2026仁川機場T1攻略 | 交通、退稅、設施、出境流程總整理

Hello，大家好，我哋係由韓國人每日提供最新韓國旅行資訊嘅Creatrip。

而家無論搭咩航空，來回香港同首爾都係喺仁川機場上落機。小編今日會一次過幫大家整理出仁川機場T1客運大樓最實用資訊，到底去首爾市區點樣最快、退稅喺邊處理、要幾早到機場、同埋機場入面有咩設施最常用？無論你係第一次去韓國、帶住大件行李、同屋企人同行，定係準備返香港前要喺T1出境，都可以先睇定呢篇文章，到時候就唔需要慌失失啦！

※於2026年4月更新，資訊來源為仁川國際機場官方網站、AREX官方網站及各服務公告，實際最新情況需以現場為主

仁川機場T1客運大樓完整攻略

仁川機場T1係咩？點樣確認自己係去T1定T2？

仁川國際機場分為T1同T2兩個客運大樓，唔同航空公司會使用唔同客運大樓，所以無論你係入境定出境，第一步都係先確認自己航班屬於邊個terminal。呢一步真係唔好掉以輕心，因為如果去錯航廈，轉返去另一邊要時間，趕住check-in或者趕住接機都會幾麻煩。

一般嚟講，你可以直接喺機票、航空公司App、訂票確認電郵，或者出發前一日喺航空公司官網查航班資料，通常都會寫明係T1定T2。如果你係搭聯營航班、code share航班，或者買咗旅行社套票，就更加建議再確認一次，因為最容易喺呢啲情況下搞錯。出發前花一分鐘確認客運大樓，遠比去到機場先搵人問穩陣得多。

💡香港小編小貼士：香港人經常搭嘅國泰航空(CX)、香港快運(UO)、香港航空(HX)、濟州航空(7C)、德威航空(TW)都係喺T1一號客運大樓辦理登機手續；韓亞航空(OZ)、大韓航空(KE)、真航空（LJ）就係喺T2二號客運大樓！

仁川機場T1登機手續喺邊度搞？

仁川機場T1客運大樓登機手續櫃檯位於3樓出境大堂，去到機場之後可以先check清楚航班時間表，隔離會寫埋你班機個櫃檯喺邊個Zone，你亦可以按照航空公司代碼搵返相應櫃檯辦理登機手續。

T1 3樓出境大堂有Zone A至N，基本上每一個航空公司前面都會有自助機器可以自行辦理手續，而喺Zone F就有一排所有航空公司都可以用自助機器，大家可以事先登記好，然後再將行李交俾地勤人員寄艙。

💡香港小編小貼士：通常旅行團或者團體旅客會比較多排人工櫃檯，如果大家係自由行或者兩三個朋友一齊嚟玩，建議可以直接先用自助機器登記同攞定機票，再去寄艙，效率會比較快！

如果去錯客運大樓點算好？

機場03號接駁車(공항03) 仁川機場T2→仁川機場T1	機場04號接駁車(공항04) 仁川機場T1→仁川機場T2

去到仁川機場之後發現自己去錯客運大樓，有兩個方法。第一係搭一般機場鐵路，只要搭一個站就可以去返自己本身要去嘅Terminal，而第二個方法就係搭客運大樓免費接駁車。

如果你想由仁川機場T2去返T1，就要去T2 3樓出境大堂外面6號同7號站牌附近搭機場03號接駁車，根據你需要去嘅閘口搭2-3個站就到；如果你想由仁川機場T1去T2就要搭機場04號接駁車，車站位於T1 3樓出境大堂外面8號站牌附近，搭兩個站就到！

仁川機場T1去首爾應該揀咩交通工具？

由仁川機場T1去首爾市區，冇一種交通係適合所有人，重點反而係你住邊區、同行有冇長者小朋友、行李多唔多，同埋你想慳時間定慳力。對第一次去韓國嘅旅客嚟講，如果想快同穩定，通常先考慮AREX；想落車就近酒店，機場巴士會方便啲；如果係凌晨機、行李多，或者幾個人一齊旅行，的士同機場包車接送服務會最慳錢慳力。

