2024最新韓國水產市場總整理
想喺韓國用最抵價錢食到即撈即劏嘅新鮮海鮮？咁就一定要去韓國八大水產市場啦！
Hello，大家好，我哋係由韓國人每日提供最新韓國旅行資訊嘅Creatrip。
平時喺香港都已經可以食到質素好嘅海鮮，所以通常大家喺韓國都係食韓牛或者燒肉。不過其實韓國三面環海，海產資源豐富，無論喺首爾定其他沿海城市都可以食到超新鮮海鮮~ 而韓國人想用最抵價錢食海鮮嘅時候，就會選擇去水產市場！今日小編幫大家整理咗韓國最出名嘅幾個水產市場，大家plan行程嘅時候不妨參考吓！
韓國水產市場總整理
首爾 | 鷺梁津水產市場(노량진수산물시장)
- 地址：서울 동작구 노들로 674
- 前往方法：鷺梁津站（노량진역）9號出口
「鷺梁津水產市場」係全首爾最大嘅海鮮市場，一樓係賣海鮮嘅地方，上到二樓就會有餐廳，大家可以一買完海鮮就攞上去俾餐廳煮（需要另外俾錢），亦都可以唔買海鮮，直接喺餐廳叫嚟食。
首爾 | 可樂市場(가락농수산물종합도매시장)
- 地址：서울 송파구 양재대로 932
- 前往方法：可樂市場站（가락시장역）8號出口
오마이뉴스
서울타임스
「可樂市場」位於松坡區，係一個販賣農產品同海鮮嘅綜合市場，規模都好大！比起頭先介紹嘅「鷺梁津水產市場」，呢度會更加有香港街市嘅感覺~ 大家都可以喺度買完海鮮就拎俾餐廳即煮，食超新鮮嘅海鮮。
仁川 | 蘇萊浦口綜合漁市場(소래포구종합어시장)
- 地址：인천 남동구 소래역로 12
- 前往方法：蘇萊浦口站（소래포구역）2號出口
蘇萊浦口係仁川西海岸嘅漁港，每日新鮮捕獲嘅海鮮就會直接運到嚟「蘇萊浦口綜合漁市場」！無論係魚蝦蟹，定係各種貝殼類海鮮，全部應有盡有，而且價錢公開透明，大家可以用合理嘅價錢食到最新鮮嘅海鮮！ 同頭先介紹嘅一樣，大家都可以買完海鮮之後拎上2樓餐廳叫廚師幫手煮~
仁川 | 永宗觀光漁市場(영종관광어시장)
- 地址：인천 중구 은하수로 3
「永宗觀光漁市場」雖然規模唔大，不過非常受當地人歡迎！同頭先介紹嘅水產市場唔同嘅地方係，比起自己買海鮮，大部分人都會直接行入餐廳叫嘢食。而且呢度位於機場鐵路沿線，所以大家如果有時間嘅話，可以安排到埗或者離境當日去永宗島行返轉~
江陵 | 注文津水產市場(주문진 수산시장)
- 地址：강원 강릉시 주문진읍 시장2길 4
江陵係一個位於韓國東海岸嘅沿海城市，海鮮有幾新鮮就不在話下啦！而呢度最出名嘅「注文津水產市場」喺1936年成立，係韓國東海城市之中最大嘅漁市場，無論係海味乾貨定新鮮海鮮都應有盡有！
束草 | 束草觀光水產市場/束草中央市場(속초관광수산시장)
- 地址：강원 속초시 중앙로147번길 12
겟어바웃 - 하나투어
「束草觀光水產市場」通常都會被叫做「束草中央市場」，喺其中一個束草必去景點！呢度地下一樓係賣海鮮嘅水產市場，大家可以去參觀吓，不過小編就比較鍾意去小食街掃街食好西~
釜山 | 札嘎其市場(부산자갈치시장)
- 地址：부산 중구 자갈치해안로 52
- 前往方法：南浦站（남포역）2號出口
講起釜山傳統市場同海鮮市場，點可以少得韓國海鮮供應來源之一嘅「札嘎其市場」啊！呢度位於南浦洞附近，規模非常大，大家嚟到可以用超平價錢買到最新鮮嘅海鮮~
釜山 | 機張市場(부산 기장시장)
- 地址：부산 기장군 기장읍 대라리 417-3
- 前往方法：機張站（기장역）1號出口
기장시장
釜山機張郡嘅「機張市場」可以話係今日介紹嘅水產市場之中最有傳統市場/街市feel嘅地方！呢度最出名係食蟹聞名，附近亦都有超多賣蟹嘅餐廳，鍾意食蟹嘅朋友一定唔可以錯過！
唔知道大家有冇去過今日介紹嘅水產市場呢？小編建議鍾意食海鮮嘅朋友至少都要去一次韓國嘅水產市場，品嚐最新鮮嘅海鮮！
如果有更多想知嘅內容，都可以隨時留言或者dm話俾我哋知：）
Mail：help@creatrip.com