全州先有嘅特色美食
以後去全州唔再只係識得食拌飯！超多在地美食等緊你！
Hello，大家好，我哋係由韓國人每日提供最新韓國旅行資訊嘅Creatrip。
韓國一直有一個講法係「全羅道」係美食聚集地，而全州更係以美食聞名嘅城市之一。特別係淡水蟹、黃涼粉、短吻小鰾鮈、蘿蔔、水芹、煙草、櫛瓜、蘿蔔、大豆芽、柿又被稱為全州10味，所以唔少全州人都會利用呢啲食材去製作出多款美味佳餚，今次小編就整理好一啲只有全州先食到嘅美食清單俾大家！
全州先有嘅特色美食
1. Gilgeoriya 韓屋村店（길거리야 한옥마을점）
- 地址：전북 전주시 완산구 경기전길 124
- 營業時間：09:30 - 20:30、星期五、六09:30 - 21:00
Gilgeoriya係一間專賣法包漢堡嘅鋪頭，只要一到週末就會大排長龍，加上每日食材材料有限，賣完就冇，如果想食嘅朋友，一定要早啲到。
店入面冇檯，只係得長櫈俾大家坐底食。
法包漢堡（바게트 버거）₩5,000
法包漢堡本身已經整好，裡面有芝士、番茄醬、豬肉、野菜等、因為有埋青陽辣椒，所以食落會有啲辣，外皮酥脆，內餡豐富，食完超有飽肚感！
2. 趙占禮南門血腸（조점례남문피순대）
- 地址：전북 전주시 완산구 전동3가 2-198
- 營業時間：06:00 - 22:00
趙占禮南門血腸位於在市場入面，由韓屋村一帶行過去大約10分鐘，店面大，約有100個座位，好多美食節目都有去採訪過。
血腸湯飯（순대국밥）₩8,000
一碗血腸湯飯只係需要￦8,000，裡面有超多血腸同內臟，湯底辣辣地，唔會食到豬腥味，冬天嘅時候食返一碗，個人即刻暖笠笠。
血腸 細份（피순대 소）₩13,000
細份血腸雖然要₩13,000，但份量都算足，加少少醋醬，再用紫蘇葉包住食，簡直係人間美味！
喺韓國食血腸有一個小學問，首爾係點鹽、慶尚道點燒肉醬、全羅道係點醋醬！唔知大家有冇全部試過哂呢？
3. 真味飯店（진미반점）
- 地址：전북 전주시 완산구 전라감영3길 12-3
- 營業時間：10:00 - 21:30、每個月第一、三個星期三休息
真味飯店老闆係華僑，識講中文，唔需要怕溝通唔到，而且呢度有兩層，唔怕會冇位。
肉味炸醬麵（육미짜장）₩8,000
呢度嘅炸醬有種甘甜味，唔會太鹹，麵夠爽口，令人一試愛上。
水炸醬（물짜장）₩9,000
只要講到炸醬麵，大家都可能會諗到係黑色醬，但水炸麵醬汁係透明（有啲似係燴飯嘅汁），裡面加咗好多海鮮、菇類、木耳等營養食材，食落有啲辣，麵一樣夠爽口，未試過嘅朋友可以試吓！
4. 南諾排骨 本店（남노갈비 본점）
- 地址：전북 전주시 완산구 한지길 24
- 營業時間：11:00 - 22:00、每個月第二、四個星期三休息
南諾排骨喺1972年開張，喺首爾、仁川各地都有分店，全州本店外觀雖然睇落唔算好吸引，不過通常呢啲都係隱藏美食店！
南諾水排骨（남노물갈비）₩14,000
南諾水排骨要兩人份以上先可以叫，份量多，除咗有排骨之外，仲會有大豆芽菜、冬粉、冬菇等，湯汁有啲似係辣炒豬肉去煮咁。如果食完覺得唔夠飽，可以好似小編咁叫多碗白飯（₩1,000）去炒，加少少紫菜同蘿蔔等，食落會更香更好味。
5. 豐年製菓（풍년제과）
- 地址：전북 전주시 완산구 팔달로 141
- 營業時間：08:00 - 22:00
講到買全州手信，相信大家一定都知豐年製菓，佢哋最出名就係朱古力批。
豐年製菓本店非常大，一共有四層，2樓係Cafe、3樓係展示間、4樓設有帳篷露台。呢度唔單止多唔同口味朱古力批，同時仲有各式各樣麵包同甜品等。
手製朱古力批（수제 초코파이）₩2,300
平日去嘅話，鋪頭唔算多人，佢哋朱古力批之咁多人買，係因為中間加咗忌廉、士多啤梨醬同核桃，口感層次相當豐富。
6. PNB豐年製菓（PNB풍년제과）
- 地址：전북 전주시 완산구 팔달로 180
- 營業時間：08:00 - 22:30
PNB豐年製菓自1951年開業以嚟，係全州唯一一間祖傳三代嘅朱古力批店，除咗佢哋主打嘅朱古力批之外，用生薑同花生等食材製成嘅餅乾一樣好有人氣。
怕返到酒店會口痕，可以提前買定啲返去食。
PNB原味朱古力批（PNB 오리지널초코파이）₩2,300
同啱啱介紹嘅豐年製菓有啲唔同，呢度鋪面睇落會有啲舊，2樓係可以食嘢嘅地方，可以睇到甜品製作過程，盒裝送俾人，更加係大方得體。
小編兩款都試過，最後發現PNB豐年製菓內餡果醬比較多，食落會濕潤啲，而豐年製菓相對嚟講有少少乾，所以個人會比較推薦PNB豐年製菓嘅朱古力批。
以上就係得全州只有嘅美食，當中有冇邊一款係最吸引大家呢？歡迎留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
