東大門汗蒸幕 | SPAREX（東大門店）
SPAREX汗蒸幕全首爾最大分店！喺東大門就有得體驗設施服務超齊全嘅汗蒸幕！
Hello，大家好，我哋係由韓國人每日提供最新韓國旅行資訊嘅Creatrip。
相信有睇開韓劇或者電影嘅朋友們都曾經睇過劇中角色去汗蒸幕嘅場景！可能係因為咁，所以有好多遊客嚟韓國玩嘅時候都會專程抽時間去汗蒸幕，體驗韓國當地文化。不過前幾年疫情爆發之後，有好多汗蒸幕都執咗笠... 今日小編就打算向大家介紹一間位於東大門嘅汗蒸幕「SPAREX」，有興趣嘅朋友們記住要睇埋落去啦！
撳我睇價錢&預約詳情👇🏻
東大門汗蒸幕「SPAREX」基本資訊
- 地址：서울 중구 장충단로 247 B3
- 營業時間：24小時
東大門汗蒸幕「SPAREX」實地探訪
櫃檯
今日小編帶大家嚟到全首爾最大嘅「SPAREX」汗蒸幕東大門分店！呢度沿用韓屋嘅傳統裝修風格，加上現代化設施，令大家可以體驗到韓國傳統汗蒸文化之餘，仲可以享受現代化嘅便利，令體驗質素大大提升！
一入門口就會見到櫃檯，櫃檯前面有塊板寫住價錢同注意事項，大家入去之前可以仔細睇睇。
向職員出示Creatrip預約記錄之後，佢哋會幫你準備好入去之後要著嘅衫、兩條毛巾同一條鎖匙。如果預約咗入場券 + 搓澡套票，仲會有埋上面呢張搓澡券！
櫃檯隔離有一個放行李嘅地方，如果行李比較大件，大家可以同職員講聲，佢哋會幫你寫低你嘅鎖匙號碼，到時候方便認領。有好多book唔到住宿，或者因為時間太尷尬而唔知可以喺邊度hea時間嘅遊客都會選擇嚟「SPAREX」！
行李保管區嘅左手邊有一個Gym Room，全部顧客都可以用呢度嘅設施。（不過注意如果要用跑步機嘅話一定要著鞋啊！）
呢度就係桑拿嘅入口啦！大家除鞋之後就要將佢放入對應你鎖匙號碼嘅鞋櫃入面保管。
桑拿
通常去汗蒸幕嘅人分為兩種，有啲人會鍾意先冲涼再入汗蒸幕，另外有啲人會鍾意先去汗蒸幕逼曬啲汗出嚟，再去冲涼。「SPAREX」嘅桑拿入面有幾個唔同嘅池，大家可以揀自己鍾意嘅溫度，慢慢relax同休息。
有好多韓國人都鍾意專登去汗蒸幕搓澡，「SPAREX」嘅桑拿最右邊亦都有一個搓澡嘅地方，專業嘅搓澡師會幫你搓走身上嘅老泥，令皮膚變得更加嫩滑！
去搓澡之前大家要先簡單冲個涼，然後喺熱水池浸一浸，軟化死皮，咁先可以搓走所有老泥！不過高峰時期可能需要排隊，大家只要耐心等候就好快到你~
搓澡大約需時30分鐘，搓完之後冲多次涼就可以入汗蒸幕啦！
浸完之後一出嚟就會見到汗蒸幕嘅指示牌，落一層就到！
汗蒸幕
呢度就係「SPAREX」嘅汗蒸幕區啦！樹木同韓屋裝修非常襯，就好似去咗某條韓國古代小村落咁~
右邊有按摩椅同櫈，再行入少少就會見到蒸房。
最出面呢兩間蒸房分別係71度同83度，係呢度最高溫嘅蒸房！小編好鍾意入去坐住出身汗，不過亦都有好多人覺得太熱，入去無幾耐就會出返去。
入蒸房之前大家可以喺出面落個枕頭，入去就可以瞓低休息啦~ 不過瞓低太耐嘅話起身個陣可能會見頭暈，大家要小心啦！
