韓星Cafe | BB Girls(原稱Brave Girls)成員玟瑩「C.RAZER COFFEE」
韓星開嘅Cafe可能就喺你左近!Brave Girls成員玟瑩新開Cafe!
Hello,大家好,我哋係由韓國人每日提供最新韓國旅行資訊嘅Creatrip。
相信各位Fearless都知道,Brave Girls成員玟瑩(민영)早排開咗間Cafe,聽講佢本人有時候都會喺鋪頭幫手!小編一聽到呢個消息就即刻去咗幫襯,到底小編有冇見到玟瑩本人呢?
BB Girls(原稱Brave Girls)成員玟瑩「C.RAZER COFFEE」資訊
- 地址:서울 동대문구 경희대로4길 44
- 營業時間:11:00 - 22:00
- 小Tips:1號線、京義·中央線、京春線回基站(회기역)1號出口行7分鐘
BB Girls(原稱Brave Girls)成員玟瑩「C.RAZER COFFEE」介紹
今日小編諗住帶大家睇吓前Brave Girls成員玟瑩最近喺慶熙大學附近開嘅「C.RAZER COFFEE」!其實「C.RAZER COFFEE」係一間連鎖Cafe,喺韓國好多地方都有,而慶熙店本身係一間咖啡學院,亦都只提供外賣服務。不過自從玟瑩接手呢度之後,進行咗大裝修,俾各位客人可以堂食~
雖然店面唔大,不過鋪頭入面大概有5~6張雙人檯,另外亦都有1~2張大檯,仲有一兩個室外位。小編當時係平日下晝去嘅,都等咗一陣先有位坐,所以想去嘅朋友們可能就要避開Tea Time或者其他高峰時間啦!鋪頭另一邊就係counter同整咖啡嘅地方,仲有一個甜品櫃,大家叫嘢食之前可以睇吓有咩想食~
話明係韓星Cafe,就當然有唔少同呢位歌手有關嘅擺設同裝飾啦!鋪頭入面其中一邊嘅牆上面有玟瑩嘅相,亦都有Brave Girls相關嘅模型同fans整嘅獎杯,真係好有意義~ 另外鋪頭有幾個角落都放有玟瑩嘅相框,小編去嗰陣咁啱遇上有日本Fans,佢哋都一直不斷影相留念,相信Fans們一定會好鍾意呢個地方!
Menu方面,其實呢度賣嘅飲品大部分都同普通Cafe差唔多,亦都有英文對照,大家可以參考吓。
YamYam Set - 維也納咖啡 + 艾草Tiramisu(₩7,500)
Jjeob-Jjeob Set - 青蘋果梳打 + 檸檬牛角包(₩7,500)
艾草雪糕(₩6,300)
馬格利米酒奶昔(₩6,500)
「C.RAZER COFFEE」亦都有特別嘅Set Menu,兩款都係以玟瑩養嘅狗仔名命名,一個叫「YamYam Set」,一個叫「Jjeob-Jjeob Set」。另外呢度最特別嘅飲品相信一定係馬格利米酒奶昔!因為呢款飲品真係用韓國傳統米酒整嘅,所以成年人先買到~
小編最後就揀咗維也納咖啡+ 艾草Tiramisu嘅「YamYam Set」。呢度嘅維也納咖啡係鮮奶咖啡上面有一層甜甜地嘅Cream,完全唔會苦,平時覺得咖啡太苦嘅朋友們可以由呢款飲品開始入門!另一方面,相信大家對艾草Tiramisu可能都會有啲陌生,呢款甜品嘅艾草味唔算太重,蛋糕亦都非常濕潤,上面仲有一塊煙韌嘅年糕,非常有韓國特色!
另外只要買呢兩個Set,就可以得到一個杯套、一張玟瑩小卡同一張狗仔貼紙,係fans嘅你一定要收藏呢幾款限定禮物!
好可惜小編當日見唔到玟瑩本人...不過小編發現Cafe門口隔離有一個信箱,等Fans們可以寫信放入去!玟瑩開嘅呢間「C.RAZER COFFEE」就喺慶熙附近,交通方便,大家想去韓星開嘅Cafe嘅話不妨都可以考慮去呢度!
以上係BB Girls(原稱Brave Girls)成員玟瑩「C.RAZER COFFEE」嘅介紹,有任何問題請先詳讀呢篇文章。
如果睇完之後有任何問題,或者我哋語意、標示唔清嘅話,麻煩請send email告知,以方便我哋改進 。
如果有更多想知嘅內容,都可以隨時留言或者dm話俾我哋知:)
Instagram:creatrip.hk
Mail:help@creatrip.com