西村美食總整理
去西村唔可以錯過嘅餐廳！好多都係離景福宮超近！
Hello，大家好，我哋係由韓國人每日提供最新韓國旅行資訊嘅Creatrip。
西村（서촌）係拍景福宮左邊嘅區域，呢度有唔少小巷隱藏好多美食，今次小編直接去到，搵嚟好幾間想同大家介紹！之後如果經過，話唔定呢篇blog可以幫到你！
西村美食總整理
1. Hillside Table（힐사이드테이블）
第一間想同大家介紹嘅係Hillside Table，呢排喺sns超出名，因為佢係出名食健康美食。
當日差唔多係佢開舖之後去到，唔使10分鐘基本上已經坐滿晒人，可想言知佢人氣幾咁高！所以建議大家如果想食到，最好係開舖冇幾耐去，或者係晏晝1:30之後去。
小編當日叫咗Sanchez Sandwich（산체스샌드위치）同Salmon Poke Bowl（살몬 포케라이스 보울），小編覺得兩款都幾唔錯，不過建議大家三文治最好快啲食，如果唔係麵包就越嚟越硬，而三文魚飯撈埋牛油果一齊食，唔單止賣相好，就連味道都一流！
Hillside Table（힐사이드테이블）
- 地址：서울 종로구 경희궁2길 7
- 營業時間：11:30 - 21:20、Break Time 15:30 - 17:00
- 小Tips：景福宮站7號出口行大約10分鐘
- 價格：Sanchez Sandwich（산체스샌드위치）￦12,500、 Salmon Poke Bowl（살몬 포케라이스 보울）￦13,500
2. 土俗村蔘雞湯（토속촌삼계탕）
呢間土俗村蔘雞湯喺1983年已經開張，無論幾時去到都大受歡迎，就算係炎炎夏日都有唔少人排隊。
呢度有好多位，就算係團體嚟到，都有包廂座位。
呢度嘅人蔘雞湯底濃郁，雞嘅肉質鮮嫩，真係令人食完都好難忘！海鮮煎餅外脆內軟，份量較多，同蔘雞湯一齊食都好夾。
土俗村蔘雞湯（토속촌삼계탕）
- 地址：서울 종로구 자하문로5길 5
- 營業時間：10:00 - 21:30
- 小Tips：景福宮站2號出口行大約5分鐘
- 價格：蔘雞湯（삼계탕）￦18,000、海鮮蔥餅（해물 파전）￦15,000
3. Dotori Brothers（도토리브라더스）
唔知只係睇外觀，大家認唔認得出有邊一套戲嚟過取景？答案係《具景伊》、《來魔女食堂吧》、《你喜歡布拉姆斯嗎?》、《天氣好的話，我會去找你》、《再見媽媽又再見》等。
雖然舖頭唔算大，但內部嘅位都算多，呢度人氣好高，如果大家係晏晝或者夜晚去，可能要排30至1個鐘，所以建議大家最好喺14:00之後去。
Dotori Brothers係一間行日韓式風格嘅餐廳，小編試咗佢哋嘅兩款招牌菜，牛油黃金蛋三文魚飯超出色！上面有一層甜醬，撈埋一齊食超幸福！另外辣大腸飯唔算話好辣，雖然有啲油膩，啖啖都係脂肪，不過喺其他地方好少見，嚟呢度一定要試！（如果大家覺得唔夠辣，舖頭裡面有另一種特殊辣醬俾自己加。）
Dotori Brothers（도토리브라더스）
- 地址：서울 종로구 경희궁길 41
- 營業時間：11:30 - 21:20 、Break Time 15:20 - 17:00
- 小Tips：景福宮站7號出口行大約10分鐘
- 價格：牛油黃金蛋三文魚飯（아보카도 골든 에그 살몬）￦14,500、 辣大腸飯（불대창 덮밥）￦14,500
4. 奶奶家（할매집）
雖然外觀睇落好普通，不過其實佢係一間手榮獲米芝蓮（2017～2022年）連續5年推薦嘅餐廳，佢哋最出名係食豬腳同馬鈴薯排骨湯。
呢度位唔算多，而且係傳統韓式坐地下，未必所有人都會坐得慣，不過就好有氣氛。同餐廳名一樣，呢度嘅職員多數都係奶奶或者阿姨，大家都好親切。
嚟到呢度一定要食佢哋嘅豬腳！小編同朋友一齊去，咁大份都只係￦30,000，肉夠嫩之外，略帶甜味，大家可以用菜加泡菜同醬一齊包煮食，因為呢度得到米芝蓮推薦，鍾意食豬腳嘅朋友千祈唔好錯過！
