抱川一日遊行程推介
點解咁多韓劇都鍾意喺抱川取景？跟住小編去一日遊睇佢有咩特別啦！
Hello，大家好，我哋係由韓國人每日提供最新韓國旅行資訊嘅Creatrip。
今日小編想同大家介紹一個京畿道景點，佢就係「抱川」啦！好多韓劇都鍾意嚟呢度取景，佢到底有咩特別？就等我哋一齊睇吓啦！
抱川一日遊行程推介
1. 漢灘江地質公園（한탄강 지질공원）、鴿子囊瀑布（비둘기낭 폭포）
- 地址：경기 포천시 영북면 대회산리 415-2
- 開放時間： 每日 09:00 - 18:00
漢灘江地質公園被聯合國教科文組織列為世界地質公園，佢哋嘅柱狀節理地形保存得好好。
而「鴿子囊瀑布」係好耐之前漢灘江沿岸火山噴發時，所形成嘅獨特地形，因為望落好似數以百計嘅鴿子棲息而命名。
Netflix《屍戰朝鮮》
因為呢度俾人一種好神秘嘅氣氛，好多電視劇或者電影都嚟過取景，特別係古裝劇，當中包括有Netflix《屍戰朝鮮》、MBC《善德女王》、KBS《推奴》、電影《弓箭之戰》同《大虎：獸獵傳奇》等。
2. 漢灘江天空之橋（한탄강 하늘다리）
- 地址：경기 포천시 영북면 대회산리 377
- 開放時間：每日 09:00 - 18:00
經過鴿子囊瀑布之後，一直行就會見到長大約200m嘅漢灘江天空之橋。
喺50m高嘅橋上，可以一覽漢灘江嘅美景。
tvN《金秘書為何那樣》
之前韓劇《金秘書為何那樣》同《愛的迫降》都有嚟過取景添！
3. 抱川Art Valley（포천 아트밸리）
- 地址：경기 포천시 신북면 아트밸리로 234
- 開放時間：星期一至四 09:00 - 19:00 (最後入場時間：18:00) 、 星期五至日及公眾假期 09:00 - 22:00 (最後入場時間：20:00）、每月個第一個星期二休息
- 入場費：成人₩5,000、青少年₩3,000、兒童₩1,500 /（單軌列車：成人₩2,300、青少年₩1,800、小童₩1,300）
- 官網：撳我
原本呢度係一個長期被忽視嘅廢棄採石場，不過喺2003年，抱川市站將呢度重新改造，將佢變身成為一個複合文化藝術空間。
抱川Art Valley嘅熱門景點就係天鑄湖（천주호），佢係一個自然形成嘅湖泊、水流經採石場岩石裂縫，特別係夜晚嘅時候，喺度仲可以欣賞到燈光show，真係超靚！
SBS 《藍海傳說》
同樣呢度都係散發着一種神秘氣息，之前《藍海傳說》，全智賢同李敏鎬就係喺呢度相遇。另外《月之戀人－步步驚心：麗》同《和遊記》都有取景，唔知大家又有冇印象呢？
呢度有重演 《藍海傳說》李敏鎬坐住嘅船，令人再次重溫當中劇情。
4. 抱川 天文科學館（포천 천문과학관）
- 地址：경기 포천시 신북면 아트밸리로 234
- 開放時間：星期一至四 09:30 - 17:30、星期五至 09:30 - 21:30
- 入場費：只要有抱川Art Valley門票，就可以免費入場。
抱川天文科學館內設有天文展覽館、週末仲有開放天文台，如果喺週末夜晚嘅時候嚟參觀，甚至可以透過天文望遠鏡望到星星同行星。
如果嚟到天文科學館，小編建議大家可以參觀3樓嘅天文投影室，喺呢度每30分鐘就會播放一段有趣天文觀測影片，有興趣嘅朋友可以去1樓櫃檯預約。
