大邱「西門市場」介紹
堪稱全大邱最受歡迎嘅景點！探索「西門市場」每一個角落！感受傳統市場帶嚟嘅魅力！
Hello，大家好，我哋係由韓國人每日提供最新韓國旅行資訊嘅Creatrip。
去到每一個國家必定要做嘅當然係體驗一下當地嘅傳統文化啦！咁究竟應該點樣體驗呢？行下傳統市場就最好不過啦！講到大邱最出名嘅景點就係「西門市場」，由街頭小食、生活用品、棉被到乾貨等等都有！因為西門市場某程度上比首爾大部分嘅傳統市場都要大，對於第一次去大邱嘅朋友嚟講可能會有啲陌生！今日就等小編同大家探訪一下「西門市場」啦！
大邱「西門市場」
대구 서문시장
- 地址：대구 중구 큰장로26길 45
- 時間：09:00至19:00；第一、第三個星期日休息
喺地鐵站出嚟，你就會見到人來人往嘅人潮，向住人群嘅方向行其實就可以見到「西門市場」啦！
雖然小編唔係第一次嚟西門市場，但係都好怕會蕩失路，所以跟住呢個導覽圖就真係非常之方便！
呢度就係大邱嘅西門市場，真係好大，感覺有啲似首爾嘅廣藏市場同望遠市場！
呢啲乾貨係咪睇起上嚟有啲嚇人呢？不過行傳統市場見到呢啲就真係樂趣嚟！
轉入西門市場嘅美食巷仔，呢類扁餃子（7至8個₩3,000）佢係大邱嘅特色美食之一，特點係脆口得嚟帶有薄餡嘅半月型，無論係點醬食定係就咁食都好好味！
之後小編就去咗試呢個葉型餃子（5個₩5,000），有兩種醬汁畀大家揀。
左邊嘅喺一般醬油，紅色嘅就係辣醬，不過小編唔係太食到辣所以就揀咗醬油味！
如果大家係素食者嘅話都可以試下啊，因為裡面只係塞滿咗冬粉同埋蔬菜！
跟住要介紹嘅就係呢個雜菜糖餅，小編揀咗最多人排隊嘅舖頭，等咗大概五分鐘就食到啦！
一咬落去，酥脆嘅雜菜糖餅喺嘴裡面化開，一個都係₩1,000咋，就算一次食兩三個都冇問題！
睇完小編喺西門市場品嚐嘅街頭小食之後，一齊睇下大邱嘅西門市場裡面隱藏住邊啲美食店家啦！
Eden飯捲（에덴김밥）
- 地址：대구 대신동 115-400（서문시장 5지구 3호）
- 時間：05:00至19:00；星期日休息
如果大家係想搵個地方坐下，食下好嘢嘅話，小編會推薦呢間「Eden飯捲」。
佢哋嘅招牌菜係雞蛋飯捲，其他Menu好似拉麵（₩3,000）、刀削麵（₩5,000）等等，都係韓國傳統市場之中成日見到嘅美食。
揀好位之後直接同職員落單就ok，記得要先畀錢啊！
小編就叫咗一份雞蛋飯捲（₩4,000），仲有冷拌麵（₩5,000），其他水、小菜等等都係自助。
落完單之後到上菜大概需要十分鐘，小編試咗真係覺得將拌面加埋泡菜一齊食先係最好食！
呢度嘅雞蛋飯捲普普通通，不過味道都係好味嘅，亦係西門市場必食之一！
西門市場夜市（西門夜市）
- 地址：同西門市場
- 時間：約19:00後開始營業
朝早行完之後，會唔會好奇夜晚係點呢？
小編朝早去完一轉之後去咗一間cafe坐，之後再返嚟睇下夜晚會變成點，發現唔少店舖都已經開始要排長龍！
西門夜市嘅選擇唔多，基本上都係炸物、章魚、雞肉串、魚糕同埋飯捲等等！
見呢間Mr.南川雞肉串（Mr.남천꼬지）排曬長龍，小編都忍唔住要買返串！
雞肉串有兩種，就係辣同唔辣，買完之後配支啤酒真係一大享受！
最後小編仲叫咗呢個「三層肉飯捲（삼겹살김밥）」，一份₩4,000，建議大家加肉，都只係比多₩900！
以上就係小編最推薦西門市場嘅美食！如果大家鍾意嘅話就記得要試下啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk