坡州一日遊行程推介
遠離首爾市區繁囂，京畿道坡州一日遊行程推介，充滿異國風情！
Hello，大家好，我哋係由韓國人每日提供最新韓國旅行資訊嘅Creatrip。
想遠離首爾，搵個郊區地方行吓？小編推薦大家去坡州，由合井站搭車去只係需要30分鐘車程，呢度好有異國風情，未去過嘅朋友，之後會唔會都想去呢？
坡州一日遊行程推介
1. 坡州智慧之林（파주 지혜의숲）
- 地址：경기도 파주시 회동길 145 아시아출판문화정보센터
- 營業時間：平日10:00 - 18:00（受到疫情影響，時間可能會有變動）、週末及公眾假期10:00 - 20:00
平時睇韓劇唔知大家會唔會發現，好多時去拍嘅圖書館都特別大，而且好壯觀呢？喺坡州有一間「智慧之林」圖書館，呢度有過百間出版社聚集。
大家諗到嘅歷史、哲學、詩詞、現代散文、童話書等，呢度應有盡有。
圖書館入面仲有一間Cafe，俾人可以坐底邊嘆咖啡邊休息。
之前韓劇《芝加哥打字機》、《請輸入關鍵詞》、《德魯納酒店》、《金秘書為何那樣》等都有喺度取景，如果想重溫劇中經典場景，咁你就一定唔好錯過啦！
2. 佳林鄉村飯桌（가림시골밥상）
- 地址：경기 파주시 탄현면 새오리로 68
- 營業時間：11:00 - 21:30
大家唔好睇佢咁舊就以為冇好嘢，因為大家只要一入到去就會發現門口貼滿好多韓星嘅簽名，就連BTS都嚟過！
即使當日小編係平日去，而且天氣唔太好仲落緊雨，仍然有好多客人都會去，大家就可以知道佢幾有魅力。
鐵網烤牛肉定食（석쇠소불고기정식）₩18,000（需要至少叫兩人份）
其實呢度醬油蟹套餐先係佢哋招牌菜，不過當日小編去到有啲凍，就叫咗佢哋嘅「鐵網烤牛肉定食」，落完單之後，職員好快就上小菜，呢到會俾成十幾樣小菜，另外仲會有埋大醬湯，份量真係多到一定會食得超飽。鐵網烤牛肉味道好似烤牛肉餅，只係冇太多汁，乾咗少少，而且有焦香味。
3. 普羅旺斯村（프로방스마을）
- 地址：경기 파주시 탄현면 새오리로 69
- 營業時間：10:00 - 22:00
喺餐廳對面就係「普羅旺斯村」，呢度好有異國風情，大家嚟到都會影到好多人生照。
普羅旺斯村入面有陶瓷工房、花店、香氛蠟燭專賣店、服飾店、鞋店等特色小店，真係一直行會覺得自己好似去咗另一個國家咁。
如果係鍾意歐洲飾品嘅朋友，可以嚟到發現好多寶物，價錢唔算好貴，可以買嚟自用或者送俾朋友做手信都得。
4. 9 BLOCK COFFEE普羅旺斯店（나인블럭 프로방스점）
- 地址：경기 파주시 탄현면 새오리로 83
- 營業時間：10:00 - 22:00
9 BLOCK COFFEE係一間連鎖品牌，近年嚟好受韓國人歡迎，因為佢除咗係一間烘焙坊、餐廳之外，仲有藝術展覽空間，食完再行一舉兩得。
呢度主打自然庭園式風格，好有文藝氣息。
Cafe內部都好大，而且餐枱擺設方向都好講究。
最近佢哋主打「糖漬栗子忌廉鮮奶咖啡」，小編出於好奇心就試咗，下面嗰層係糖漬栗子，上面一大層都係忌廉，大家一定要攪勻先好飲，如果唔係就會太甜。不過朱古力鬆餅有啲太乾同太硬，連切都難，小編建議可以試吓其他麵包或者蛋糕。
5. HEYRI藝術村（헤이리예술마을）
- 地址：경기 파주시 탄현면 헤이리마을길 70-21 헤이리 갈대광장
Heyri藝術村入面有40幾棟建築物 ，當中有博物館、展示館、音樂廳、藝術複合式空間、Cafe同餐廳等。
另外因為呢度抱持住同大自然共存理念，所以建築物唔可以起超過三層樓以上，而且裝修都好有特色。
喺度仲可以搵到韓國近代歷史博物館，裡面有好多復古文物。加上藝術村仲有好多手作工坊，可以製作出自己專屬作品，一家大細嚟都幾唔錯。
6. 醜八怪遊樂園（못난이유원지）
- 地址：경기도 파주시 탄현면 헤이리마을길 59-78
- 營業時間：10:00 - 18:00
一入到去就會見到呢三隻成日喺韓劇都會見到嘅公仔。
小編個人真係好鍾意呢種復古風，如果大家都想知韓國以前係點，好推薦大家嚟感受一吓。
除咗參觀之外，呢度仲可以叫拉麵、辣炒年糕、魚糕等街邊小食。
7. MOCHUISLE（모쿠슈라）
- 地址：경기 파주시 탄현면 헤이리마을길 54
- 營業時間：星期日至星期四10:30 - 21:00（Break Time 15:00 - 16:00、Last Order 20:00）、星期五及星期六10:30 - 21:30、平日可以享用Cafe服務
MOCHUISLE係一間三層樓高嘅義式餐廳兼Cafe，外面係用紅磚牆去裝修，遠望已經好引人注目。
室內好有高級嘅感覺，加上特色燈飾點綴，令到呢度更加有氣氛。
扇貝清炒意粉（관자 오일 파스타）₩20,000
呢度有好多飲品、點心同主菜俾大家揀，小編最後叫咗扇貝清炒意粉，份量雖然少，不過佢好彩唔會太油膩，味道啱啱好，好推薦大家之後去都可以試吓。
坡州離首爾唔算好遠，不妨可以抽一日時間去行吓。
如果有更多想知嘅內容，都可以隨時留言或者dm話俾我哋知：）
Instagram：creatrip.hk