韓國留學生租屋小Tips

Hello，大家好，我哋係由韓國人每日提供最新韓國旅行資訊嘅Creatrip。

相信大家去韓國留學，除咗會擔心洗費之外，租屋都係一個問題。要租到好屋都唔係咁易，更何況唔係喺自己國家/地區，更加會令人擔心。今日小編就整理好一系列嘅租屋小Tips，希望可以幫到大家啦！

韓國留學生租屋小Tips

韓國租屋

• 房型
  • One Room（원룸）：面積越大、離地鐵站/學校越近，加上如果有哂所有設施（如書檯、衣櫃、床、洗衣機、雪櫃、冷氣等），價錢就會越貴。
  • 一般房屋（일반주택）：多數係一幢/一幢其中一個單位。
  • 公寓（빌라）：除咗豪華別墅，通常都會有兩間房、一個客廳、一個露台同一個洗手間。
  • 屋苑（아파트）：有分好多座，同香港嘅屋邨差唔多。

• 租金支付方式
  • 月租：每個月都要交租，有啲會要求交保證金，一簽通常係一年。
  • 全租：一開始俾一大筆錢房東，之後每個月唔使交租，只係需要俾水電煤。通常租約係2年，到期之後房東會退返保證金俾你。

去房地產簽約流程

서울부동산정보광장

如果想喺韓國睇屋，可以直接去房地產或者喺網上睇定。想知而家買賣價係幾多，首爾區可以參考首爾房地產信息廣場網站，其他地區可以參考國土交通部網站。

點揀房地產？

如果想知你會去嘅房地產好唔好，可以喺去之前搵吓佢哋有冇網站/Blog，判斷佢哋值唔值得信賴。但如果大家係啱啱嚟到韓國冇耐，韓文仲未好流利嘅話，可以用Ziptoss房地產中介服務~ 佢哋有提供中文、英文同韓文三種語言服務，唔需要擔心溝通問題！

睇買賣紀錄

即使你喺網上睇完啲相覺得好滿意，之後去睇樓可能都會有出入。建議唔好只睇定一間，搵定至少3間去慢慢睇同比較，之後再決定租邊間。另外如果搵到心儀嘅屋，都仲需要實地考察，了解一吓附近有咩設施，例如地鐵/巴士站近唔近、附近有冇超市或者警署等等。

睇完屋簽約前要留意：

有啲房東為咗想快啲租/賣出自己間屋，有時手續費會直接俾哂中介，呢點大家要記住問清楚。同時根據《房屋租借保護法》，基本上租屋嘅時候會簽訂為期一年嘅租約，一年後有可能會自動延長。所以如果你只打算住一年，必須喺搬走前一個月通知房東。

確認資訊

簽約之前大家一定要先確認以下兩樣嘢：

1. 房屋登記證明 - 就算房東係層樓嘅擁有人，都有可能因為唔夠錢而需要抵押層樓借貸款，所以最好簽約前要睇吓房屋登記證明！
2. 房東身份 - 一定要確認寫租約嘅人係房東定係代理人，如果係代理人，一定要問清楚佢嘅身份證件、印章證明同授權書。

寫租約

1. 房東

房東會準備身份證、印章（或簽名、指紋）、登記權證明（등기권리증）、登記簿證副本（등기부등본）、房屋管理賬簿（건출물관리대장）等文件，但如果係同中介簽，通常只要俾契約金同簽名就可以。

2. 租客（本人）

就算係留學生，只要簽咗合法租約，都可以同韓國人一樣得到保障。

• 必須要有外國人登錄證（即居住證），先可以簽租約。
• 如果更改居住地址，必須喺14日內申報。
• 需要去居民中心確認租約日期。

3. 簽租約

通常簽租約，雙方都要傾好入住日期、租金、俾租日期、期限同交其他資料等。同時一開始租客需要先俾10%保證金去Keep間屋，如果租客因個人原因突然決定唔租，呢嚿錢將會賠償俾房東。

4. 俾尾數再入住

入住當日通常會俾埋尾數，同時再Check多次租約有冇問題。建議用銀行過數，咁樣先可以有紀錄（有埋過數紙最好）。

入住後注意事項

最後提多次大家，入住後14日內，一定要去居民中心申報，否則有機會會被罰錢。另外比起自己一個去睇樓，建議同值得信賴嘅朋友一齊去睇，多個保障。

資料來源：생활법령정보、한국유학종합시스템

以上係「韓國留學生租屋小Tips」嘅介紹，有任何問題請先詳讀呢篇文章。

如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購

Mail：help@creatrip.com