呢間係71度嘅傳統柴火汗蒸幕，一開門就feel到入面嘅熱力！不過喺呢度谷身汗嘅話有助排毒同增強免疫力，對美容同血液循環都有幫助。
大家估唔估到呢幾個窿係咩嚟㗎呢？呢度係睡眠室（男女共用），大家只要攞個枕頭過嚟就可以入去瞓返陣！大家亦都可以喺上面個平台一邊食小食，一邊休息。
行到最入就會見到有黃土木炭汗蒸幕。
出一身汗之後就可以去冰房冷卻一下，不過大家記住唔好一出蒸房就入冰房，要等身體無咁熱之後先再入去啊！
汗蒸幕休息區入面有一個睡眠室，沿用傳統韓屋設計，超有古典風情。
大家仲會見到有瓦缸，韓屋牆上面仲貼住榜文，真係好似去咗古代韓國人屋企咁！
呢度嘅睡眠室分成男士同女士專用房，出面嘅燈光透過紙窗照入嚟，就好似自然光咁，勁有Feel~
小編個人覺得韓屋同涼亭中間呢條橋係「SPAREX」汗蒸幕嘅打卡位！
入到汗蒸幕區之後直行就會去到Food Court，座位都鬆動，唔洗同人逼。
大家入場之後可以喺汗蒸幕stay 24個鐘，所以呢度都有提供各種零食、飲品同食物俾客人買嚟食。
大家仲可以冲杯麵食添啊！
所有餐具、嘢食都要自己拎，食完記住都要自己執好手尾啊！
呢度泡菜同醃蘿蔔係基本小菜，如果大家order有飯嘅Menu仲會有多兩款小菜添！
小編同朋友就叫咗排骨湯、泡菜湯同冷麵！食物準備好之後職員就會叫你，到時候就可以去拎嘢食，順便攞埋餐具。
呢度嘅飯係紫米雜谷飯，小編超鍾意食！
不過小編覺得今次最好食嘅Menu係冷麵，大家可以按照喜好加醋同芥辣調味。
講到「SPAREX」，當然唔少得米水啦！呢度嘅米水係職員自己煲嘅，所以零舍好飲~
呢度嘅熱石雞蛋會用膠袋裝住，等大家食完之後可以將殼放好，直接揼喺附近嘅垃圾桶，咁就唔洗專登行返嚟Food Court揼啦！
小編同朋友買完米水同雞蛋之後就出咗嚟坐，一邊傾計一邊食，真係超寫意~
飲咗一啖米水就知道點解會咁受歡迎啦！呢度嘅米水唔會太甜，下面嘅米粒口感唔會太腍或者太硬，仲有碎冰，夠曬清爽！
熱石雞蛋都係韓國汗蒸幕必食小食之一，大家嚟到記住買返幾隻食啦！
用毛巾整羊咩咩頭教學
將毛巾對摺三等份。
將開口向外翻大約3次左右（之後可以再較大細）。
另外一邊重覆以上步驟。
咁就整完啦！
只要將頭套進入中間就得，係唔係好簡單呢？
難得嚟到汗蒸幕當然想入鄉隨俗，跟住韓國人整羊咩咩頭、食熱石雞蛋、飲米水同入蒸房出身汗排毒啦！相信東大門「SPAREX」一定可以滿足曬大家所有願望！
東大門汗蒸幕「SPAREX」前往方法
喺東大門歷史文化公園站（동대문역사문화공원역）14號出口出。
直行之後左轉。
你會即刻見到「SPAREX」嘅招牌，跟住佢行入商場。
搭𨋢落B3。
咁就去到東大門「SPAREX」啦！
撳我預約👇🏻
以上係東大門汗蒸幕「SPAREX（東大門店）」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時留言或者dm話俾我哋知：）
Mail：help@creatrip.com
