弘大美甲 | 與今天不一樣的Nail
K-Beauty有幾犀利大家都知！一齊去弘大體驗韓式Gel甲啦！
Hello，大家好，我哋係由韓國人每日提供最新韓國旅行資訊嘅Creatrip。
嚟到韓國當然要體驗吓韓式Gel甲啦！今日小編就帶大家去到弘大入口站9號出口附近嘅「與今天不一樣的Nail」，交通方便之餘仲有質素保證，有興趣想Gel甲嘅朋友們記住睇落去啦！
弘大「與今天不一樣的Nail」資訊
- 地址：서울 마포구 동교동 165-8 B1
- 營業時間：星期一至六 11:30 - 21:00（星期日休息）
弘大「與今天不一樣的Nail」推薦原因
- 無論係簡約、可愛定華麗風格嘅設計都有，而且有好多款式任君選擇，一定可以整到啱你心水嘅Gel甲！
- 鋪頭裝修簡約又乾淨，亦都非常衛生，完全唔需要擔心。
- 美甲師細心體貼，務求令每位客人嘅Gel甲靚得嚟又可以keep得耐！
- 位於弘大入口站附近，行幾步路就到，地理位置方便。
- 所有美甲師都有超過10年經驗，而且非常親切，包你整得滿意又開心！
弘大「與今天不一樣的Nail」價錢
選項 | 手 | 腳 | |
Gel甲 | [限時優惠(11:00 - 16:00)] 基本Gel甲（單色） |
| ₩35,000 |
基本Gel甲（單色） | ₩45,000 | ₩50,000 | |
本月Gel甲款 | ₩60,000 ~ ₩80,000 | - | |
額外加購項目 | 手 | 腳 | |
駁甲 | 1隻 | ₩10,000 | - |
10隻 | ₩70,000 | - | |
參考圖片
基本Gel甲（單色）
本月Gel甲款
弘大「與今天不一樣的Nail」注意事項
- 所需時間：1小時至1小時30分鐘
- 可預約時間：11:30 - 19:30
- 請最少喺體驗3日前預約。
- 同時段最多接受3個人預約。
- 請提前15分鐘到達，如果遲到將會視為No Show。
- 為方便安排人手，即使想同朋友一齊去，請分開預約。
- 本月精選款式每個月都會唔同，請到現場決定款式，如果最後出現差額，請喺現場支付。
- 訂單經確認後，如果去到現場突然想更改或取消，恕不設退款。 （例如：預約本月美甲後改為基本Gel甲，預約手＋腳Gel甲但只整手等）
- 根據屆時最終決定嘅設計同額外加購嘅項目，價格可能會有所增加，請喺現場支付差額。
- Gel甲平均需時1個鐘，不過根據所選設計同需唔需要拆甲，可能會用多30-60分鐘。
- 拆甲可能會根據Gel甲/指甲狀況而會有額外收費。
- 取消及退款只限預約3日前進行，其後恕不受理。
- 只有3日前取消先可以全額退款。
- 如有任何疑問，請send email到help@creatrip.com查詢。
弘大「與今天不一樣的Nail」預約流程
STEP 1. | |
STEP 2. | 請詳細輸入所有相關資訊。 |
STEP 3. | 完成預約後，我哋會喺1-2個工作天內確認訂單。 可以喺預約日期3日前更改或取消。 |
STEP 4. | 請準時到達。 |
弘大「與今天不一樣的Nail」介紹
今日小編嚟到弘大「與今天不一樣的Nail」整指甲，喺弘大入口站9號出口行30m就到，好容易搵到。
一入到去就見到有好多五顏六色嘅指甲，亦都有好多款式！有選擇困難症嘅小編淨係揀款都揀咗好耐XD
鋪頭裝修以白色為主調，入面總共有3個位可以做Gel甲，而整腳甲嘅地方亦都同整手指甲嘅地方分開，大家唔需要擔心有衛生問題。如果需要等嘅話，鋪頭入面亦都有準備櫈俾客人坐，亦都有電視可以睇，非常貼心！因為小編有提前預約，所以可以即刻開始整，如果有外套或者袋都可以暫時擺喺後面先~
「與今天不一樣的Nail」有超多款指甲油，亦都比想像中多款式，無論係簡單嘅單色款、有閃石嘅華麗款，定有公仔嘅可愛款，全部都好好睇，大家可以慢慢揀！
呢度亦都有提供本月精選款式，每個月都會轉款，而呢啲款式全部都係呢個月最受歡迎嘅款式！小編1月去嘅時候總共有12個本月精選款式，每款都各有捧場客，相信大家都會揀到鍾意嘅款式~
始終而家仲係冬天，韓國真係勁乾，所以無論係手指甲定腳甲都需要好好管理。呢度有提供各種相關活動，仲有賣治療倒甲產品，大家有興趣可以參考吓~
Gel甲之前要先喺工作檯後面嘅洗手盆洗手先，之後就可以準備開始啦！
小編最後揀咗一款黑色底加閃石嘅設計，因為睇落比較成熟穩重！美甲師整指甲之前會先問客人想要整咩樣嘅指甲，無論係形狀定長短你都可以自由選擇，小編就決定跟返本身指甲嘅形狀嚟整~
用機器修剪同打磨指甲之後，美甲師會再幫客人整理好指甲邊緣嘅角質。小編覺得呢度嘅機器都好新淨，而且進行每個步驟之前都會先消毒，亦都完全唔痛，令小編非常放心。
美甲師話喺指甲上有水分嘅狀態下修甲效果會好啲，所以會用濕毛巾幫客人包住啲指甲。
修甲大概用咗30分鐘，而正式Gel甲前亦都會先上一層指甲營養液同底油。
搽完底油之後就要擺隻手落Gel甲機照30秒左右，呢個步驟會重覆2-3次，令最後成果可以keep得耐啲。
之後就會正式開始搽指甲油，Gel甲師超仔細，搽得非常均勻，搽完就要好似頭先咁放落Gel甲機照30秒。
最後仲要加埋閃石~ 因為啲閃石比較細，所以美甲師非常集中精神幫我痴落指甲度，最後效果都好好！整完之後再照一照燈就大功告成，Gel甲用咗大概30分鐘，所以加埋修甲，整體用咗大約1個鐘頭。
呢個就係小編Gel甲嘅最終成果啦！簡單得嚟唔會話太誇張，完全係小編想像中嘅嗰種感覺~ 鋪頭入面仲有一個Photo Zone可以俾大家影低咁靚嘅指甲，等大家可以po上網曬吓命XD
嚟韓國玩想體驗吓韓式Gel甲，小編強烈建議大家去弘大「與今天不一樣的Nail」！無論係職員嘅服務態度定最終成果都令人超滿意，有興趣可以透過我哋預約~
弘大「與今天不一樣的Nail」前往方法
喺弘大入口站（홍대입구역）9號出口行出嚟。
向前行之後會見到左邊有條樓梯，跟住行落去，然後轉左。
行入「LG팰리스」大廈。
落樓梯轉右之後就會見到「與今天不一樣的Nail」！
以上係弘大「與今天不一樣的Nail」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com