AREX機場快線直通車

AREX直通車最大優點就係快，而且路線清晰，對唔想受路面塞車影響嘅人嚟講會比較安心。好多旅客會鍾意搭直通車去首爾站，之後再轉的士或者地鐵去酒店，特別係如果你第一晚住喺首爾站附近，或者本身想盡快入市區，AREX直通車會係幾穩陣嘅選擇。

不過AREX直通車唔係萬能，因為佢唔會直接送你去明洞、弘大酒店門口，落車之後仍然可能要轉車。如果你拖住兩個大喼，又住喺轉乘唔方便嘅地方，咁就未必係最舒服。

更多詳細資訊&時間表👇🏻

[블로그] 首爾去仁川機場AREX直通車攻略（2026最新版）

[스팟] 仁川機場快線AREX直通車票

AREX機場鐵路一般列車

如果你住弘大、孔德、數碼媒體城一帶，通常都會建議搭機場鐵路一般列車。因為價錢通常比直通車平，而且停站較多，對某啲住宿地點反而更加方便。尤其係弘大對香港旅客嚟講一向都係熱門住宿區，而弘大入口站就正正係機場鐵路嘅沿線車站！

但要留意，普通列車會停比較多站，繁忙時間乘客亦可能比較多。如果你一落機已經好攰，又或者同行人數比較多，唔想搬行李上上落落，就要衡量下自己更重視價錢定舒適度。

💡香港小編小貼士：無論係直通車定一般列車，所有AREX車站都係位於B1/F交通中心，記住認住橙色係直通車、藍色係一般列車！另外直通車需要另外買車飛先可以上車，而一般列車就好似普通地鐵咁用T-Money等交通卡嘟卡入閘就得！

機場巴士

機場巴士最吸引嘅地方，就係對於酒店附近有機場巴士站嘅旅客嚟講非常方便。尤其如果你住明洞、東大門、江南、蠶室等地區，有時機場巴士會比搭AREX再轉車更輕鬆。上車之後坐到近酒店位置落車，中間唔需要拖住行李落地鐵站轉幾次線，成件事會舒服好多。

不過機場巴士最大變數始終係路面交通。繁忙時間、落雨、假期或者市區塞車時，車程可能會比想像中長，所以如果你係返程要趕飛機，記住一定要預多少少時間。

仁川機場T1 1樓入境大堂 Gate 4、6、9、11附近有機場巴士人工售票處、Gate 4、7、8、11附近就有自助售票機，雖然自助機支援中文、韓文、英文同日文介面，不過只接受韓國信用卡，所以建議大家準備定現金去買車飛（平均₩17,000-18,000/張）。買完巴士飛之後只要跟住車飛上面寫住嘅月台編號，去返正確位置等車就得。

💡香港小編小貼士：大部分仁川機場巴士尾班車都係11點幾12點就會開出，如果會搭凌晨機、又想搭機場巴士，可以考慮深夜機場巴士，不過路線比較少，大家可以參考下面文章，睇下會唔會去到你間住宿附近！

更多詳細資訊&巴士路線時間表👇🏻

[블로그] 2026仁川機場巴士路線、時間表、車費總整理

[블로그] 2025仁川機場夜間交通攻略

的士

如果你係凌晨機、朝早機、帶住長者小朋友、同行人數比較多，或者一開始就唔想煩，直接搭的士會係最舒服嘅做法。尤其係幾個人一齊分攤車資時，可能比起地鐵/巴士加轉車車費更加平，仲可以更加舒服。

