全州必食拌飯總整理
全州出名食拌飯，不過咁多間邊間先至係最好食？三代祖傳秘方、50年老店、米芝蓮認證嘅通通都有
Hello，大家好，我哋係由韓國人每日提供最新韓國旅行資訊嘅Creatrip。
韓國分咗好多唔同地區，每一個地方都有佢哋獨特美食，至於講到全州，就一定唔可以唔提拌飯！今次小編去咗好幾間，想知邊間最好食就要繼續睇埋落去啦！
全州必食拌飯總整理
1. 古宮水剌間 韓屋村店（고궁수라간 한옥마을점）
- 地址：전북 전주시 완산구 은행로 31
- 營業時間：11:00 - 20:30（Last Order 20:00）
古宮水剌間係一間擁有50年傳統嘅鋪頭，喺首爾、仁川都有分店，而為咗配合韓屋村氣氛，全州本店店面仲用咗韓屋去設計。
全州生牛肉拌飯（전주육회비빔밥）₩12,000
全州生牛肉拌飯上面放咗蕨菜、冬菇、豆芽、櫛瓜、大棗、泡菜蘿蔔絲、菠菜、桔梗、涼粉、銀杏果等食材，將所有材料撈埋一齊，只要食完一啖就會令人停唔到口！生牛肉食落一啲腥味都冇，反而係好新鮮，比起其他鋪頭，呢度菇味偏重，如果怕菇味嘅朋友，可能要考慮一吓。
全州傳統拌飯（전주전통비빕밥）₩10,000
全州傳統拌飯主要係加咗辣椒醬（一啲都唔辣）、蔬菜同絞肉，將佢哋撈埋一齊，層次豐富，大人細路都一定會鍾意食。
2. 韓國家（한국집）
- 地址：전북 전주시 완산구 어진길 119
- 營業時間：09:30 - 21:00（Break Time 16:00 - 17:00）
韓國家係一間傳到第三代嘅全州傳統拌飯餐廳，至今已經開咗30幾年，由大門行入去已經見到牆上掛滿唔少獎牌同獎狀，2011年仲獲得米芝蓮評選認證，同樣呢間鋪都係以韓屋改造而成，出面仲有一個庭院子種滿花草樹木，另一邊仲有別館，所以就算多人去都冇問題。
生牛肉拌飯（육회비빔밥）₩15,000
韓國家嘅生牛肉拌飯係以新鮮生牛肉配上蕨菜、大豆芽、櫛瓜、泡菜、菠菜、涼粉、銀杏果等食材製成，最後上面加咗啲紫菜碎。同其他鋪頭相比，價錢貴少少，生牛肉偏厚實、口味偏辣，不過呢個辣係韓國人認為黃金比例，所以怕食辣嘅朋友可能要留意一吓。
石鍋拌飯（돌솥비빔밥）₩13,000
呢度會俾超多小菜，而且每一款都好新鮮，最特別係仲有賣排骨湯、牛肉湯、大醬湯等，唔係只得拌飯。
如果大家想keep住每啖都係熱辣辣，小編建議大家可以揀「石鍋拌飯」，可能係用石鍋，帶少少飯鍋焦，更加香同好味。
3. 鐘路會館（종로회관）
- 地址：전북 전주시 완산구 전동성당길 98
- 營業時間：10:50 - 20:30
鐘路會館喺1970年營業，一入去就會見到收銀台貼滿唔少美食節目嚟拍攝嘅相，同時仲有好多藝人簽名。
全州拌飯（전주비빔밥）₩12,000
全州拌飯裡面有蕨菜、碎肉、冬菇、大豆芽、櫛瓜、蘿蔔、菠菜、涼粉、桔梗、生雞蛋等，上方加咗紫菜碎同芝麻粉，最後加少少豆苗喺上面，令顏色睇落更加豐富。比起其他鋪頭，呢度嘅麻油會落多啲，可能因為咁味道更加香濃，小編們一致認為「鐘路會館」嘅拌飯係咁多間最好味！
生牛肉拌飯（육회비빔밥）₩15,000
生牛肉肉質新鮮、量多，同雞蛋撈埋齊食，每人忍唔住食完一啖又一啖，超推薦大家一定要嚟試！
4. Giwa（기와）
- 地址：전북 전주시 완산구 어진길 15
- 營業時間：11:30 - 22:00、週末11:00 - 22:00
Giwa係全州最大規模嘅韓定食餐廳，總共有3層，呢度曾經仲獲得全州拌飯大賽大獎。同時呢度仲有賣年糕排骨、調味排骨、大麥黃花魚等定食，想一次過食到唔同美食嘅朋友，就可以嚟呢到！
坐喺窗口位仲可以欣賞到韓屋村美景，一樓有小型噴水池，夜晚開燈望住相當浪漫。
Giwa調味排骨（기와 양념갈비）₩23,000（兩人份起）
Giwa係小編去咁多間之中，氣氛相對比較高級，無論係擺設、小菜種類等都好有講究，適合帶屋企人、長輩嚟食。調味排骨肉質非常鮮嫩、每一嚿都可以食到焦香味，下面有火盤，無時無刻食都仲係熱辣辣。
小編叫完兩人份調味排骨之後，將其中一碗白飯改做拌飯（加￦10,000），呢度嘅拌飯比較特別係加蛋絲，而唔係生雞蛋，唔知係唔係因為呢個原因，食落口感會偏亁少少。
5. 家族會館（가족회관）
- 地址：전북 전주시 완산구 전라감영5길 17
- 營業時間：10:30 - 20:00、Last Order 19:50
最後一間想同大家介紹嘅係擁有三十年以上歷史嘅「家族會館」，一入到去就會見到超多獎狀掛喺牆，由外觀到內部裝修都好復古，小編係朝早10:30，啱啱開門嘅時候去，當時已經有唔少客人喺度食緊。
呢度嘅小菜多樣同豐富，同時仲送上一碗香噴噴韓式蒸蛋，總共有11款小菜，相當之多！
烤牛肉餅（떡갈비）₩12,000
家族會館每人都需要叫一份，所以除咗拌飯，小編仲叫咗佢哋招牌之一嘅烤牛肉餅，上面加咗蛋絲同蔥花，令到每一嚿食落都更加香！
食牛肉餅嘅時候，比起拌飯，小編會推薦大家同白飯一齊食，咁樣先可以食到肉餅嘅肉汁同香味。
全州拌飯（전주비빔밥）₩10,000
家族會館全州拌飯裡面有蕨菜、肉絲、冬菇、豆芽、櫛瓜、蘿蔔、菠菜、涼粉、銀杏果、豆苗等多種配料，食起嚟健康又有營養！
小編今次去全州出差就試咗5間拌飯店，唔知大家睇完，之後去全州旅行，有冇諗過想去邊一間，又或者之前食過覺得好味，但小編又冇介紹嘅呢？歡迎留言話俾我哋知一齊討論。
如果有更多想知嘅內容，都可以隨時留言或者dm話俾我哋知：）
Instagram：creatrip.hk