仁川特色美食街
去仁川仲只係識得食炸醬麵？必去5條特色美食街！西瓜冷麵、血腸湯飯超多美食等住你！
Hello，大家好，我哋係由韓國人每日提供最新韓國旅行資訊嘅Creatrip。
講到仁川大家除咗會諗到要去食中國料理同食海鮮之外，其實嗰度仲有好多美食等住大家！今日小編整理好5條特色美食街俾大家參考，全部都係當地人推薦，價錢平得嚟仲要夠大份！
仁川特色美食街
1. 花平洞冷麵街（화평동 냉면거리）
- 地址：인천 동구 송화로2번길 2
花平洞位係喺東仁川站4號出口附近，嗰帶有幾十間冷麵店聚集，所以被稱為「花平洞冷麵街」，路口地圖仲可以見到小巷入面所有冷麵鋪頭。
街上周不時會見到同冷麵相關嘅裝飾，相當可愛。
'
呢度之會咁出夠，係因為冷麵又被稱為「臉盆冷麵」，份量十足，價錢親民，好受附近工廠工人歡迎。
元祖奶奶冷麵（원조할머니냉면）
- 地址：인천 동구 화평로 24-2
- 營業時間：08:00 - 21:00
「元祖奶奶冷麵」開咗30幾年，係當地最受歡迎冷麵店，雖然外觀睇落好似好簡陋，但平日未到Lunch Time，已經坐滿哂人。
水冷麵（물냉면）₩7,000
冷麵係用蕎麥粉製成，食落好彈牙，酸酸甜甜獨特底，喺上面加芝麻，令口感更加豐富！咁大碗水冷麵入面仲有半隻蛋同蘿蔔，食完超有飽肚感。
一味花平洞冷麵（일미 화평동 냉면）
- 地址：인천 동구 화평로 18
- 營業時間：10:00 - 21:00
夏天食咩生果最消暑？當然就係西瓜啦！不過冇諗到「一味花平洞冷麵」竟然將西瓜同冷麵mix埋一齊！推出後唔少電視台都去採訪添！
西瓜冷麵（수박냉면）₩19,000
上面淋咗辣醬、野菜絲、蛋、芝麻同碎冰，口感超特別！食完之後仲可以食埋西瓜肉，當飯後水果食（？） 不過呢款西瓜冷麵係每年6月至8月季節限定，大家去之前可能要先確認清楚，如果唔係可能就會白行一趟！
2. 北城洞 元祖炸醬麵街（북성동 원조 자장면거리）
- 地址：인천 중구 북성동2가
仁川「元祖炸醬麵街」其實就係喺中國城，呢度有賣好多中華料理、小食等。
呢度之所以會成為炸醬麵街，係因為仁川喺1883年開港後，靠近仁川港一帶有好多中國人聚集，呢度自自然然多咗好多中華料理鋪頭，加上煮法簡單，價錢又平，吸引唔少喺碼頭工作嘅人去食。
燕京大飯店（연경）
- 地址：인천 중구 차이나타운로 41
- 營業時間：10:30 - 21:30（Last Order 21:00）
「燕京大飯店」有四層樓咁高，只係睇外觀已經有好氣勢，甚至一到Lunch Time就要大排長龍，可想言知佢人氣幾咁高！之前韓綜《新西遊記7》環遊世界中國篇，都係喺呢度拍。
炸醬麵（짜장면）₩7,000
「燕京大飯店」炸醬麵有個焦香味，裡面放咗洋蔥同碎豬肉，韓式炸醬麵普遍偏甜，不過呢碗算偏鹹，小編個人都幾鍾意。另外小編仲推薦大家可以試「白炸醬麵」，之前韓綜《Running Man》就為咗呢個去取景，大家下次有機會都可以去試吓。
3. 松峴洞 血腸巷弄（송현동 순대골목）
- 地址: 인천 동구 화도진로43번길
東仁川附近水門通市場自1960年代，就有賣好多又平又好味嘅美食，主要原因係為咗等港口同工廠嘅工人可以無負擔去食。
之後不知不覺附近聚集咗好多血腸湯飯鋪頭，同時之前係MONSTA X拍《MONSTA X-RAY2》嘅地方。
全州食堂（전주식당）
- 地址：인천 동구 화도진로43번길 3-1
- 營業時間：09:00 - 22:00
小編晏晝去到全州食堂嘅時候，喺鋪頭出面已經聞到超香，同時唔少大叔去食飯。
血腸湯飯（순대국밥）₩7,000
咁大碗都只係₩7,000，裡面除咗有血腸之外，仲有大腸、肝等內臟，湯底有少少辣，可以遮到啲腥味。
4. 龍峴洞安康魚街（용현동 물텀벙이거리）
- 地址：인천 미추홀구 용현동 물텀벙이거리
仁川港附近嘅「龍峴洞安康魚街」已經有40年幾年歷史，呢度嘅鋪頭採用新鮮安康魚，保留魚皮嘅膠原蛋白，將魚內臟、魚身、魚皮等腥味重嘅部份全部飛走之後，放入大煲去煮。
所有安康魚鋪頭外面都有掛一隻安康魚卡通招牌，建議大家可以喺11月至2月安康魚產卵準備期時去，咁先有機會食到更肥美安康魚！
5. 東仁川土魠魚街（동인천 삼치거리）
- 地址：인천광역시 중구 우현로67번길 57
如果唔鍾意食紅湯底海鮮料理，可以去到東仁川土魠魚街，位置係喺花平洞冷麵街對面，非常方便！
呢度有賣各式各樣以土魠魚為主嘅料理，每間烹調手法都唔一樣。
喺條街仲會見到有好多同土魠魚有關嘅壁畫，經過嘅時候都可以去打卡！
以上係小編整理好嘅5條仁川特色美食街，希望可以幫到啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
