2026仁川機場巴士路線、時間表、車費總整理

Hello，大家好，我哋係由韓國人每日提供最新韓國旅行資訊嘅Creatrip。

大家無論喺嚟韓國定返香港都一定會經過仁川機場，但係人生路不熟，又未必個個都識韓文，要點樣先可以順利來往機場呢？今日小編就為大家重新整理咗2026年最新嘅仁川機場巴士資訊，巴士路線、車費、班次、機場搭車位置全部都有，亦會教你點樣按自己住嘅地區揀最方便嘅巴士。最近要嚟玩嘅朋友記住要mark低啦！

※巴士班次、票價及停靠車站有機會因道路情況、營運安排而調整，實際以仁川機場及各巴士營運公司最新公告為準。

一大班人嚟玩？
包車出首爾仲抵過搭機場巴士！

[스팟] LANE4 仁川/金浦機場接送服務（私人包車）

[스팟] 樂天仁川/金浦機場接送服務

[스팟] Solati仁川/金浦機場→首爾12人座豪華包車接送服務

[스팟] 首爾⇌仁川機場國際的士 

仁川機場巴士攻略

仁川機場巴士車票幾多錢？可以喺邊度買？

大部分來往首爾市區嘅仁川機場巴士，成人票價通常係₩17,000，部分高級或特定路線會去到₩18,000。而根據部分官方營運資訊，6歲至12歲兒童票價通常會較平（₩12,000起），建議大家有需要嘅話，可以同司機講聲。

而付款方法方面，如果你係喺首爾市區去仁川機場，上車嘅時候可以好似普通巴士咁用現金或者好似T-Money咁嘅交通卡俾錢；如果你係喺仁川機場去首爾市區，就可以喺售票處用現金買車飛，或者喺自助售票機用韓國信用卡/扣賬卡俾錢。根據小編經驗，售票處同自助售票機都唔接受用海外信用卡付款，所以記住要準備定現金啦！

💡小編小貼士：最近好多朋友都會買氣候同行卡去搭地鐵同巴士，但係要記住機場巴士用唔到，建議隨身準備定現金或者一般交通卡！

仁川機場巴士售票處位置

仁川機場T1售票處(紅色圓點)

仁川機場T2售票處(紅色圓點)

或者如果大家會搭6100、6103號仁川機場巴士，可以直接喺Creatrip平台上用繁體中文同港幣預約，咁就唔需要擔心到時候冇位或者唔知用咩俾錢好啦！

[스팟] 6100號機場巴士單程車票（仁川機場T1出發）

[스팟] 6100號機場巴士單程車票（仁川機場T2出發）

[스팟] 6103號機場巴士單程車票（仁川機場T1→COEX）

[스팟] 6103號機場巴士單程車票（仁川機場T2→COEX）

[스팟] 6103號機場巴士單程車票（COEX→仁川機場T1/T2）

搭機場巴士去仁川機場要預幾點出發？

小編自己經常來回香港同韓國，根據經驗，如果你喺首爾市區搭機場巴士返仁川機場，一般建議最少預留2.5至3小時前到機場。如果撞正繁忙時間、週末、落雨天，或者你住喺江南等較易塞車區域，最好再預鬆少少。

譬如話你班機係中午12點起飛，建議以10點半前到機場為目標，再按你所住地區推算返上車時間。例如如果住明洞，預到最鬆通常要搭1個半車到，咁最遲9點就要上到機場巴士！

💡小編小貼士：建議出發當日提早執好行李，然後用Naver Map再確認即時班次，以免因為交通路面情況而miss咗班車！想知點用Naver Map查詢機場巴士班次可以參考以下呢條片：

Instagram에서 이 게시물 보기

Creatrip 分享最新流行韓國資訊🇰🇷(@creatrip.hk)님의 공유 게시물

仁川機場去首爾搭機場巴士定AREX比較好？

講起仁川機場來回首爾嘅公共交通工具，最多人會搭嘅兩種就係機場巴士同AREX機場快線直通車。好多人可能會問到底機場巴士定AREX比較方便，小編會答你：需要視乎你住宿喺邊度、同邊個一齊嚟，同你搭車嘅時間！

