：서울특별시 송파구 송파1동 백제고분로45길 12
- 營業時間：11:00 - 21:00
- 小Tips：松坡渡口站（송파나루역）1號出口行3分鐘、蠶室站（잠실역）10號出口行19分鐘
蠶室「Cafe Pepper」推薦原因
- 呢度賣嘅所有甜品都係Gluten-free（零麩質），喺韓國真係好少有！
- 位於蠶室松理團路，就喺樂天世界同首爾樂天塔附近，地理位置方便。
- ITZY 彩領、少女時代 Yuri、THE BOYZ 賢在、演員李帝勳同李陣郁等韓國明星都係呢度嘅常客，連Netflix自創劇集《Sweet Home》都有嚟過拍攝！
蠶室「Cafe Pepper」價錢
美式咖啡（凍/熱） Americano (Ice/Hot) | ₩5,000 |
鮮奶咖啡（凍/熱） Latte (Ice/Hot) | ₩5,500 |
Pepper咖啡（只提供凍飲） Pepper Coffee (Ice only) | ₩6,000 |
開心果鮮奶咖啡（只提供凍飲） Pistachio Latte (Ice only) | ₩7,000 |
伯爵茶香橙蛋糕 Earl Grey Orange Cake | ₩9,000 |
香葱英式鬆餅 Green Onion Scone | ₩6,000 |
焦糖布朗尼 Caramel Brownie | ₩6,800 |
蠶室「Cafe Pepper」介紹
「Cafe Pepper」以提供超多款Gluten-free（零麩質）甜品而出名，而且鋪頭就喺樂天世界附近，好多人都會喺去玩之前/之後嚟呢度嘆返杯咖啡、食返件甜品。
呢度附近有好多望落勁新潮勁trendy嘅餐廳同Cafe，連最近爆紅嘅焗批專門店「Ginger Bear」都只喺行8分鐘就到！
小編同朋友嚟之前已經有聽聞過呢度成日都會爆滿，所以小編就決定11點一開門即刻去，好彩當時仲未需要排隊。不過如果大家會遲少少先去，就要跟住門口呢塊告示牌嘅指示等位啦！
1. Cafe空間有限，排隊時請沿著樓梯等候。
2. 3人或以上可能需要等更長時間，根據現場座位情況，2人有機會可以優先就座。
3. 為其他客人著想，入場後唔可以換位。
4. 外賣可以唔洗排隊。
Cafe內部裝修到好似一間英國郊區小屋咁，俾人一種溫暖舒服嘅感覺。
雖然頭先塊指示牌話Cafe空間細，但其實比想像中多位！如果成日都要排隊嘅話，睇嚟真係有好多客人。
Counter隔離就係蛋糕櫃，由傳統蛋糕到以韓式口味為靈感嘅蛋糕都有，而且仲有用當造生果整嘅期間限定水果蛋糕，全部睇落都好吸引！
而蛋糕隔離仲有好多其他款式嘅甜品，小編同朋友已經迫不及待，攞定咗碟同麵包夾啦！
蘋果批、Scone、蛋糕、曲奇等等全部都好香好吸引，最後小編同朋友就揀咗香葱英式鬆餅（₩6,000）、焦糖布朗尼（₩6,800）同伯爵茶香橙蛋糕（₩9,000）！
唔止後生仔女們，其實好多韓國明星都係「Cafe Pepper」嘅擁躉！好似女團ITZY嘅彩領同少女時代嘅Yuri曾經喺社交網絡分享過「Cafe Pepper」嘅甜品相，出演過《Sweet Home》嘅演員李陣郁同《Signal》、《模範的士》嘅男主角李帝勳都喺呢度出現過！
仲有THE BOYZ嘅賢在都曾經分享過呢度嘅Gluten-free甜品俾Fans，各位K-POP Fans當然要去朝聖
飲品方面，小編同朋友就叫咗呢度嘅招牌Pepper Coffee（₩6,000）同開心果鮮奶咖啡（₩7,000），兩款都好好飲~ 不過小編同朋友一致認為開心果鮮奶咖啡口感更加順滑，仲有超厚一層開心果Cream，特別得嚟味道都非常出眾！
而嘢食方面，小編同朋友最推薦嘅係呢款香葱Scone！味道真係同坊間嘅Scone一模一樣，唔講嘅話完全唔會知原來係Gluten-free，用嚟做早餐真係一流！
嚟到Cafe點可以唔食返件蛋糕啊！伯爵茶香橙蛋糕茶味夠香，加埋酸酸甜甜嘅橙好夾，唔會太甜太漏~ 而焦糖布朗尼就啱曬鍾意食甜嘢嘅朋友們，因為食落真係勁濃勁有罪惡感XD
呢度之所以會咁出名，除咗嘢食夠高質之外，當然係因為呢度非常IG-able啦！好多人都會專程嚟影相打卡，如果見到呢塊鏡，記住同朋友一齊影返張合照啦~
韓國真係好少有好似「Cafe Pepper」咁專賣Gluten-free嘢食嘅餐廳/Cafe，而且雖然話係零麩質，但係味道上完全唔會輸俾普通甜品，甚至更加好食！大家如果旅行嘅時候有機會嚟蠶室玩，記住預留少少時間嚟「Cafe Pepper」食好西+影相打卡啦！
蠶室「Cafe Pepper」前往方法
喺蠶室站（잠실역）2號出口出，向石村湖水方向直行。
過馬路，繼續直行。
過橋，然後繼續直行。
見到斑馬線之後唔好過馬路，轉左。
見到下一條斑馬線之後過馬路，行入BBQ炸雞隔離條巷仔。
直行。
見到Broom Photo Studio之後轉左。
望左邊會見到有條樓梯，上2樓就到「Cafe Pepper」啦！
以上係蠶室「Cafe Pepper」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