有15分係會講解唔同季節可以望到嘅星座，無論係咩天氣都可以見到！之後5分鐘係會講關於太空嘅4D影片，好似體驗緊一種喺太空中坐緊過山車嘅感覺，好神奇！
5. 香草島樂園（허브 아일랜드）
- 地址：경기 포천시 신북면 청신로947번길 35
- 開放時間：平日 10:00 - 21:00、星期六 10:00 - 23:00、星期日 10:00 - 22:00、逢星期三休息
- 入場費：成人₩9,000、小童₩7,000
- 官網：撳我
香草島樂園係全世界上第一個香草植物博物館，呢度提供各種同香草相關嘅景點同體驗，好有異國情調。
喺呢度大家仲可以買到用香草整成嘅芳香劑、化妝品、茶包同咖啡等。味道夠香之外，佢哋包裝得仲要好靚，當做紀念品或者送禮物俾人都非常之好。
呢度365日都為遊客帶嚟靚景，雖然朝早嚟都好唔錯，不過夜晚會開哂燈更加靚，感覺完全唔同哂！尤其係冬天去嘅話，會一直播聖誕歌，增添聖誕同年尾氣氛。
入到去之後會發現有好多聖誕燈飾，好似去咗一個童話故事村咁。
SBS 《海德哲基爾與我》
之前韓劇《海德哲基爾與我》同《Oh My Venus》喺夜景嘅時候都嚟過，大家又有冇印象呢？
6. 香草島樂園Athenae Hall Restaurant（허브아일랜드 아테네홀 레스토랑）
- 地址：경기 포천시 신북면 청신로947번길 35
- 營業時間：每日 11:00 - 21:00
呢間餐廳係以雅典娜神廟為主題建造，只係睇門口係唔係已經好有feel呢？
同時入到去會見到呢度裝修得好有異國風情，有一種高級嘅感覺。
香草番茄意粉&炸豬排 ₩16,000
因為加咗香草，令到味道更加香同好味。
7. Herb Bakery（허브베이커리）
- 地址：경기 포천시 신북면 청신로 947번길 35
- 營業時間：平日、星期日10:00 - 21:00、星期六及公眾假期 10:00 - 22:00
呢度每日都會烘焙同銷售100多種麵包同蛋糕，甚至佢哋整嘅麵包都係用佢哋自種嘅香草。
喺1樓買完之後就可以上2樓坐底慢慢食。
麵果麵包₩4,000 / Oreo花盆奶昔₩7,000
呢度獨特嘅甜品造型只有喺呢度先可以食到，蘋果麵包入面有超甜嘅醃蘋果，一咬落去甜味就喺口中蔓延，另外呢個要用鏟形狀羹去𢳂嘅盆栽Oreo奶昔係唔係好得意呢？如果係夏天去，上面仲會放多塊羅勒葉，感覺好似真係食緊盆栽咁，得意得嚟又好味！
8. 園頭幕（원두막）
- 地址：경기 포천시 영북면 비둘기낭길 86 가동
- 營業時間：平日 11:00 - 15:00、週末11:00至到材料賣哂為止、逢星期一休息
韓國料理當中，有一種叫做「包飯」，喺將肉同各種小菜用生菜包住嚟食，喺抱川大家就可以輕鬆喺唔同鋪頭搵到呢種食法。
小編去嘅呢間相比其他更加乾淨同有氣氛。
包飯定食 ₩11,000（2人份起）
叫包飯定食就會有飯、清國醬湯、辣炒豬肉同各種小菜，將佢哋所有包埋一齊食超好味！如果唔夠食，老闆仲話飯、小菜同生菜都可以一直refill，令人食到超滿足！
唔知大家之前又有冇去過抱川呢？如果冇之後一定要去一次！咁就可以知道，點解咁多韓劇都鍾意嚟取景，話唔定都會陷入呢個地方嘅魅力之中。
如果有更多想知嘅內容，都可以隨時留言或者dm話俾我哋知：）
Instagram：creatrip.hk