仁川機場巴士 VS AREX直通車快速比較表

想瞭解更多有關仁川機場AREX直通車資訊？

[블로그] 首爾去仁川機場AREX直通車攻略（2026最新版）

想知應該搭邊架機場巴士要點查？

• 查詢網站：仁川機場官網（中文版）

大家如果想要再confirm清楚有關機場巴士嘅資訊，可以參考仁川機場官方網站，除咗可以check到來往首爾嘅機場巴士路線同埋時間表，仲可以睇到來往首爾以外城市嘅巴士路線。

不過上述所講嘅時間表，係機場巴士喺仁川機場出發嘅時間，如果大家係打算喺首爾市區搭機場巴士入機場，但又想知幾時有巴士，可以好似頭先所講，用Naver Map之類嘅交通App，咁就可以實時睇到架巴士開到邊、幾時會到站等等嘅資訊啦！

仁川機場去明洞、弘大要搭邊架機場巴士？

但仁川機場巴士路線超多，如果唔想逐條路線睇可以去到邊，不妨參考以下表格：

如果你要去嘅地區呢個表度冇，或者想知道你要搭個班機場巴士幾多錢、要喺邊度上車，可以參考以下小編幫大家整理嘅詳細資訊！

仁川機場巴士6001 | 明洞、東大門

• 行經：仁川機場T2、仁川機場T1、新龍山站、三角地站、南大門市場（會賢站）、明洞、忠武路站、東大門歷史文化公園站
• 車費：₩17,000
• 班次：大約30-40分鐘一班

💡小編小貼士：如果你住明洞附近而又想一程車直達市區，6001機場巴士會係最常見嘅選擇之一；如果住宿位於明洞、會賢、忠武路、東大門一帶都可以搭呢架車！

仁川機場巴士6002 | 弘大、新村、東大門

• 行經：仁川機場T2、仁川機場T1、合井站、弘大入口站、新村站、梨大站、光化門、鐘路、東大門站、東廟站、清涼里站
• 車費：₩17,000
• 班次：大約15分鐘一班

💡小編小貼士：如果你住喺弘大入口站附近，6002機場巴士通常比AREX直通車再轉地鐵更加方便，尤其係拖住行李嘅時候（非繁忙時間搭一般機場鐵路都會慢過機場巴士）；另外雖然班次密，但繁忙時段上落客都多，建議唔好太遲先出門，如果唔係等幾班車都上唔到就可能會趕唔到飛機！

仁川機場巴士6003 | 新林、首爾大

• 行經：仁川機場T2、仁川機場T1、金浦機場、江西區、木洞站、九老站、九老區廳、大林站、新林站、首爾大學
• 車費：₩16,000
• 班次：大約30分鐘一班

💡小編小貼士：雖然呢條路線會經過麻谷、江西區，但住喺江西區嘅小編可以話你知一般機場鐵路會比較快！但如果你係會去到九老、新林、首爾大方向，6003機場巴士就啱曬你啦！

仁川機場巴士6004 | 光明KTX、加山

• 行經：仁川機場T2、仁川機場T1、光明KTX站、始興十字路口、衿川區廳、加山數碼園區站等
• 車費：₩17,000
• 班次：大約30-50分鐘一班

💡小編小貼士：如果你會直接搭KTX去其他城市，而又會經過光明站，搭6004機場巴士會快過你搭車去首爾站再轉KTX！

仁川機場巴士6005 | 上岩DMC、市廳

• 行經：仁川機場T2、仁川機場T1、數碼媒體城站、西大門區廳、Grand Hilton Hotel、獨立門站、Shilla Stay、首爾市廳等
• 車費：₩17,000
• 班次：每日10班車

💡小編小貼士：好多追星族都會喺快閃韓國嘅時候去/住上岩DMC附近，不過6005機場巴士班次比較疏，如果唔係班次時間啱啱可以match到，建議搭一般機場鐵路列車會比較快！

仁川機場巴士6006 | 清潭、蠶室

• 行經：仁川機場T2、仁川機場T1、狎鷗亭站、清潭洞、COEX（三成站）、綜合運動場、蠶室新川站
• 車費：₩17,000
• 班次：大約30-60分鐘一班

💡小編小貼士：如果今次嚟住宿同主要活動範圍係狎鷗亭、清潭，或者打算去睇演唱會，住宿會喺蠶室附近，呢條路線會方便過搭地鐵！不過江南一帶比較容易塞車，記住要預留多啲時間。

仁川機場巴士6007 | 永登浦、汝矣島

• 行經：仁川機場T2、仁川機場T1、堂山站、永登浦Time Square、永登浦站、首爾康萊德酒店、首爾費爾蒙大使酒店、汝矣渡口站、Kensington Hotel、國會議事堂/GLAD Hotel
• 車費：₩17,000
• 班次：大約60分鐘一班

💡小編小貼士：呢條仁川機場巴士路線一般觀光客未必會搭，但如果今次係去公幹，會住金融區或者汝矣島附近大型酒店，可能會幫到你！

仁川機場巴士6009 | 新沙、江南

• 行經：仁川機場T2、仁川機場T1、新沙站、論峴站、新論峴站、江南站、驛三洞、道谷站、三星首爾病院
• 車費：₩17,000
• 班次：大約30-40分鐘一班

💡小編小貼士：因為6009機場巴士會途徑新沙、驛三、論峴等江南一帶地區，繁忙時間比較容易塞車。如果你係由首爾市區去仁川機場，記住要預留多啲時間（小編自己曾經試過放工去搭，喺江南同高速公路塞咗1~2個鐘）；另外6009同6020機場巴士都會途徑江南、新沙附近，不過6009會比較近同快到！

仁川機場巴士6010 | 漢南、往十里

• 行經：仁川機場T2、仁川機場T1、二村洞、漢南站、金湖十字路口、往十里站（城東區廳）
• 車費：₩17,000
• 班次：大約1個鐘一班

💡小編小貼士：6010機場巴士班次偏疏，如果住宿附近有相關巴士站就都可以搭，但如果係要行一段路嘅話，揀其他交通工具可能會比較快！

仁川機場巴士6011 | 景福宮、安國

• 行經：仁川機場T2、仁川機場T1、麻浦區廳站、延世大學、梨花女大後門、景福宮站、安國洞、昌德宮、漢城大入口、仁德大入口
• 車費：₩17,000
• 班次：大約1個鐘一班

💡小編小貼士：如果你住三清洞、安國、景福宮一帶，6011機場巴士會比先去首爾站再轉車更加直接，如果住宿啱啱好喺沿線附近嘅話可以優先考慮！

仁川機場巴士6013 | 首爾林、建大

• 行經：仁川機場T2、仁川機場T1、首爾林、建大入口站、兒童大公園、君子站、長安洞
• 車費：₩17,000
• 班次：大約50分鐘一班

💡小編小貼士：可能大家見到會經過首爾林，住宿揀咗喺附近或者聖水周邊嘅朋友們會打算搭6013機場巴士去，但小編建議大家留意實際步行距離，唔一定每間酒店都近巴士站。

仁川機場巴士6015 | 明洞、忠武路

• 行經：仁川機場T2、仁川機場T1、麻浦站、忠正路站、會賢站、乙支路2街站、忠武路站、明洞站
• 車費：₩17,000
• 班次：大約30分鐘一班

💡小編小貼士：如果大家會住明洞商圈附近，除咗6001，6015機場巴士都可以列入考慮範圍之中，建議大家打開地圖睇自己揀住宿附近嘅巴士站會有邊班機場巴士停靠再買飛，唔好見到會經過明洞就即刻揀！

仁川機場巴士6017 | 九老、首爾大

• 行經：仁川機場T2、仁川機場T1、波拉梅公園、九老數碼園區站、新大方站、新林站、首爾大入口站、首爾大學
• 車費：₩17,000
• 班次：大約1個鐘一班

💡小編小貼士：呢條路線比起一般觀光客，通常都係住韓國嘅朋友們搭得比較多！

仁川機場巴士6019 | 汝矣島、內方

• 行經：仁川機場T2、仁川機場T1、汝矣島、賽江站、崇實大入口站、二水站、內方站
• 車費：₩17,000
• 班次：大約1個鐘一班

💡小編小貼士：呢條路線同樣比較少遊客會搭，除非住宿直接喺車站附近，否則搭其他交通工具會方便啲！

仁川機場巴士6020 | 江南、高速巴士站

• 行經：仁川機場T2、仁川機場T1、新盤浦站、高速巴士客運站、教大站、江南站、驛三站
• 車費：₩17,000
• 班次：大約45分鐘一班

💡小編小貼士：因為6020機場巴士同樣會經過江南中心地帶，所以繁忙時間建議要提早出發；另外仁川機場本身就有唔少高速巴士可以搭，但如果你需要去到高速巴士客運站，建議你都可以搭6020去！