奶奶家（할매집）
- 地址： 서울 종로구 사직로12길 1-5
- 營業時間： 12:00 - 21:30
- 小Tips：景福宮站7號出口行大約2分鐘
- 價格：豬腳（족발）￦30,000
5. 西村樓梯家（서촌계단집）
如果你係鍾意食海鮮，小編想推薦大家嚟呢一間西村樓梯家，距離景福宮站好近，喺韓國當地一間出名小型海鮮餐廳。
餐廳內部只係得大約6張枱，因為主要係當地客多，Menu只係得韓文，如果怕睇唔明，可以跟住小編一樣咁樣叫。
小編叫嘅係清蒸扇貝，好香好甜，配上佢哋嘅醬汁一齊食好味10倍！拉麵入面有超多海鮮，包括青口、蝦、魷魚等，相當豐富！另外呢度一開始會提供青口湯係免費嘅！
西村樓梯家（서촌계단집）
- 地址：서울 종로구 자하문로1길 15
- 營業時間：平日 14:00 - 00:00
- 小Tips：景福宮站2號出口行大約2分鐘
- 價格：扇貝（가리비）￦29,000、拉麵（라면）￦7,000
6. Hanokdal（한옥달）
Hanokdal用咗韓屋風格去裝修，由入口已經可以感受到寧靜嘅氣氛。
室內嘅裝修好復古，有一種好似返到去鄉下嘅感覺，每一張枱都有一段距離，小編見到唔少韓國人都會喺度約會。
辣椒醬意粉係啲蕃茄醬做底，甜甜地辣辣地好特別，田螺大醬意大利飯係小編最期待，味道好濃郁而且好獨特，配埋白汁一齊食增添美味！呢度嘅款式唔單止令外國人印象深刻，就連韓國人都好鍾意，如果怕膩嘅朋友可以加叫一杯檸檬梳打。
Hanokdal（한옥달）
- 地址：서울시 종로구 자하문로 52
- 營業時間：星期一至六11:30 - 21:00 、星期日12:00 - 21:00、Break Time 15:00 - 17:00
- 小Tips：景福宮站2號出口行93m
- 價格：辣椒醬意粉（고추장파스타）￦22,000、田螺大醬意大利飯（우렁 된장 리조또） ￦19,000 、 檸檬梳打（레몬에이드） ￦8,000
7. Ppyeotanjib（뼈탄집）
如果你喺西村搵緊一間燒肉店，小編想推薦大家去Ppyeotanjib，佢人氣好高，小編平日去所以唔使等位，但只要一到夜晚就要等一段時間。
呢度每一張枱總會有一個無線叉電器，相當之貼心！所以嚟呢度除咗可以食飽之外，就連手機都可以叉滿電！
大家嚟到呢度可以好放心，因為職員會一直幫大家燒，而且肉夠厚，好有肉汁，另外呢度仲有好多醬俾大家點嚟食，好味到食多幾碗飯都得！
Ppyeotanjib（뼈탄집）
- 地址：서울시 종로구 자하문로1길 13
- 營業時間：12:00 - 23:00
- 小Tips：景福宮站2號出口行79m
- 價格：五花肉梅頭豬套餐 （삼겹목살세트）￦49,000
8. Najuso羅州牛骨湯（나주곰탕）
羅州牛骨湯係一個可以真正食到韓國鄉土飲食「牛骨湯」嘅地方，而且佢就係位於景福宮站隔離，交通都好方便。
舖頭採用成面落地窗設計，採光好好令舖頭睇落好光猛，打開嘅時候都好涼爽。如果人多嘅時候，建議可以先訂位。小編去嘅時候睇到幾多團體客人，每一團都幾乎有5、6個人。
小編叫咗舖頭入面賣得最好嘅鮑魚排骨湯、羅州排骨湯同綜合煎餅。水煮肉同燉排骨都好出名，推薦大家嚟到都要試！
Najuso羅州牛骨湯（나주곰탕）
- 地址：서울 종로구 자하문로2길 8
- 營業時間：10:00 - 22:00
- 小Tips：景福宮站3-1號出口行大約2分鐘
- 價格：飽魚排骨湯（전복갈비탕）￦16,000、什錦煎餅（모듬전）￦18,000
西村有唔少美食，唔知以上咁多間，有冇邊一間啱大家胃口呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk