東豆川一日遊行程推介
京畿道「東豆川」令人覺得短時間好似去咗日本咁？之前《請回答1988》崔澤同德善去嘅復古電影院原來喺呢度？
Hello，大家好，我哋係由韓國人每日提供最新韓國旅行資訊嘅Creatrip。
唔知大家之前嚟韓國旅行，搭地鐵最遠嘅站去到邊呢？今日小編想帶大家去到一號線尾二站「東豆川」，可能好多人都冇聽過呢個地方名，而家就等小編同大家講有咩特別啦！
京畿道「東豆川」景點推薦
1. 外國人觀光特區（외국인관광특구）
- 地址：경기 동두천시 생연동
- 小Tips：一號線保山站一號出口行大約200米
駐韓美軍喺東豆川設有基地，所以呢度好多異國特色文化，當中要同大家介紹嘅係「外國人觀光特區」。
街道上可以見到好多色彩鮮豔嘅鋪頭、酒吧，立體招牌去吸引路人目光。
不過唔知係唔係平日朝早小編太早去嘅關係，好多鋪頭都未開門，建議大家下次去次前可以check吓啲鋪頭幾點開。
2. 東光劇場（동광극장）
- 地址：경기 동두천시 동광로 33 동광극장
「東光劇場」喺1959年就開始營業，入面有283席座位，係韓國目前唯一一日間老式電影院，但仲播緊新上電影。
不過可以揀嘅電影種類並唔多，同時場次亦比較少，呢次小編去到嘅時候，老闆話唔開門，直接閂埋門就走人....
tvN
呢間電影院韓劇《請回答1988》、《Signal 信號》都嚟過取景，當時崔澤同德善相約去睇電影，唔知大家又有冇印象呢？
3. 松月館（송월관）
- 地址：경기 동두천시 큰시장로 28-10
- 營業時間：11:30 - 21:00
東豆川「松月館」係一間專門賣「年糕排骨」嘅百年老店，贏得好多當地人口碑，甚至而家開到兩層樓。
入到鋪頭次後可以先去二樓落單，聽講平日晏晝排隊先入到去，就知佢有幾咁高人氣。
排骨湯（갈비탕）₩14,000
因為年糕排骨一次要叫兩人份以上，加上天氣有啲凍，小編就叫咗佢第二人氣高嘅排骨湯，量多，而且大家可以根據個人喜好加辣椒、辣蘿蔔一齊食，或者覺得太淡仲可以落啲鹽，食完身體都變得暖笠笠。
4. Ever Knock（에버노크）
- 地址：경기 동두천시 평화로2349번길 43
- 營業時間：11:00 - 21:00
喺松月館食完飯之後，只要行10分鐘左右就會去到「Ever Knock」，佢係東豆川地區一間小有名氣嘅Cafe。
呢度會用繪圖介紹佢哋嘅menu，畫風可愛，令人每款都好想試吓。
鋪頭入面主要以白色同綠色為主色，俾人一種小清新感覺，搭配綠色植物同小盆栽，令人彷彿置身喺一個室內小花園咁。
士多啤梨鮮奶（딸기라떼）₩6,500；香橙水果撻（오렌지타르트）₩6,300
士多啤梨鮮奶上面仲插多咗一粒士多嘩梨去點綴，相當可愛，將佢哋攬勻飲之後超好味！唔會太酸或太甜。水果撻中間嘅忌廉配酸酸甜甜香橙果肉超適合，只係下面餅底部分烤得有啲硬，有啲美中不足。
5. Nijimori Studio（니지모리 스튜디오）
- 地址：경기 동두천시 천보산로 567-12
- 營業時間：11:00 - 21:30（最後入場時間20:00）
- 費用：₩20,000
呢個日式攝影場內有日式家具店、陶器店、和式住宿、和服店、神社、壽司店、拉麵店及日式Cafe等。
雖然呢度唔算好大，不過應有盡有，算係彌補到小編兩年幾冇去日本嘅心情...
呢度有免費寫明信片嘅地方，唔少觀光客都會喺呢度寫上祝福再寄出去。
呢度有賣好多日本有關嘅小物同零食、飲品等，完全好似瞬間去咗日本咁。
6. Niji拉麵（니지 라멘）
- 地址：Nijimori Studio 광장1동
- 營業時間：11:00 - 21:00
喺Nijimori Studio主街好易搵到呢間拉麵店。
內部好闊落，由店外到店內都充濃濃日式氣息、就連職員都會穿住日式衫，每一個小細節都可以睇得出老闆嘅用心。
豚骨拉麵（돈코츠라멘）₩12,000
小編叫嘅係「豚骨拉麵」，湯底雖然冇喺日本食到咁濃郁，不過烤過嘅豚骨同溏心蛋真係好推！之後去Nijimori Studio嘅朋友都可以試吓！
除咗可以回味以前韓國復古氣色之外，仲可以眨吓眼好似去咗日本咁？距離首爾只係一個鐘車程，大家有時間一定要去打個卡啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
