仁川「本地啤酒&開港場街」一日遊
著住復古服裝遊仁川係咩體驗？推薦大家飲當地啤酒同食開港路懷舊烤雞！
Hello，大家好，我哋係由韓國人每日提供最新韓國旅行資訊嘅Creatrip。
講到仁川，大家可能只會諗到中國街、童話村，不過當中有一個地方「開港路」因為受到日本影響，呢度有舊日本領事館、日本第一銀行仁川支行等，最近更加成為年輕人熱愛打卡景點之一，今日就等小編同大家講吓呢度有咩咁特別啦！
仁川開港街電動車體驗
- 營業時間：星期二至星期日 10:00 - 17:00
- 費用：每人₩13,500起（55分鐘）
嚟旅行走圍行，真係會用好多腳骨力，大家有冇諗過坐住車，一樣都可以觀光呢？小編推薦大家去到仁川嘅時候，可以坐環保型電動車，司機會帶大家遊中國城同開港場街，同時按歷史順序去講故仔。
仁川開港場街
京城衣裳（경성의상）
- 地址：인천 중구 차이나타운로44번길 7
- 營業時間：11:00 - 18:00、週末10:00 - 19:00
開港路比好多地方更加特別嘅原因，係呢度成條街都以木製，有啲好似返番去以前京城時代咁！如果大家想融入返當年氛圍，小編推薦大家可以去到京城衣裳換復古衫，想像自己係京城時代嘅人。
呢到唔單止有齊男/女、小童服飾，同時仲有提供各種帽、髮飾、手袋、鞋等一次過俾大家租借。
服裝租借1小時₩15,000
鞋租借₩3,000
京城衣裳喺開港路一帶有兩間分店，一間喺中國城內、另一間係喺開港路，兩間鋪頭距離約10分鐘。今次小編去到中國城內分店，場內有兩個攝影棚，大家都可以喺度打完卡再慢慢出去行。
就算出到去影相都一樣好有feel~
仁川啤酒（인천맥주）
- 地址：인천 중구 신포로15번길 41
- 營業時間：13:00- 21:00、星期一休息
受到新興文化影響後，開港路附近開始多咗好多餐廳同小食店，當中小編想同大家介紹呢間仁川啤酒，最近唔少年輕人都特登去打卡。
仁川啤酒老闆除咗本身對啤酒有一定程度熱愛之外，更加希望可以釀造一隻符合當地人口味嘅啤酒。
啡色啤酒瓶身，上面寫住「開港路」，雖然好簡單，但就有一種好懷舊同復古嘅感覺。
2樓係飲酒嘅地方，呢度好闊落，同時用透明玻璃可以直接望到1樓啤酒製造過程，大家可以見到玻璃上有唔少人寫上到此一遊。
開港路拉格啤酒（개항로 라거）₩4,500
小編當日試咗佢哋嘅開港路拉格啤酒，大麥味道好香，好易入口，不過唯一有少少可惜嘅係呢度只賣酒，冇其他小食或下酒菜，有啲單調。
開港路烤雞（개항로통닭）
- 地址：인천 중구 참외전로 164
- 營業時間：16:30 - 24:00、週末16:00 - 24:00
東仁川站附近有一間超出名嘅烤雞店，只要一到食飯時間就會有超多人嚟，有時仲要等好一段時間先有位。
開港路烤雞分成室內同室外，兩個地方完全唔同氣氛，室外好似喺香港食大排檔咁，另外室內就好有以前韓國以前時代咁。
半半烤雞係呢度嘅招牌菜，用咗芝士同玫瑰醬去整成，比起炸雞，因為呢度用咗烤嘅方式，食落唔會咁油，同時雞肉皮薄多汁，令人忍唔住食完一啖又一啖。
不過小編個人覺得玫瑰醬食落似茄汁多，如果覺得唔夠惹味，可以加佢哋提供嘅炸雞醬或芥末醬。
一光電燈Light House（일광전구 라이트하우스）
- 地址：인천 중구 참외전로174번길 8-1
- 營業時間：11:30 - 21:30（Last Order 21:00、每個月第四個星期一休息）
一光電燈Light House本身係一間舊式婦科醫院同住宅，但經過改造，而家已經變成一間Cafe。
裡面有好多嚟自世界各地嘅照明設計，與其話佢係一間Cafe，呢度更加似係一間大型照明博物館。
Cafe有賣各式各樣飲品同甜品，加上呢度氣氛好，嚟到嘅人都會覺得好滿足。
香蕉維多利亞蛋糕（바나나빅토리아케이크）₩8,000
Lotus忌廉芝士（로투스크림치즈）₩5,500
橙汁（오렌지쥬스）₩7,000
雲呢拿鮮奶咖啡（바닐라라떼）₩6,000
因為太多款可以揀，小編都十五十六咗一陣，最後決定叫香蕉維多利亞蛋糕，中間嘅忌廉唔會太甜，但最底層蛋糕有少少乾；Lotus忍廉芝士好特別，由餅乾、芝士、蛋糕組成，口感有多種層次。
飲品方面，小編覺得橙汁有啲太淡，雲呢拿鮮奶咖啡比起其他地方唔甜，同甜品一齊食啱啱好。
唔知睇完以上嘅行程，當中有冇邊一個吸引到大家呢？之後去仁川不如都加返一兩個行程落去啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk