韓國最受歡迎香水牌子TOP12

Hello，大家好，我哋係由韓國人每日提供最新韓國旅行資訊嘅Creatrip。

韓國年輕人特別重視自我管理，無論係以飲食同運動保持健康同維持身材，定係透過化妝同穿搭去扮靚，佢哋都會花好多心機。而想喺其他人心中留低一個良好印象，身上嘅香味都非常重要！ 今日小編幫大家搜集咗最近韓國年輕人最鍾意嘅香水牌子，當中有好多連韓星都有用，希望大家可以喺度搵到屬於自己嘅「命定香水」啦！

不如DIY返一支專屬你嘅香水🌹

想直接睇有邊幾款香水？
打開目錄就可以跳去！

韓國最受歡迎香水牌子TOP12

Diptyque_(딥티크)

「Diptyque」可以話係最近韓國最受歡迎嘅香水牌子，無論係花調定木調香水都非常特別，而且大部分都係中性香水，所以無論係韓仔定韓妹都好鍾意用。

而呢個牌子喺韓國最受歡迎嘅香味相信一定係「Do Son」，佢嘅前調係非洲橙花、玫瑰、 鳶尾花，中調係晚香玉同粉紅胡椒，後調就係麝香，連NCT廷祐都用緊！另外BTS Jin用嘅「Philosykos」都非常搶手，無花果加椰子香味勁特別，好多韓國人都覺得呢支係最正宗最好聞嘅無花果香水！

Tamburins_{(탬버린즈)}

「Tamburins」呢個牌子係由Gentle Monster旗下子公司創辦嘅美妝Line，佢地最先推出嘅係Hand Cream系列（金鏈護手霜、貝殼護手霜），上年更加推出第一個香水系列，由BLACKPINK Jennie代言，可想而知真係非常受歡迎！

比起香水，韓國年輕人比較鍾意用呢個牌子嘅Hand Cream，而最有代表性嘅就係上面呢款「000」，佛手柑、檀香木同廣藿香嘅香味非常適合鍾意木調香嘅朋友們！佢仲有出埋酒精搓手液，可以消毒之餘隻手仲可以香噴噴~

🔎「Tamburins」分店位置

NONFICTION_(논픽션)

「NONFICTION」係一個韓國本地香水品牌，所有產品不含17種有害成分，除咗香水，亦都有推出Hand Cream、沐浴露、Body Lotion、香薰蠟燭等等，就算唔鍾意噴香水都可以買其他product！

呢個牌子最出名嘅香味係「Gentle Night」，混合麂絨、白茶、無花果、青苔、雪松、麝香，味道比較中性，無論係自用定買嚟送俾人都好啱。

🔎「NONFICTION」分店位置

LE LABO_(르라보)

鍾意香水嘅朋友們應該都有聽過「LE LABO」呢個牌子，佢係一個喺美國創立嘅小眾精品香水品牌。最特別嘅係去鋪頭買仲可以寫上自己個名或者鍾意嘅句子，令支香水變得獨一無二！

最近最受韓國年輕人歡迎嘅香味相信係呢隻「Another 13」，連THE BOYZ柱延都用緊呢款香水！龍涎香、麝香、茉莉花、青苔、琥珀調、木質調同佛手柑嘅組合營造出一種自然嘅體香，完全唔會攻鼻，而且仲會俾到人一種你本身就咁香嘅感覺~

🔎「LE LABO」分店位置

BYREDO_{(바이레도)}

「BYREDO」係一個喺2006年創立嘅瑞典牌子，近呢幾年受到越嚟越多韓國年輕人歡迎。佢哋除咗香水，亦都有出Hand Cream、Body Cream同頭髮噴霧。

喺韓國最出名嘅係呢款NCT道英嘅代表香水「BLANCHE」！佢嘅前調係番梘香調、粉紅胡椒同白玫瑰，中調係橙花、牡丹同紫羅蘭，而後調就係木質香、麝香同檀香木，味道比較大眾化，鍾意番梘香味同花香味嘅朋友們最近想換香水嘅話，不妨可以考慮吓呢款！

Maison Margiela_{(메종 마르지엘라)}

「Maison Margiela」由一位比利時設計師喺1988年創立，呢度嘅香水都叫做「Replica」，顧名思義即係將我地生活中嘅特別香氣複製成為一支香水，希望無論係用嘅人定聞到嘅人都可以回憶起生命中某一個時光。

