安國美食 | Cafe Knotted
韓國超人氣冬甩Knotted Donut！靚得嚟仲有超多款味道！
Hello，大家好，我哋係由韓國人每日提供最新韓國旅行資訊嘅Creatrip。
有關注開韓國嘅朋友們，應該都知道呢排韓國好多賣冬甩嘅Cafe都突然爆紅，而「Cafe Knotted」就係其中一間。「Cafe Knotted」喺首爾有幾間分店，而今日小編要介紹嘅就係位於安國嘅韓屋分店，跟住小編一齊去睇吓啦~
安國「Cafe Knotted」資訊
- 地址：서울 종로구 북촌로 6-3
- 營業時間：10:00 - 21:00
- 小Tips：3號線安國站（안국역）2號出口行1分鐘
安國「Cafe Knotted」推薦理由
- 「Knotted」係韓國呢排最受歡迎嘅冬甩鋪頭，有超多款口味任君選擇！
- 「Cafe Knotted」安國分店沿用傳統韓屋裝修，好有韓國傳統氣氛！
- 呢度亦都有賣各種週邊商品，大家可以買返香港做手信！
安國「Cafe Knotted」推薦價錢
| Menu | 價錢 （2023.03為準） |
| 鮮奶忌廉冬甩 우유 생크림 도넛 | ₩3,900 |
| 朱古力布甸冬甩 초코푸딩 도넛 | ₩3,900 |
| 咖央牛油冬甩 카야버터 도넛 | ₩3,900 |
| 士多啤梨忌廉冬甩 스트로베리 크림 도넛 | ₩4,200 |
| 伯爵茶冬甩 얼그레이 도넛 | ₩3,500 |
| 開心果忌廉冬甩 피스타치오 크림 도넛 | ₩3,900 |
| 美式咖啡 아메리카노 | ₩4,500 |
安國「Cafe Knotted」介紹
最近最受歡迎嘅冬甩鋪頭之一「Knotted」喺韓國有好多間分店，呢度除咗冬甩好食之外，風格都超得意~ 今日小編要帶大家去嘅係最特別嘅韓屋分店 ——「安國店」！
喺入口就會見到「Knotted」嘅吉祥物Sugar Bear喺度歡迎緊大家~
一入到去就會見到有一個擺滿甜品同麵包嘅櫃！「Knotted」除咗有賣冬甩，仲有忌廉牛角包同撻類甜品等等，全部睇落都好吸引。
講起「Knotted」，當然唔少得呢個招牌笑哈哈蛋糕啦！所有甜品都可以揀堂食或者外賣攞走，如果大家外賣3個或以上嘅甜品嘅話，職員仲會幫你得意紙盒裝住，方便你帶返屋企。
Counter後面有一個韓屋風格嘅中庭，亦都有一塊寫住「Knotted」同有可愛塗鴉嘅牆，大家可以大影特影！呢度亦都有兩張櫈，天氣好嘅時候大家可以坐喺呢度食，感覺應該會好寫意~
全間鋪頭都係行韓屋風格，天花板上面仲有熊啤啤吊燈，真係好得意！
而家天氣暖返啲，冇落雨嘅時候仲可以打開通往頭先介紹嘅中庭嘅玻璃趟門，感覺會更加似韓屋。
大家嚟到記住要同呢個大型熊啤啤合照，不過記住要眼看手勿動啊！
大型熊啤啤隔離就有一個擺滿「Knotted」產品嘅雪櫃，例如Knotted限量啤酒、Brownies、雪糕等等，大家有興趣可以買返屋企試。
再行過少少就會見到賣「Knotted」週邊商品嘅地方，無論係公仔、蠟燭、鎖匙扣、手機支架等等都有，超啱買返香港做手信！
今次小編就叫咗4款最受外國人歡迎嘅冬甩同美式咖啡，包括有鮮奶忌廉冬甩、士多啤梨忌廉冬甩、朱古力布甸冬甩同咖央牛油冬甩。
鮮奶忌廉冬甩 ₩3,900
鮮奶忌廉冬甩係「Knotted」嘅招牌甜品，超多Cream，但完全唔會覺得太甜或者太漏。冬甩都夠鬆軟，令人食到停唔到口！
士多啤梨忌廉冬甩 ₩4,200
呢款士多啤梨忌廉冬甩上面真係有新鮮士多啤梨！而入面嘅粉紅色忌廉味道酸酸甜甜，就好似士多啤梨奶咁。
朱古力布甸冬甩 ₩3,900
朱古力布甸冬甩嘅Cream係咁多款冬甩入面最濃郁嘅，一咬落去超重朱古力味！
咖央牛油冬甩 ₩3,900
無諗過新加坡特色美食咖央多士都可以化身成為冬甩！咖央醬加一塊凍牛油，再配埋裹滿砂糖嘅冬甩，雖然好邪惡，不過真係好好食~
美式咖啡 ₩4,500
因為「Knotted」係甜品專門店，所以小編本身以為呢度嘅咖啡應該唔會太好飲，不過呢度嘅美式咖啡酸味唔太重，亦都唔會好苦澀，好啱配住冬甩一齊食！另外「Knotted」更加有另外賣自家製嘅Smile Blend咖啡豆，大家可以買返屋企慢慢飲~
小編非常推薦大家嚟安國站附近嘅呢間「Cafe Knotted」，喺韓屋入面嘆好食嘅冬甩同咖啡！
安國「Cafe Knotted」前往方法
喺安國站（안국역）2號出口行出嚟。
直行1分鐘左右，「Cafe Knotted」會喺你嘅右邊！
以上係安國「Cafe Knotted」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com