1樓入境大堂行出嚟之後，跟住Taxi指示牌過馬路去到5C、6C、6D月台可以搭一般的士，如果擔心唔知點溝通，可以去4C月台搭國際的士，國際的士司機可以用中文或者英文溝通。如果想搭模範地勢或者大型的士就分別要去隔離嘅7C同8C月台，喺的士上車位同工作人員講想去嘅目的地，之後佢哋就會幫大家安排車輛。

而家亦有唔少遊客會直接預約機場接送服務，司機會喺指定位置接送，唔洗自己研究交通路線。對第一次去韓國、唔識講韓文，或者落機時間比較夜嘅人嚟講，會更加有安全感。不過相對上，呢類交通方式一定係最貴，所以如果你本身住喺AREX沿線，又唔算太多行李，其實未必一定要揀機場接送服務。

不過好似頭先所講，如果係一大班朋友或者一家大細加好多件行李，非常建議你提早預約定，如果唔係到時候一定會好亂好慌張，一次過顧唔到咁多嘢！

仁川機場T1交通懶人包

如果你仲未決定搭邊種交通，可以先睇下面呢個簡單比較表，再按自己住宿地區、行李數量同抵達時間去揀。

※價錢為2026年4月更新，實際價格需以現場為準

仁川機場便利設施總整理

仁川機場T1其實有好多設施，但對一般旅客嚟講最常用、最值得優先留意嘅，通常都係上網、換錢、提款、退稅、行李、休息同基本旅客服務。大家可以參考以下2026年最新更新嘅便利設施位置同相關資訊，下次去仁川機場就可以即刻搵到。

仁川機場T1免費WiFi

仁川機場WiFi名係「AirportWiFi」、「Olleh wifi」、「T wifi zone」，所有旅客都可以免費使用，唔洗怕同家人朋友失聯，用地圖或者上網都冇問題！

仁川機場T1充電區&休息區

小編經常會出現以為自己電話已經充好電，但點知去到機場得返20%嘅情況，所以經常都會去搵上面呢啲充電區！仁川機場T1充電區1樓同3樓都有，連禁區入面都幾多下，大家可以順便坐低休息。根據小編觀察Check-in櫃檯附近通常都會有，大家有需要可以隨身帶定充電線去充電！

仁川機場T1 SIM卡/Wi-Fi蛋

• LG U+領取地點：1樓入境大堂Gate A/F附近

對香港旅客嚟講，一落機最想處理嘅通常就係上網。無論你係想用SIM卡定Wi-Fi蛋，都建議出發前先預約好，一到機場就可以去領取同開通，更加有效率。

小編以前自己嚟韓國旅行都習慣買本地SIM卡，當中最經常用到嘅係LG U+嘅SIM卡。首先因為係韓國三大電訊公司提供嘅，所以網速夠快，而且可以無限上網之餘日數選擇多，仲包埋韓國電話號碼，之後想去韓國餐廳排隊攞籌都更加方便。最重要係如果你係第一次飛韓國，呢張SIM卡拆走晶片之後，卡身本身就係張交通卡，可以買少多張卡更方便！

💡香港小編小貼士：如果你係短途旅行，又得自己一個人，用SIM卡會最方便；如果係同行幾個人一齊用，Wi-Fi蛋有時會更加抵！

[스팟] LG U+ SIM卡（無限上網、機場領取）

[스팟] LG U+ WiFi蛋（無限上網、機場領取）

仁川機場T1 行李寄存/托運/郵寄

zimcarry_(짐캐리)

• 位置：3樓B、N櫃檯後面、AREX乘搭地點附近
• 營業時間：07:00-21:00

郵局

• 位置：二樓中央
• 營業時間：09:00-18:00

如果大家行李太多，可能要分批寄一兩箱返香港，可以去位於仁川機場T1客運大樓2樓中央附近嘅郵局，寄EMS返香港先。

又或者如果你係早機到韓國，但酒店未夠鐘check-in想先寄存或者直接托運，都可以事先透過Creatrip用繁體中文同港幣提早預約相關服務，對唔想拖住大喼周圍走嘅旅客嚟講會舒服好多。尤其如果你係親子遊、打算進行購物行程等，小編會建議大家先處理好大型行李，更安心。

