Hello，大家好，我哋係由韓國人每日提供最新韓國旅行資訊嘅Creatrip。
唔少人聽到全州呢個地方都可能會以為係一個好傳統地方，但其實呢度有唔少年青人都會去嘅打卡餐廳同Cafe，而家就等小編逐一為大家介紹啦！
全州必去打卡Cafe/餐廳
1. 多雨郎（다우랑）
- 地址：전북 전주시 완산구 태조로 33
- 營業時間：10:00 - 21:00、星期五、六10:00 - 21:30
多雨郎位於全州韓屋村慶基殿附近，係一間專門賣手工餃子嘅地方，呢度幾時去都係超多人，不過可惜呢度唔多位，好多人可能買完外賣拎出去街邊坐櫈食。
櫃檯展示咗各式各樣餃子，有豬肉、蝦、炸餃子、餃子串等，每件睇落好吸引！
蝦餃子（새우만두）₩3,500
韭菜餃子（부추만두）₩2,500
小編一共叫咗五款餃子，其中蝦餃子同韭菜餃子係比較好食，排骨餃子（왕갈비만두）一份₩3,500， 皮有啲厚、餡偏甜；大蒜麵包蝦（마늘멘보샤）一份₩3,000，不過味道真係有啲怪...忌廉餃子串（크림꼬지만두）食落有啲似烤牛肉加層忌廉，口感特別，都值得一試！
2. 全州是煎酒（전주는전주）
- 地址：전북 전주시 완산구 태조로 31
- 營業時間：10:30 - 23:00
全州是煎酒位於全州韓屋村正中心，總共有2層，空間大，大家可以喺度品嘗美食同時試埋傳統酒，順便欣賞埋韓屋村街道景色。
全州套餐（전주 SET）₩40,000
呢度每一檯都會有一部Tab，大家可以自己叫完之後再去一樓拎餐，今次小編叫咗佢哋主打菜「全州套餐」，包咗一份豬肉煎餅、大東輿地圖酒同涼拌橡實凍，望落相當豐盛。
「大東輿地圖酒」非常有特色，用咗地圖做托盤，每一個地區對應唔同嘅酒，同時仲附上一粒骰仔俾大家邊飲酒邊玩，增添飲酒樂趣。
豬肉煎餅出面用咗薄薄一層蛋液去包住，配上佢香辣醬料一齊食，令人忍唔住食完一嚿又一嚿，怕油膩嘅話，可以加涼拌橡實凍同生菜一齊食。
3. PICOLO（피콜로）
- 地址：전북 전주시 완산구 전주객사1길 42
- 營業時間：11:30 - 21:30（Last Order 20:30 ）、Break Time 15:00 - 17:00
PICOLO喺一條小巷入面，大家可能要細心啲先搵到，餐廳內部主要用咗白色去裝修，溫馨安靜氣氛，好適合情侶約會嚟呢到。
PICOLO意大利飯（피콜로 리소토）₩15,000
PICOLO意大利飯係以忌廉佐羅勒香蒜醬為基底，裡面除咗白飯之外、仲可以食到大米同果仁粒，同時加咗帕達諾芝士，醬汁食落好濃郁，上面煎好嘅香嫩牛排入口即溶，絕對係大人細路都鍾意食。
火箭菜巴馬火腿Pizza（루꼴라 프로슈토）₩17,000
Pizza加咗蕃茄醬、水牛芝士、巴馬臣芝士同番茄仔，最後加咗橄欖油調味，所以每一啖都食到香濃嘅味道。
4. 千尋（치히로）
- 地址：전북 전주시 완산구 전주객사3길 73-56
- 營業時間：11:00 - 22:00、Break Time 15:30 - 16:30
千尋係一間日式餐廳，最近好多年青人去打卡嘅餐廳，只要一到Lunch Time，就會有唔少人。
三文魚丼（사케동）₩14,000
三文魚晶瑩剔透，用海苔或生菜一齊食超爽口。
天丼（텐동）₩13,000
如果想一次過食到唔同口味，咁可以揀佢哋鋪頭超有人氣嘅「天丼」！裡面有炸蝦、秋葵、金菇、蟹柳、雞蛋、茄子等，配上佢哋甜甜醬汁，食落冇咁油膩。
5. ireuri咖啡（카페 이르리）
- 地址：전북 전주시 완산구 은행로 69
- 營業時間：09:00 - 21:00（Last Order 20:30）、週末09:00 - 22:00（Last Order 21:30）
想要徹底感受韓屋氣氛？咁去「ireuri咖啡」就冇錯啦！呢間係全州最大規模韓屋Cafe，無論室內定室外裝修都係古色古香。
店中間有一個種滿花卉嘅庭院，滿滿傳統復古感，令人好似坐住時光機返番去朝鮮時代咁。
牛奶雪糕（밀크아이스크림）₩6,500
年糕牛角包窩夫（떡 크로플）₩11,000
橙梳打（오렌지에이드）₩7,500
雪糕好香牛奶味，不過食太多會覺得太甜，橙梳打裡面放咗片橙，有時仲會食到橙肉，飲落好清爽，年糕牛角包窩夫係將韓國傳統甜品「年糕」同近年嚟受MZ世代歡迎嘅「牛角包窩夫」結合而成，一份有3個口味（艾草、紅豆、蕃薯），點埋蜜糖一齊食，口感更加豐富。
6. 紅柿宮 客理團路 本店（홍시궁 객리단길 본점）
- 地址：전북 전주시 완산구 전주객사1길 94
- 營業時間：12:00 - 22:30（Last Order 22:00）
紅柿宮係以賣柿做甜品為主，喺首爾等地都有分店，而客理團路本店係以韓屋設計。
紅柿雪花冰（홍시눈꽃빙수）₩13,800
軟綿綿牛奶雪花冰上面鋪滿紅柿，中間仲會有年糕粒，食吧時候好有驚喜！如果想令刨冰更快融，或者食更濃郁，可以加隔離嘅紅柿醬，每一啖都會係柿香。
紅柿椰子沙冰（홍시코코넛스무디）₩6,800
當香甜紅柿配上清爽椰子會擦出咩火花呢？口感好清爽，適合炎炎夏日飲返杯，美中不足嘅係上面嘅紅柿太冰，食嘅時候有啲唔方便，不過整體嚟講都係幾推薦。
以上呢幾日都係全州最熱門打卡餐廳同Cafe，大家下次去全州，唔好唔記得加佢哋入必食清單入面啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
