漢南洞「Golden Piece」介紹
GD、BTS、LE SSERAFIM都食過嘅韓國傳統藥果！煩惱緊唔知買咩手信返屋企嘅話就去「Golden Piece」啦！
Hello，大家好，我哋係由韓國人每日提供最新韓國旅行資訊嘅Creatrip。
最近韓國掀起藥果熱潮，大家又知唔知藥果係咩呢？其實佢係一款用麵粉、蜂蜜、麻油等整成嘅韓式傳統甜品，由韓國古代開始就被視為係高級禮品，祭祖嘅時候亦都會見到佢嘅蹤影。而今日要介紹嘅「Golden Piece」係一間超多韓國明星都鍾意嘅藥果專門店，唔單止口味夠多夠高質，包裝都夠精緻得體，最啱買嚟送俾人！同小編一齊睇吓到底有幾特別啦~
漢南洞「Golden Piece（골든피스）」
漢南洞「Golden Piece」資訊
- 地址：서울 용산구 한남대로27길 25
- 營業時間：12:00 - 18:00
- 前往方法：漢江鎮站（한강진역）3號出口行9分鐘
漢南洞「Golden Piece」推薦理由
- 藥果係最近韓國最hit嘅甜品之一，想緊貼潮流就唔可以錯過！
- 有好多款傳統&創新口味嘅藥果，有啲得呢度先有！
- 每款禮盒嘅包裝同設計都非常有韓國傳統特色，好多人都會買嚟做手信，無論男女老幼都一定會鍾意！
- GD、太陽、BTS RM&Jimin、LE SSERAFIM Kazuha等等嘅韓星都食過，而且有唔少重大盛事都會送「Golden Piece」藥果做紀念品！
漢南洞「Golden Piece」價錢
韓式傳統糯米冬甩、開城式藥果禮盒（6件裝） （開城糯米冬甩：月花、黑芝麻、蕃薯）
| ₩23,000 |
小鹿藥果禮盒（13件裝） 白芝麻x1、黑芝麻x1、小鹿可可肉桂藥果x3、雲呢拿x2、艾草x2、伯爵茶x2、咖啡x2  | ₩56,000 |
小兔藥果禮盒（13件裝） 白芝麻x1、黑芝麻x1、小兔可可肉桂藥果x3、雲呢拿x2、綠茶x2、檸檬乳酪x2、榛果朱古力x2  | ₩56,000 |
青龍藥果禮盒（12件裝） 白芝麻x2、黑芝麻x2、雲呢拿x2、艾草黃豆粉x2、咖啡x2、四葉草開城藥果x2  | ₩56,000 |
想用更加平嘅價錢買到？
漢南洞「Golden Piece」介紹
位於漢南洞附近嘅「Golden Piece」係一間藥果專門店，最近喺韓國真係勁hit！鋪頭外面睇落好新淨又現代化，完全唔似係賣傳統小食嘅地方。不過唔講唔知原來呢間鋪頭2023年5月先開始營業，到底點解佢開張冇幾耐就已經咁紅？
INSTAGRAM @dduki___
有好多韓國明星都有幫襯過「Golden Piece」，之前G-DRAGON同NIKE聯名嘅Pop-up Store開幕嘅時候，就係咗準備「Golden Piece」嘅藥果做小禮物送俾人！
INSTAGRAM @lilcherryontop
當時太陽、BTS RM同Jimin、LE SSERAFIM Kazuha等等嘅明星都有出席，亦都有唔少韓國名人喺IG打卡上傳呢個同NIKE聯名嘅可愛藥果。
而家就跟住小編一齊入去呢間鋪頭睇吓啦！店鋪裝修以金色同木頭做主調，顛覆小編對紀念品鋪頭嘅印象，呢度反而比較似係傳統博物館或者展覽，感覺非常高級，真係會令人不自覺地「哇」出聲。不過要注意「Golden Piece」冇堂食位，只可以買完之後拎走！
左邊嘅牆上面放住裝有「藥果」食材嘅玻璃樽，例如紅棗、柑橘、肉桂、南瓜子等等。
韓式藥果禮盒（모둠 약과 세트）₩56,000/18件裝
「韓式藥果禮盒」入面有2款口感（糯米藥果、開城式藥果）、7款口味（雲呢拿、艾草、白芝麻、黃豆粉等）嘅藥果，每款都有金箔或者果仁裝飾，睇落健康得嚟夠曬高級，非常啱買嚟送俾長輩們。
呢度嘅藥果比一般傳統藥果更多花款，而且味道好唔錯，真係零舍不同！而小編們最鍾意嘅係艾草味，齋聞就已經可以聞到淡淡艾草香味，食落甜甜地完全唔會漏~ 而白芝麻味嘅藥果就加入埋柚子同紅棗，上面仲鋪滿果仁，口感夠曬豐富！
「韓式藥果禮盒」入面仲有一款兔仔形狀藥果，耳仔以金箔做裝飾，得意到令人唔捨得咬落去！呢款藥果出面有一層糖霜，入面係朱古力+肉桂味，而且因為呢款係開城式藥果，所以食落脆卜卜，同平時比較腍同癡牙嘅藥果唔同。
開城式藥果禮盒（개성 약과 세트）₩54,000/21件裝
頭先都有提到開城式藥果同普通大家認知嘅藥果唔同，製作工序會比較複雜，望落就好似千層酥咁，比較脆口，而且一咬落去仲會有糖漿咇出嚟，真係好特別！呢款「開城式藥果禮盒」總共有7種口味，除咗有傳統嘅原味同芝麻味之外，仲有黃豆粉、朱古力、芝士、覆盆子等比較特別嘅味道，無論係大人細路都一定會鍾意。
韓式糯米藥果禮盒（찹쌀 약과 세트）₩55,000/12件裝
「韓式糯米藥果禮盒」嘅口味都好多樣化，除咗頭先提到嘅雲呢拿、白芝麻同艾草味之外，仲有黑芝麻、榛果同伯爵茶味，每款都好精緻，完全唔捨得食！
韓式傳統糯米冬甩、開城式藥果禮盒 ₩23,000/6件裝
呢個禮盒除咗係韓國傳統小食之外，喺以前只有喺招待客人或聚會時先會食到，相當珍貴！口感煙韌，味道甜甜地，好好味！
每款禮盒都會有韓文、中文、英文、日文簡介，大家如果有機會嚟現場買都唔需要擔心睇唔明。包裝方面，職員會幫大家喺紙袋上面綁一條靚靚絲帶，睇落夠大方得體，而且包裝盒本身都好有韓國特色，啱曬帶返屋企送俾人！另外要注意，「Golden Piece」藥果喺常溫下可以保存三天，如果怕吃唔曬嘅話，可以放落雪櫃冷藏，最耐可以放2~3個禮拜。
最後走之前記住要喺鋪頭對面寫住「Golden Piece」嘅鏡度影返張相留念啊~ 「Golden Piece」嘅藥果無論係送禮自用都一流，非常推薦大家喺漢南洞行完街之後嚟呢度買手信！
漢南洞「Golden Piece」前往方法
喺漢江鎮站（한강진역）3號出口出，出口左後方會有條樓梯。
行樓梯落到最底。
第一個路口轉右。
直行。
「Golden Piece」會喺你嘅右手邊！
以上係漢南洞「Golden Piece」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
