「纛島漢江公園雪橇場」介紹
首爾市區都有雪橇場！季節限定體驗千祈唔好錯過！
Hello，大家好，我哋係由韓國人每日提供最新韓國旅行資訊嘅Creatrip。
冬天嚟韓國玩，當然唔少得要去睇雪同玩雪啦！大家又知唔知道，原來唔洗去滑雪場都可以享受冬季限定活動呢！今日就等小編帶大家去位於「纛島漢江公園」嘅雪橇場玩啦！
纛島漢江公園雪橇場(뚝섬한강공원 눈썰매장)
- 地址：서울 광진구 자양동 112
- 開放日期：2024.12.22~2025.02.16
- 開放時間：09:00 - 17:00（Break Time 12:00 - 12:40、最後入場時間 16:00）
- 價錢：₩6,000起（未滿36個月幼童免費）
- 前往方法：紫陽站（자양역）2號出口
每年冬天首爾會開設幾個小型雪橇場，等大家可以唔洗專登離開首爾都可以盡情玩雪！當中最受歡迎嘅相信一定係呢個位於纛島漢江公園嘅雪橇場，因為交通夠方便之餘環境夠靚！而最近官方終於公佈開放日期，今年將會由12月底開到下年（2025年）2月，大家有機會記住一定要去玩啦！
如果想玩雪橇嘅話需要先買飛，齋去雪橇場每張飛盛惠₩6,000，如果想玩埋其他體驗或者設施就要另外俾錢。
買完飛之後就可以去呢個booth，將你張飛交俾工作人員，之後就可以入場啦！大家要記住只可以入場一次，如果出咗去就唔可以再入返嚟㗎啦！
雖然冇落雪，不過因為呢度有整人造雪嘅機器，所以四周圍都可以睇到積雪，加埋一望無際嘅漢江景，真係好正！小編喺係平日上晝去，所以人流唔太多，可以玩得舒服啲！
纛島漢江公園雪橇場主要有兩條斜坡，一長一短，小編個人覺得長啲嗰條會更加刺激！
可能有好多朋友都冇玩過雪橇，大家首先要去攞呢個好似水泡咁嘅橡膠雪盆，然後排隊等上斜坡就得啦！因為大家一次會有好多人一齊玩，所以大約排10-15分鐘就得，比想像中快！
大家除咗可以自己玩，仲可以拖住朋友一齊玩，不過記住要注意安全啊！
終於輪到小編啦！其實越行越上嘅時候講真都真係幾緊張，不過抬頭一望就會發現四周圍景色好靚~ 條斜坡其實比想像中斜，所以瀡落嚟嘅時候好刺激！係啦，入場之後可以無限次咁玩，亦都冇時間限制，所以可以玩返夠本！
雪橇斜坡隔離仲有一片雪地，大家可以喺度玩雪~
纛島漢江公園雪橇場仲有另一個Area，入面有彈床同其他遊樂設施，仲有得釣冰魚！
玩完之後相信大家都一定會肚餓，入口附近有一個food court，因為係一個帳篷，所以行入去會好暖笠笠！
雖然只係普通小食，但係價錢唔算好貴，玩到咁攰之後食更加滋味！最後講多個小Tips俾大家聽啦，現場有提供儲物櫃，每個鐘₩1,000，如果有需要嘅話記住要提前準備好₩500硬幣啦！
❄️難得冬天飛韓國想玩盡佢?❄️
如果有更多想知嘅內容，都可以隨時留言或者dm話俾我哋知：）
Instagram：creatrip.hk