[스팟] T-PASS 行李寄存&托運服務

[스팟] T-Delivery仁川機場&首爾酒店行李托運服務 

仁川機場T1 膠囊酒店

• 位置：交通中心 1/F 中央
• 價錢：3小時 ₩32,000_(32000)起

如果你遇到凌晨機、長時間轉機，或者太早到機場又唔想一直喺出境大堂等，推薦大家去「閣樓休」膠囊酒店休息。雖然唔一定人人都需要，但對夜機或者超早班機旅客嚟講，真係可以大大減低疲勞感。

而且單人房比想像中闊落，亦都有連埋廁所嘅房型，隔音效果都唔錯，無論係想瞓教定沖涼都好唔錯！

仁川機場T1 SPA

SPA@Home

• 位置：B1/F 東邊
• 時間：24小時（全年無休）
• 價錢：
  • 2小時 ₩12,000起
  • 6小時汗蒸幕&桑拿 ₩22,000起

如果搭夜晚機或者凌晨機，仲未有交通工具可以搭去首爾市區；或者太早到機場唔知去邊度休息好，大家可以考慮去仁川機場入面嘅SPA。其實就同平時汗蒸幕差唔多，同樣都有一個大area可以休息，咁就唔洗一直坐外面咁辛苦。

💡香港小編小貼士：呢度仲有提供修理皮鞋同行李箱服務，價錢₩5,000-50,000(5000-50000)不定！

仁川機場T1餐廳

• 位置：參考仁川機場官網

仁川機場T1餐廳選擇唔少，如果你只係想簡單食一餐，機場內通常都會有韓式、快餐、Cafe等選擇。不過要注意返營業時間，因為唔係每一間舖頭都會開到好夜或者一早營業；如果你仲有少少時間，想喺上機前坐低飲杯咖啡、叉電、整理一下手提行李，機場Cafe或者一般休息區都夠用。

仁川機場T1顧客服務中心

• 人工服務中心位置：
  • 1樓入境大堂Gate 8附近
  • 3樓出境大堂Gate 5、10附近

• AI服務中心位置：3樓Zone C、K附近各一

2026年2月開始仁川機場T1新設AI智能機場顧客服務中心，行入去之後可以好似同真人對話咁問問題就得！呢個AI服務中心提供12種語言服務，所有有關航班、check-in櫃檯、機場設施，甚至係天氣嘅問題都可以問。

如果都係想直接同真人對話，就可以去3樓Gate 8或者1樓Gate 5或者10附近嘅人工櫃檯。

仁川機場T1藥房

• 位置：
  • B1/F東邊
  • 3樓出境大堂Zone G、H附近各一

如果今次旅行唔記得帶急救藥物，但突然需要用到，都可以去仁川機場T1入面嘅藥房買。只要同藥師講你需要邊個牌子嘅藥，或者有咩症狀，藥師就會幫你搵同推薦！

💡香港小編小貼士：禁區Gate 28附近都有一間藥房，好多人都會趁最後機會去買保健食品或者藥房專賣護膚品！

仁川機場T1禁區有咩地方好去？

Nap Zone休息區

• 位置：禁區3樓 Gate 25附近上4樓
• 費用：免費

有時候時間太早/夜，或者早過登機時間太多到機場，都想搵個地方瞓吓。大家過完海關之後入到禁區，不妨可以去Nap Zone休息，每個床位都會用板隔開，亦都有插頭位，重點係免費㗎（不過記住要為他人著想，記住要保持安靜）。

💡香港小編小貼士：小編自己搵呢個地方都盪失過幾次路，去到Gate 25附近你會見到有間正官莊，兩邊都有扶手電梯上Transfer Lounge，上到去向左行就會見到！

