仁川素食咖啡廳推介
韓國人越嚟越重視健康，仁川5間純素食餐廳&Cafe，味道同環境都係一流！
Hello，大家好，我哋係由韓國人每日提供最新韓國旅行資訊嘅Creatrip。
近年嚟韓國人對於身體健康同環境有變得慢慢開始重視，喺飲食方面都出現咗唔少變化，而家喺街上成日都會見到好多以素食為題嘅料理，唔好以為素食就唔好食，今日就等小編介紹好幾間俾大家，全部都係小編親身去過，大家可以放心去食！
仁川素食咖啡廳推介
1. 輕鬆的今日（가벼운 오늘）
- 地址：인천 부평구 장제로257번길 27 102호
- 營業時間：11:00 - 19:00、逢星期一休息
輕鬆的今日位於仁川富平，鋪頭唔算好大，只係得3張檯，但呢度以暖色系打造溫馨氣氛，俾人一種好舒服嘅感覺。
鋪頭入面仲有賣好多環保用品，就好似有廚房清潔用品、環保飲管、牙刷、女性衛生用品、番梘等，可以感受到老闆由日常做起愛護地球同環保概念。
嚟呢度如果係外賣，有自備環保杯可以飲品減₩1,000、甜品5%優惠，可以平啲之外，又可以環保，真係一舉兩得！
呢度最出名嘅甜品係伯爵茶瑪德蓮蛋糕（얼그레이 마들렌/₩2,000），食落有淡淡茶香，唔會太甜，但食太多會覺得有少少乾，叫杯茶中和返啱啱好！圖中嘅櫻花曲奇係老闆仲研究中嘅新產品，特別拎咗俾小編試，麥片味嘅曲奇加上香甜士多啤梨醬，就算食多都唔會覺得膩，而手製冰滴咖啡（핸드드립）₩4,500，好香醇，飲嘅時候都唔會覺得太苦。
韓國最近好流行飲烘焙茶鮮奶（호지차라떼/₩5,000），烤過嘅茶葉加上香純牛奶，呢個組合簡直係完美，推薦大家一定要嚟試吓！
2. 李家姊妹米甜品（리자매 쌀 디저트）
- 地址：인천 미추홀구 경원대로640번길 29
- 營業時間：11:00 - 19:30、逢星期日、一休息
以「米」為特色嘅「李家姊妹米甜品」，可以話係麻雀雖小，五臟俱全嘅麵包鋪！由蛋糕、曲奇、多士、蛋撻、鬆餅等，大家諗到嘅甜品，呢度都可以搵到！
每一張標籤上都有寫清楚用咗咩成份，好似紅字寫住「비건（素食）」、或寫住땅콩（花生）、우유（牛奶）、쌀（米）等成分，畢竟對於素食者嚟講，食物成分標示真係好重要！
呢款素食方塊米麵包（비건 큐브 쌀식빵 / ₩5,300），係推薦商品，買佢會送士多啤梨醬同沙津醬，大家可以點住嚟食，麵包好新鮮，而且好鬆軟，加上用咗米製品去做，熱量相對麵粉較低，食完超有飽肚感！
3. Our daily meal（일용할 양식）
- 地址：인천 남동구 인주대로522번길 50
- 營業時間：平日 11:00 - 21:00（Break Time 16:00 - 18:00、Last Order 20:00）、星期六 11:00 - 16:00（Last Order 15:00）、星期日休息
Our daily meal喺一條巷仔入面，門口雖然冇招牌，但簡約風嘅店面，加上咁多人喺度食緊，就算遠望都令人忍唔住想睇幾眼。
鋪頭入面每一個角落都有植物同盆栽點綴，俾人一種好舒服嘅感覺，每張檯仲有擺滿一樽裝有檸檬、芹菜、番茄嘅水，飲落有淡淡檸檬香。
呢度大約只得5張檯，小編建議大家如果想去，可以要早少少到，因為呢度人氣高，所有嘢都係即叫即做，都需要等一段時間。