而韓仔韓妹最鍾意用嘅款係「Lazy Sunday Morning」，連黃旼炫都係用佢！ 佢嘅前調係鈴蘭，中調係鳶尾花，而後調就係白麝香同黃葵籽，有種番梘同柔順劑味，俾人一種乾淨溫柔嘅感覺，真係同旼炫個形象好襯~

Granhand_{(그랑핸드)}

「Granhand」呢個牌子人氣急升，位於景福宮附近嘅北村韓屋店近期喺Instagram同小紅書討論度超高！「Granhand」香水價錢比較平，不過香味同高級香水有得揮，甚至好聞過名牌香水，推薦鍾意香水嘅朋友嚟首爾嘅時候一定要去返轉！

「Granhand」香水種類多，而且價錢相對比較平（₩20,000~40,000不等），喺景福宮、弘大、狎鷗亭都有分店，而且得韓國先有得買，無論係送禮自用都好啱！

🔎「Granhand」分店位置

FORMENT_(포맨트)

如果有關注開韓國流行，相信大家應該都有聽過「FORMENT」呢個香水牌子！雖然香港都可以買到（有香港官網），不過喺韓國可以買到更加多種類，而且價錢都會比較平。

「FORMENT」香水CP值高，而且喺Olive Young就可以買到，所以成為唔少韓國YouTuber同KOL都鍾意用嘅香水。大家如果會去Olive Young，不妨可以去試聞吓（最近推出咗唔少新款！）

_{LIBER(리베르)}

「LIBER」呢個牌子大家可能未聽過，但係住喺韓國嘅朋友們喺Instagram可能會成日見到佢哋嘅廣告。「LIBER」嘅香薰專為“城市旅行者”而調配，每款香味都會令人聯想起人生當中，或者某個旅程當中嘅特別瞬間。

其實呢個brand係小編私心想推薦俾大家嘅香水牌子，無論係茶味嘅Tea Slow、番梘味嘅Sai、木調香味嘅Art Book，定係會令人聯想起喺啱啱熨好嘅恤衫嘅Steam Gloss（小編最近最鍾意嘅香水XD）等等，全部款式都夠中性，男女都用得，而且係其他brand好少會有嘅香味！

Youssoful_(유쏘풀)

「Youssoful」係一個韓國小眾香水牌子，呢個brand會突然爆紅係因為有一次SEVENTEEN簽唱會有個Carat噴咗佢哋嘅香水，隊長S.COUPS大讚好聞之餘仲問係咩牌子，令大家都好好奇到底係咩香味令S.COUPS咁鍾意XD

Youssoful

吸引到S.COUPS嘅係一款叫Saint Moritz嘅香味，前調係無花果同西柚，中調係芍藥花、茉莉同雲呢拿，而後調係白麝香，花果香加上溫暖麝香味俾人一種好似冬日太陽咁嘅感覺！「Youssoful」唔單止有香水，更加有埋香薰，大家有興趣可以去延南洞實體店朝聖！

A'ddict_{(에이딕트)}

有關注開在韓香港YouTuber嘅朋友們應該對「A'ddict」呢個牌子唔陌生， 好多人都有介紹過佢哋嘅產品。呢個牌子嘅香水特別之處在於佢分成水同油兩層，用嘅時候要搖勻用，而且配方不含酒精，所以就算噴落頭髮都無問題。而招牌銀色包裝嘅固體香水都一樣咁香，帶出街都非常方便！

唔知道大家有冇睇《換乘戀愛》呢？第二季其中一個參加者海恩早排曾經分享過，話自己最近最鍾意用A'ddict嘅「Naked Muguet 313」香水膏！呢款香水膏以初夏同天鵝為靈感調製而成，混合鈴蘭同檀香木香味，俾人一種清新乾淨嘅感覺。大家除咗可以上「A'ddict」香港官網買，咁啱嚟韓國玩嘅朋友仲可以去Olive Young試味~

YUGE_(유즈)

「YUGE」呢個牌子嘅香水喺韓國超受女仔歡迎，甚至被稱為空姐香水！除咗普通噴嘅香水，仲有出名唔會黐立立嘅固體香水，不含酒精同有害成分，方便攜帶之餘敏感肌膚都用得，唔怪得受到咁多韓國空姐喜愛~

而最受歡迎嘅香味就係呢款「Stay Forever」，前調係香橙同佛手柑，中調係鳶尾花同茉莉花，而後調就係雪松同麝香，女性化得嚟非常清新。呢款香水喺Olive Young都可以買到，非常方便！

不如DIY返一支專屬你嘅香水🌹

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購