淋浴間

• 位置：禁區3樓 Gate 25、29附近上4樓
• 時間：05:00-23:00
• 費用：普通乘客 ₩15,000、轉機乘客 ₩7,000

可以沖涼嘅淋浴間同樣位於Transfer Lounge入面，就算唔係要轉機都可以入去！不過呢度就唔係免費，大約要俾15000，不過入面有提供沐浴露同洗頭水，而且係環境都幾闊落嘅獨立淋浴間，如果你想沖個涼先上飛機，小編個人幾推薦你嚟！

💡香港小編小貼士：淋浴間唔會另外提供毛巾，記住要自己準備好！

免稅店

• 位置：禁區3樓

仁川機場入面免稅店有新羅、新世界、樂天、現代等多個集團進駐，每間免稅店分佈範圍都非常大。無論係時裝名牌、潮流眼鏡同飾品、食物、保健食品、電子產品、煙酒等通通有齊。

不過唔少人趕時間嘅話，都會考慮先喺網上買完再去現場拎。大家如果要去攞產品，行道11號、46號登機口附近搭扶手電梯上4樓就會去到領取地點，通常都係24小時營業，所以搭凌晨機去都冇問題。

餐廳

• 位置：禁區3、4樓

免稅區3樓同4樓都有美食廣場同餐廳，不過營業時間每間都唔一樣，建議大家可以參考官網。

顧客服務中心

• 位置：禁區3樓Gate 25、29附近

如果想查詢航班資訊，或者需要尋求協助，大家可以去25或者29號登機口附近嘅服務中心搵職員幫手，通常都可以直接用流利英文對話，大家唔洗擔心會溝通唔到。

更多仁川機場T1客運大樓設施

仁川機場官網

應唔應該喺仁川機場換錢？

好多香港旅客都會問，仁川機場邊度可以換錢？喺機場換錢抵唔抵？仁川機場現場係有唔少找換店，例如友利銀行、國民銀行、韓亞銀行等都有喺T1 1樓同3樓提供換錢服務。但小編可以好確實咁同大家講，如果真係想喺機場找換店換錢，比起換一大筆錢，換少量現金搭車、買T-money或者買少少基本用品就夠，因為首爾市區匯率會好過機場。

建議如果你有國際提款卡或者信用卡，出發前最好先確保海外提款功能開通，咁落機就算唔即刻換大額現金，都唔怕完全冇錢用。

或者你亦可以考慮使用Creatrip仁川機場換錢服務，匯率會靚過機場銀行！而且大家可以提早最多14日預約，如果最近要飛韓國，見到呢排匯率靚就可以預約定先，因為換算嘅時候會用預約當時匯率進行兌換。

只要填寫簡單資料同想換幾多錢之後，當日去到現場指定位置將相對應金額嘅港幣交俾負責職員，就可以得到韓幣現金。最近要飛韓國玩嘅朋友們記住預約定啦！

[스팟] 仁川機場外幣→韓幣換錢服務（送BELLYGOM聯名交通卡）

仁川機場邊度可以搞退稅？

• 位置：
  • 3樓出境大堂Zone B、E、J、L附近
  • 禁區3樓Gate 28附近

退稅係好多旅客返香港前都一定會遇到嘅問題。喺仁川機場T1，管制區內外都有可以搞退稅嘅地方，萬一過海關前唔記得退稅，入到去裡面退都冇問題！

記住搞退稅嘅時候要準備好護照、收據、退稅單等，而且因為你去到機場之後仲要check-in、行李寄艙、拎免稅品等等，時間可能會比較緊迫，建議如果打算喺機場退稅嘅朋友們提早到達！

