全州代表美食推薦
去全州就係要食呢啲！拌飯、大豆芽湯飯、炸牛肉餅等在地人推薦隱藏美食！
Hello，大家好，我哋係由韓國人每日提供最新韓國旅行資訊嘅Creatrip。
講到全州美食，大家可能第一時間會諗到「全州拌飯」！不過其實全州唔單止出名拌飯，大豆芽湯飯、牛肉餅等都好出名，今日就等小編帶大家去睇吓，有邊啲餐廳一定要去㗎啦！
全州代表美食推薦
1. 現代屋 本店（현대옥 본점）
- 地址：전북 전주시 완산구 화산천변2길 7-4
- 營業時間：24小時、全年無休
現代屋係全州最出名同賣得最好嘅大豆芽湯飯餐廳，除咗好多在地韓國人推薦之外，亦被外國觀光客評選為第一名！
大豆芽湯飯（콩나물국밥）₩8,000
大豆芽湯飯有解酒、促進消化、預防疾病等功效，而現代屋嘅大豆芽湯飯係採用國產大豆，同以魷魚片代替炸魷魚或魷魚絲，放入湯一齊煮，可以更易食到魷魚鮮甜。
本身小編對大豆芽湯飯麻麻，不過冇諗過呢度湯底好濃郁，天氣開始變凍，嚟食返一碗暖吓胃就啱哂啦！
2. 三百家（삼백집）
- 地址：전북 전주시 완산구 전주객사2길 22
- 營業時間：06:00 - 22:00（Last Order 21:30）
全州韓屋村附近嘅三百家，因為每日只賣300碗而出名，呢度主要就係賣大豆芽湯飯，好多的士司機都推，證明一定係「美食店」（맛집）。
大豆芽湯飯（콩나물국밥）₩7,000
三百家擁有70多年傳統，大家唔好睇個湯飯只得大豆芽菜同蛋，飲嘅時候好清甜，撈埋飯一齊食超好味，令人忍唔住食完一啖又一啖，如果覺得太清淡嘅話，仲可以加蝦醬去調味。
辣椒煎餃（고추군만두）₩5,000
用辣椒包住豬肉、冬粉、蔬菜等，食落一啲都唔覺得辣，一碟有8件，小編兩人以為好多，點知食食吓都食得哂！
3. 古宮水剌間 韓屋村店（고궁수라간 한옥마을점）
- 地址：전북 전주시 완산구 은행로 31
- 營業時間：11:00 - 20:30（Last Order 20:00）
古宮水剌間係一間擁有50年傳統嘅鋪頭，喺首爾、仁川都有分店，而為咗配合韓屋村氣氛，全州本店店面仲用咗韓屋去設計。
全州生牛肉拌飯（전주육회비빔밥）₩12,000
全州生牛肉拌飯上面放咗蕨菜、冬菇、豆芽、櫛瓜、大棗、泡菜蘿蔔絲、菠菜、桔梗、涼粉、銀杏果等食材，將所有材料撈埋一齊，只要食完一啖就會令人停唔到口！生牛肉食落一啲腥味都冇，反而係好新鮮，比起其他鋪頭，呢度菇味偏重，如果怕菇味嘅朋友，可能要考慮一吓。
全州傳統拌飯（전주전통비빕밥）₩10,000
全州傳統拌飯主要係加咗辣椒醬（一啲都唔辣）、蔬菜同絞肉，將佢哋撈埋一齊，層次豐富，大人細路都一定會鍾意食。
4. 校洞烤牛肉餅（교동떡갈비）
- 地址：전북 전주시 완산구 은행로 52
- 營業時間：11:00 - 20:30
校洞烤牛肉餅喺全州韓屋村入面，因為佢太出名，小編已經專登避開多人時間去，點知去到嘅時間1樓都坐滿人，2樓係團體座位，可以俯視韓屋村美景！
校洞烤牛肉餅兩人份（교동떡갈비）₩28,000
校洞烤牛肉餅用嘅係100%韓豬，所以一啲腥味都冇，一上到檯已經可以聞到超香，上面仲撒上芝麻、配洋蔥一齊食超香，怕滯嘅話仲可以用生菜包住食。
5. 真美家（진미집）
- 地址：전북 전주시 완산구 노송여울2길 106
- 營業時間：17:00 - 01:00、每月第一、三個星期日休息
真美家主要係賣炭烤豬肉、紫菜包飯同韓式烏冬等，唔少韓國人都評為「唔食會後悔嘅餐廳」。
炭烤豬肉（연탄 돼지불고기）₩12,000
紫菜包飯（김밥）₩2,000
魚糕（오뎅）₩2,000
一入到鋪頭，已經會聞到炭香，望住老闆不停炒，小編睇到流哂口水，令人更期待係咩味！一人份炭烤豬肉份量都算多，本身以為會好辣，點知完全冇呢個感覺。
真美家最特別食法就係用生菜將包飯同肉一齊包住食，特別口感就連韓國人都大讚第一次食到咁好味嘅組合。如果怕滿，可以叫魚糕湯！
6. 老兵刀削麵（베테랑 칼국수）
- 地址：전북 전주시 완산구 경기전길 135
- 營業時間：09:00 - 20:00
老兵刀削麵喺1977年開張，擁有全州「最好食刀削麵」稱號，聽講只要一到放假日子就要拎號碼牌等位先食到。
刀削麵（칼국수）₩8,000
刀削麵湯底好濃郁，主要用蛋同紫菜熬煮而成，上面加咗辣椒粉同紫蘇芝麻粉，令味道更香，麵條又薄又圓，食落好爽口！唯一美中不足嘅係麵份量太多，食到最後幾乎俾麵吸哂啲湯汁。
餃子（만두）₩5,500
只食麵冇肉係唔係覺得太單調？不如就叫份餃子啦！皮薄多餡，一份份量超多，CP值超高。
唔知以上美食，大家睇完之後會唔會去全州都想食呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