老闆因為係基督教徒關係，所以食飯之前，呢度會提供麵包同取代提子酒嘅蘋果汁，變得好有儀式感。
芝士蘑菇烤蔬菜（치즈를 넣은 양송이와 채소구이 / ₩16,500）， 裡面有蕃茄、蘑菇、椰菜花、小甘筍等，蔬菜經烤過之後更加甜，配上芝士香、健康又好味；普羅旺斯燉菜（라따뚜이와 바게트 슬라이스매운맛 / ₩18,000）， 小編都係第一次食，上面鋪滿櫛瓜同番茄，味道稍微濃咗啲，加法式麵包一齊食啱啱好；松露油忌廉蘑菇意粉（트러플오일을 곁들인 양송이 크림 파스타 / ₩14,500）， 芝士味濃，但唔會覺得好油膩。
綠色果汁（그린주스 / ₩6,000）係一款健康好味排毒果汁，由新鮮蘋果、奇異果、甘藍等製成，飲落就好似蘋果汁咁、好香同甜，完全冇蔬菜味道；維他命果汁（비타민 주스 /₩6,000）係用咗新鮮橙同檸檬等富含維生素C水果製成，好清爽，推薦大家一定要嚟試吓！
4. Bakery Meal.Zip（베이커리 밀집）
- 地址：인천 연수구 샘말로8번길 11
- 營業時間：星期三至五 11:00 - 19:00、星期六 11:00 - 17:00、逢星期日至二休息
Meal.Zip係一間小型麵包店，用咗韓國產有機小麥、自然發酵品製作麵包，冇加糖、牛油、雞蛋或牛奶等成分，對於食純素嘅朋友嚟講，呢度完全係天堂。
呢度唔大，只可以外賣，雖然細細間，但裝修得都好有feel，因為呢度老闆係自己整完再賣，為咗環保，好歡迎大家自備袋或盒嚟裝。
小編大約晏晝3點左右去到，但好多幾乎麵賣哂，如果大家見到標籤上有貼紙，即係純素麵包，建議有興趣嘅朋友，可以早啲去試。
呢度最受歡迎嘅就係老麵麵包（밀집 사워도우 플레인맛 / ₩7,500），有分原味、穀物、橄欖芝士口味，小編今次試咗原味，好香同好軟熟，好好味！
5. Vegan Mood（비건무드）
- 地址：인천 연수구 하모니로 144 송도 A동 2F 218호
- 營業時間：星期五至日 12:00 - 19:00、星期一至四休息
Vegan Mood係仁川天主教大學附近嘅素食Cafe，星期三同四會進行一日烘焙課程，所以冇開放堂食，但可以揀外賣，如果想坐低慢慢食就要星期五、六、日去。
Vegan Mood考慮到環境同健康，麵包主要以全麥、糙米、白米、燕麥粉同鷹嘴豆等材料製成，呢度有一張大檯同三張兩人檯，周圍都有綠色植物同海報，令空間睇落更加生動。
呢度有好多純素甜品，包括麵包、曲奇、蛋糕等。
紅蘿蔔核桃全麥蛋糕（당근 호두 통밀케이크 / ₩6,800）夠濕潤，加咗細細粒紅蘿蔔食落更加甜，而艾草無花果蛋糕（참쑥 무화과 쌀 파운드케이크 / ₩3,700）味道好特別，除咗好香艾草味之外，仲會食到花果果粒。
另外，呢度飲品都係純素，老闆用咗豆漿取替牛奶，飲落唔會好甜，反而有種健康嘅感覺。有機農寶城綠茶豆奶（유기농 보성녹차 소이밀크/ ₩4,500）同國產艾草豆奶（국산 참쑥 소이밀크 / ₩4,500）都好推薦大家嚟試吓！
如果大家都想食得健康，之後去仁川，會唔會考慮吓試食純素嘅餐廳同Cafe呢？以上幾間都係小編親身去過，每一間都好好味！希望大家會鍾意呢次嘅分享啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