💡香港小編小貼士：建議購物後如果可以做現場退稅嘅話就做定先，一個唔覺意時間預少咗或者唔記得咗去到機場要搞退稅，可能就會白白蝕咗筆錢！

[블로그] 韓國退稅總整理

仁川機場T1邊度可以申請SeS自動通關？

• 辦事處地點：3樓出境大樓H區前
• 服務時間：07:00-18:00

持香港護照人士只要事先申請SeS，就可以好似韓國人咁入境嘅時候行E道，唔洗曬咁多時間排隊等人工海關櫃檯。而就算冇另外申請過自助通關，出境嘅時候亦都可以直接行無人自助通道，快啲入到禁區！

本身仁川機場T1客運大樓自助通關辦事處位於3樓出境大堂Zone H前，所以大家入境嘅時候都唔可以事先做到，要去到出境或者下一次入境先可以自動通關。但由2026年開始，到埗之後海關禁區入面都設有臨時攤位可以申請到SeS，申請完真係會快過慢慢等人工櫃枱。

你可能會有興趣👇🏻

[블로그] 韓國E道「SeS自動通關」教學&注意事項

[블로그] 仁川機場快速通關系統「SMART PASS」攻略

仁川機場T1客運大樓常見問題FAQ

Q1. 航班起飛前幾耐到仁川機場比較安全？

A：如果你係國際線，一般都建議預早2個半至3個鐘到機場會比較穩陣。假如你仲要寄艙、退稅、拎免稅品，或者係旺季出發，就更加唔建議太貼時間去到。寧願早少少食嘢、休息，好過一路趕。

Q2. 點樣確認自己係仁川機場T1定T2出境？

A：最直接就係睇航空公司官網、App、機票確認電郵或者航班資訊。尤其係聯營航班、旅行社套票、來回唔同航空公司嘅情況，最好出發前再確認一次。

Q3. 去弘大或明洞邊種交通最方便？

A：弘大通常AREX普通列車已經幾方便；明洞就要睇你酒店位置，如果附近有機場巴士站，而且行李多，巴士通常會舒服啲；如果想慳錢，就可以考慮搭AREX加轉乘地鐵/巴士。

Q4. 退稅應該喺過海關前定後處理？

A：如果商品係隨身帶上機，辦好登機手續後先去退稅櫃檯搞就得；如果系統要求海關檢查，就要喺安檢前出示護照、退稅單同商品。如果你會將商品放入寄艙行李，就要喺寄艙前先通知航空公司職員，並完成相關海關確認程序，之後先正式托運。

Q5. 仁川機場換錢匯率好唔好？

A：仁川機場匯率一般情況下都會差過明洞、弘大等市區找換店，所以建議大家如果有需要，喺機場換定少少現金去買車票、交通卡、水等等就夠，去到市區之後再搵找換店會比較化算。

Q6. 液體、化妝品、泡菜可唔可以手提上機？

A：如果想手提水、飲料、泡菜、醬類（大醬、辣椒醬）、化妝品類（爽膚水、乳液、面霜）、牙膏等液體上機，每個容器限100毫升以下，總共1升內就可以，詳情請務必參考機場規定。韓國有新聞報過話每年因為超過指定容量而被沒收嘅泡菜有成11噸，大家如果唔肯定自己買嗰款包裝容量係幾多嘅話建議寄艙。

Q7.如果唔識講韓文，喺仁川機場T1會唔會溝通唔到？

A：整體嚟講仁川機場對外國旅客友善，英文標示同基本服務支援都容易搵到。

Q8. 喺仁川機場T1唔見咗行李點算好？

A：如果行李冇出現，建議先留喺行李提取區，立即去航空公司行李服務櫃檯申報，職員通常會幫你登記同追查，T1 1樓中央亦設有兩部行李遺失機器。如果係機場內遺失隨身物品，就可以再去B1/F西邊失物招領中心查詢。出發前記低行李牌號碼，同埋影低行李外觀，之後會方便好多。

你今次會去仁川機場T2客運大樓？

[블로그] 仁川機場T2總整理

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！