仁川「蘇萊浦口公園」介紹
去仁川「蘇萊浦口」過Healing嘅一日！踩住單車欣賞美景、食CP值超高海鮮！
Hello，大家好，我哋係由韓國人每日提供最新韓國旅行資訊嘅Creatrip。
近呢幾年仁川一直致力開發生態公園同觀光景點，吸引唔少父母喺放假嘅時候帶仔女去玩，今日小編就想同大家分享位於仁川嘅「蘇萊生態濕地公園」，呢度好適合去散步同踩單車，附近仲有「蘇萊浦口綜合魚市場」，可以喺運動之前用超平價錢食返餐！
仁川「蘇萊浦口」
蘇萊浦口綜合魚市場（소래포구종합어시장）
- 地址：인천 남동구 소래역로 12
- 營業時間：07:00 - 01:00（每間鋪頭營業時間可能都會唔同）
- 小Tips：蘇萊浦口站（소래포구역）2號出口行大約400米
仁川南洞區西海岸漁港「蘇萊」，原名係「솔애（Solae）」，有窄水岸之意，後嚟變成「 소래（蘇萊）」係有甦醒嘅意思。
因為係港口所以呢度有好多新鮮海鮮，以前更以發展鹽田為名。喺蘇萊浦口綜合魚市場隔離嘅廣場上有「蘇萊浦歷史館」，裡面就介紹咗好多過去故事同歷史。
魚市場外圍有好多賣炸蝦、炸魷魚、炸蟹等嘅小店，各種海鮮炸物一共11樣竟然只要₩10,000， 價錢相當平！
現場亦有賣好多乾糧，買返去用嚟煲湯、炒菜都得。
魚市場內部有好多水產店，想食蟹、生魚片、烤蝦、烤貝都可以喺度搵到，每檔老闆仲要好熱情，不過小編個人覺得，每間鋪頭其實都差唔多，只要揀間順眼嘅就可以。
比目魚同石斑魚生魚片（광어+우럭）₩40,000/2人
大部分鋪頭都會將價錢寫出嚟，大家唔需要擔心因為自己係外國人就會呃秤。
仁川「蘇萊浦口綜合魚市場」365日全年無休，日日都可以食到豐盛而且美味海鮮，喺1樓落完單之後，就可以上2樓食飯（部份海鮮如果要求煮熟，可能加收人頭開檯同烹調費用，一切以現場狀況為主）。
巨大刀削麵（통큰칼국수）
- 地址：인천 남동구 소래역남로 10
- 營業時間：平日10:00 - 22:00、週末09:00 - 22:00（Last Order 21:00）
除咗魚市場有豐富美食，外圍仲有好多海鮮餐廳，小編今日要介紹嘅就係「巨大刀削麵」，呢間鋪頭唔少電視台都去過採訪、口碑相當好！
小編係平日11點幾去到，但幾乎係坐滿哂人，人氣相當高。
餐廳有分兩層，2樓係團體或者預約座位，食飯區隔離有辣蘿蔔、泡菜、芥末醬、青陽辣椒等小菜同醬料自己去拎。
海鮮刀削麵（해물손칼국수）₩12,000/1人
海鮮刀削麵裡面放咗青口、扇貝、蝦、蟹、魷魚、柄海鞘等，加上洋蔥、大蔥、紅蘿蔔、辣椒，令湯底更加鮮甜（至少要2人份起）。
呢度會教大家點煮，喺湯煮滾之後，可以將魷魚剪成細細嚿，當海鮮食得差唔多嘅時候，轉至大火放麵，跟住加泡菜、青陽辣椒、鹽、胡椒等調味料，等麵煮滾之後就食得啦！
鮮甜海鮮湯再配上煙韌嘅麵，真係令人食到超飽同滿足，難怪平日都咁多人嚟！
蘇萊生態濕地公園（소래습지생태공원）
- 地址：인천 남동구 논현동 1-55
- 營業時間：公園04:00 - 23:00、公園內部散步路09:30 - 17:30
南洞區公用租單車地方
- 營業時間：09:00 - 17:00、16:00最後租借；逢星期一、新年、中秋休息
- 交通：蘇萊生態濕地公園入口直行大約250米
- 備註：營業時間可能會根據天氣而有變化；租借時需押證件、提供電話號碼做紀錄
| 單人單車 （120分鐘） | 成人₩2,000 |
| 孩童₩1,000 小學以下須由成人陪同 | |
| 雙人單車 （120分鐘） | ₩4,000/部 |
| 逾期歸還30分鐘需支付₩500 | |
食飽之後行大約15分鐘，小編就去到蘇萊生態濕地公園。
由入口直行大約250米就可以見到租單車嘅地方，由於公園總面積約350萬平方米，小編建議大家一定要租單車先可以更舒服享受大自然。
租嘅時候需要填寫相關資料，參考上面格式填寫就可以。
蘇萊生態濕地公園以前有好多曬鹽場，不過由2009年開始，仁川政府以各種動植物、候鳥棲息等大自然觀測為目的，將開發成生態公園，變成而家咁。
公園內除咗有好多生物，仲有風車、步行道、木橋等景觀等，一邊踩單車、一邊吹風，欣賞大自然生態奧秘，令人感到好寫意。
直行會見到園區地圖，地圖左邊有風車入口、鹽田體驗館、右邊係泥灘、生態展示館、海水足浴場等。
蘇萊濕地生態公園展示館
- 營業時間：10:00 - 18:00（冬季10:00 - 17:00）、逢星期一、元旦休館
蘇萊濕地生態公園生態展示館係免費入場，呢度可以近距離觀察水中生物、鹽田發展，相當適合帶小朋友嚟瞭解生態同歷史。
展示館內有螃蟹、貝類等生物展示，而仁川政府每個月都會舉辦唔同免費體驗活動，大家可以先上網預約，不過目前只有提供韓文服務。
展示館2樓Cafe隔離嘅露天廣場，可以欣賞到蘇萊一帶大面積鹽田。
展示館對面就係泥灘體驗場，不過可能係仲未當季，泥灘上生咗好多紅色植物，相信日後再去會係另一個景色。
海水足浴場
- 營業時間：3月中至12月中10:00 - 17:00、逢星期一休息
再行前啲就會見到小編啱啱提到嘅「海水足浴場」，炎炎夏日喺呢度浸腳、消暑一下，相當舒服又清爽！
小編再跟住地圖往左邊行，就會見到蘇萊濕地生態公園主要景點「風車」，荷蘭式風車為場景打造出異國風情，令人印象深刻。
韓劇《花遊記》
李昇基同吳漣序之前拍《花遊記》就係喺呢度取景。
2018年秋季拍攝
雖然夏天去影都好靚，不過小編更推薦大家秋天去影會靚啲！相信大家之後去到一定可以影到人生照！
仁川蘇萊浦口雖然同首爾有一小段距離，不過呢度好適合嚟親近大自然、食海鮮，遠離都市喧囂都係生活中一大享受。
如果有更多想知嘅內容，都可以隨時留言或者dm話俾我哋知：）
Instagram：creatrip.hk