仁川「江華島」特產推介
去仁川江華島就係要食呢啲特產！買人蔘、燒鰻魚、食艾草！
Hello，大家好，我哋係由韓國人每日提供最新韓國旅行資訊嘅Creatrip。
江華島位於仁川北部，係南北停戰線附近一個島，呢度除咗保留好多韓國歷史足跡之外，仲有唔少特產銷售到韓國各地，今日就等小編同大家講吓有邊啲啦！
仁川江華島特產推介
1. 江華人蔘中心（강화인삼센터）
- 地址：인천 강화군 강화읍 강화대로 329
- 營業時間：09:00 - 20:00、每個月第三個星期一休息
江華島人蔘最早歷史可以追朔到高麗高宗年間1232年左右，呢度嘅土質同氣候好適合種植，特別六年根人蔘。
江華人蔘中心裡面總共有53個檔口賣人蔘，全部都係當地土生土長，加上有共同農協負責掌管生產、加工、銷售等，消費者可以安心購買。
人蔘品種多元化，價錢亦唔算貴，750克（約10至12根不等）水蔘約₩30,000至₩40,000，想要送俾人嘅話，老闆仲會幫手包裝成禮盒。
除咗人蔘之外，呢度仲有賣蜂蜜、萃取液、人蔘乾、人蔘片、人蔘茶等。
2. 江華風物市場（강화풍물시장）
- 地址：인천 강화군 강화읍 중앙로 17-9
- 營業時間：08:00 - 20:00、每個月第一、三個星期一休息
江華風物市場有賣各式各樣特產美食，係仁川唯一五日市場，呢度總共分咗兩層，1樓主要賣食品同乾貨，2樓係用餐區，平日去唔算多人，行得會鬆動啲，唔使同人逼。
喺四面環海嘅江華島上，當然唔少得蝦醬、海鮮醃製等小菜，就連一桶桶醬蟹都可以喺度搵到。
除咗醃製小菜之外，亦可以見到擺滿各式魚乾攤檔。
3. 昌石家 淡水鳗鱼（창석이네 민물장어）
- 地址：인천 강화군 강화읍 중앙로 17-9 1039호
- 營業時間：09:00 - 19:00
江華風物市場一樓外面有「昌石家 淡水鳗鱼」，佢係一間擁有28年傳統元祖鰻魚店，老闆將國產淡水鰻魚直接剪開後燒，唔單止多當地居民成日去買，佢出名到可以送到韓國各地！
燒鰻魚500g（장어 500g）₩25,000
每一嚿鰻魚都好肥美，真係睇見都令人流哂口水！「昌石家 淡水鳗鱼」專做外賣生意，如果想堂食需要俾錢其他鋪頭，每人₩4,000座位費，老闆會提供多種小菜，算係幾唔錯（似係去馬場洞食韓牛咁）。
落完單之後，小編就去到2樓餐廳等，大約10分鐘左右老闆就會拎上嚟，啱啱燒好嘅鰻魚真係超香，每一啖都好有肉汁，點埋佢哋特製甜豉油，真係好食到令人停唔到口！
4. 滿滿青花魚的銅碗屋（밴댕이 가득한집 놋그릇집）
- 地址：인천 강화군 강화읍 중앙로 17-9 2F 2004호
- 營業時間：10:00 - 19:00（Last Order 18:15）；每月第二、四個星期一休息；如果係2號、7號或五日市場營業時，將會改為星期二休息
江華風物市場2樓幾乎係賣江華島名產青花魚，當中小編最想同大家推薦「滿滿青花魚的銅碗屋」，佢已經開張咗30幾年，直到而家仲係相當有人氣。
青花魚套餐（밴댕이 모듬） 每人₩35,000
青花魚套餐會有原味、辣拌同炭烤三種唔同生魚片食法，原本以為細細隻可能會好腥，點知食落一啲腥味都冇，反而係好新鮮，不過要小心炭烤青花魚裡面有好多骨（雖然老闆話可以直接食，但小編會建議大家食嘅時候要小心）。
辣拌青花魚生魚片放咗好多蔬菜、麻油同白飯，撈埋一齊食好滋味！附贈嘅小菜仲有醬油蟹同醬油蝦，鍾意食海鮮嘅朋友千祈唔好錯過！
5. Dolmen Bakery（돌멘베이커리）
- 地址：인천 강화군 선원면 해안동로 1209
- 營業時間：10:00 - 20:00（Last Order 19:30）、星期一休息
最後一個要介紹江華島特產就係艾草，近年嚟韓國飲食興起健康風，好多甜品鋪都會加咗艾草，等大家食嘅時候都可以健康啲，唔會太有負擔，而「Dolmen Bakery」整嘅艾草甜品就係佢哋招牌菜之一。
一入到去就會見到放咗幾十種麵包、多士，有朱古力、蘿蔔、艾草、南瓜等口味。
艾草麵包（쑥 볼빵빵）₩5,000
一份艾草麵包裡面有6粒，老闆擺好盤之後，剩餘麵包會裝喺紙袋裡面，等客人可以拎返屋企，聞嘅時候會好香，但食落就冇咩味道，同一般麵包差唔多。
美式咖啡（아메리카노）₩4,500
美式咖啡飲落唔苦，同飲品一齊食啱啱好。
萬壽菊江華艾草茶（메리골드 강화 쑥차）₩7,000
萬壽菊江華艾草茶係鋪頭招牌飲品之一，艾草好濃郁，天氣開始涼，飲返一杯暖吓身就差唔多，不過因為艾草浸太耐會有啲苦，所以小編建議大家要快啲飲。
以上仁川江華島特產唔知大家又鍾唔鍾意呢？由弘大、新村一帶去江華島只需要坐一班車、大約1個半鐘就會去到，希望大家會鍾意呢次介紹啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