仁川機場巴士6100 | 蘆原、忘憂

• 行經：仁川機場T2、仁川機場T1、蘆原站、孔陵站、中和站、忘憂站
• 車費：₩18,000
• 班次：大約30-45分鐘一班

💡小編小貼士：如果大家會去首爾北部，6100機場巴士可以幫到你！呢條路線亦停靠蘆原站，連接地鐵4號線，可直接搭地鐵去明洞、東大門等；同時亦會途徑中和站巴士站，可轉乘地鐵7號線，大約20分鐘就可以去到江南。大家可以事先透過Creatrip買巴士車飛，咁就唔怕到時候冇位坐啦！

[스팟] 6100號機場巴士單程車票（仁川機場T1出發）

[스팟] 6100號機場巴士單程車票（仁川機場T2出發）

仁川機場巴士6103 | COEX

• 行經：仁川機場T2、仁川機場T1、三成站、COEX都心機場
• 車費：₩18,000
• 班次：大約30分鐘一班

💡小編小貼士：如果你目的地喺COEX附近，6103機場巴士會比一般江南線更直接同快去到！

買定飛就唔洗擔心冇位啦👇🏻

仁川機場巴士6200 | 蠶室、江東

• 行經：仁川機場T2、仁川機場T1、蠶室站、江東站、千戶站、河南黃山
• 車費：₩17,000
• 班次：大約25~65分鐘一班

💡小編小貼士：6006機場巴士都會經過蠶室，建議大家睇清楚住宿附近個巴士站有邊架機場巴士會停！

仁川機場巴士6300 | 水西、奧林匹克公園

• 行經：仁川機場T2、仁川機場T1、水西站、可樂市場站、奧林匹克公園站、高德站
• 車費：₩17,000
• 班次：大約30分鐘一班

💡小編小貼士：水西有SRT站、奧林匹克公園站附近有演唱會場地，如果你今次係因為會去睇演唱會所以住宿喺附近，或者想直接轉乘SRT去其他城市，可以考慮搭6300機場巴士！

仁川機場巴士6701 | 光化門、市廳

• 行經：仁川機場T2、仁川機場T1、麻浦站、孔德站、乙支路入口站、明洞、光化門、市廳
• 車費：₩18,000
• 班次：大約30分鐘一班

💡小編小貼士：6701機場巴士會經過好多遊客都會去嘅地區，而且班次算密，如果住宿揀喺上述呢幾個地區嘅話可以考慮搭！

仁川機場巴士6702 | 首爾站、東大門

• 行經：仁川機場T2、仁川機場T1、麻浦站、孔德站、首爾站、南山（Grand Hyatt Seoul）、獎忠洞、東大門、DDP
• 車費：₩18,000
• 班次：大約60分鐘一班

💡小編小貼士：呢條路線會途徑首爾站、南山、東大門、DDP等主要首爾地標，而大部分朋友們都會揀呢度附近嘅住宿。不過除非係exactly住機場巴士站附近，如果唔係嘅話去首爾站小編會建議搭AREX直通車！

仁川機場巴士6703 | 新論峴、三成

• 行經：仁川機場T2、仁川機場T1、西萊村入口、新論峴站、宣靖陵站、奉恩寺站、三成站、論峴洞
• 車費：₩18,000
• 班次：大約60-90分鐘一班

💡小編小貼士： 如果你住新論峴或者三成附近，6703機場巴士相對地中途停站次數比較少，附近有相關巴士站嘅話可以考慮搭！

如果凌晨先到機場有咩車可以搭？

大家可以見到上述仁川機場巴士大部分最遲都係去到夜晚11點幾就會開出尾班車，呢個時候大家可能會擔心搭夜機或者凌晨機會冇車可以搭出首爾。不過仁川機場有提供4班深夜機場巴士，亦都有深夜的士同開到凌晨12點幾嘅機場鐵路一般列車。如果想知道更多詳情，大家可以參考以下呢篇仁川機場夜間交通攻略！

[블로그] 2025仁川機場夜間交通攻略

仁川機場巴士常見問題FAQ

Q1. 想搭仁川機場巴士去明洞，搭6001定6015會方便啲？

A：如果你住喺明洞、會賢、忠武路一帶，6001同6015都可以考慮。一般嚟講，近明洞、東大門方向會建議揀6001；近明洞站、忠武路、會賢一帶就可以優先考慮6015。 不過最後都係要睇你住宿位置喺邊，落車後要行幾耐去決定。

Q2. 仁川機場巴士去弘大、新村有咩選擇？

A：如果你住弘大、新村、梨大附近，最常見又最容易搭嘅通常係6002。對第一次自由行、唔想轉太多次車嘅旅客嚟講會比較方便。

Q3. 去首爾市區搭仁川機場巴士定AREX方便啲？

A：如果你行李多、帶小朋友，或者唔想再轉地鐵，通常仁川機場巴士會更方便；如果你想快啲入市區，而且酒店近地鐵站，AREX就可能更適合。

Q4. 仁川機場巴士可唔可以用T-money上車？

A：一般嚟講可以用現金或者T-money等交通卡付款。不過唔同路線安排可能略有不同，建議上車前留意現場指示會更穩陣；不過要注意氣候同行卡唔可以用嚟搭機場巴士！

Q5. 由首爾市區搭仁川機場巴士去機場，要預早幾多出發？

A：一般建議最少預留2.5至3小時前到機場。如果你喺江南、蠶室、汝矣島等較易塞車地區出發，最好再預鬆少少。

Q6. 如果搭朝早機或者凌晨機，應該比平時再預早幾多出發？

A：建議比平時再預鬆30分鐘至1小時。因為除咗車程，仲要預返辦理登機、寄行李同過海關時間，旺季或者週末更加要保守啲。

Q7. 如果班機好早或者好夜，仲有冇仁川機場巴士可以搭？

A：要視乎你住嘅地區同路線而定。部分機場巴士首班車較早、尾班車較夜，但唔係每條線都啱超早機或深夜機，建議同時比較AREX、深夜交通、的士或者機場接送服務。

Q8. 點樣睇仁川機場巴士最新時間表同即時班次？

A：想查路線、票價、首末班車同搭車位置，可以先睇仁川機場官網；如果想知班車實際幾點會到你個巴士站，用 Naver Map 睇即時資訊通常更實用。

Q9. 搭仁川機場巴士點知自己幾時要落車？

A：部分仁川機場巴士會有廣播話你知下一個站係咩站，但係如果冇嘅話，建議大家用Naver Map開定位服務，check住距離目的地仲有幾遠、差幾多個站到。要落車嘅時候記住要撳鐘，司機會同你一齊落車，幫你搬行李出嚟。

Q10. 如果仁川機場巴士落車站同酒店仲有一段距離，仲適唔適合搭？

A：如果落車後只係行5至10分鐘左右，通常都仲算方便。但如果仲要拖喼行好遠、上斜路或者再轉車，就未必一定比 AREX 更好，建議出發前先睇清楚步行距離。

離開機場之前...

去旅行之前相信大家都要準備好多嘢，除咗買機票同book酒店，換錢、買Sim卡同交通卡都係必做動作之一！而家呢三樣野可以一次過喺機場搞掂曬，價錢仲平過坊間其他服務，想慳時間慳錢不妨可以參考吓！

韓國機場換錢預約服務

平時大家都要走到首爾市區先可以用比較好嘅匯率換到錢，其實都真係幾嘥時間。透過我哋預約換錢可以直接喺機場以最平、最快、最方便方式攞到錢，即刻開始韓國之旅！大家仲可以事先用我哋嘅匯率計算機計可以換到幾多錢，仲會話你知可以慳到幾多！

SIM卡&WIFI蛋

去旅行冇data上網真係好唔方便！呢個時候大家應該都會事先買定韓國本地SIM卡或者租定WIFI蛋，我哋網站有一系列價錢實惠得嚟網速夠快嘅產品，仲可以一到埗就直接喺機場攞！

韓國SIM卡&WIFI蛋 | 撳我即買

交通卡

通常大家喺首爾玩都會選擇搭公共交通工具，手上有返張交通卡會方便好多！

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！