仁川美食大公開日
韓國當地人推薦嘅仁川美食大公開!小食、餐廳、咖啡廳通通都有!
Hello,大家好,我哋係由韓國人每日提供最新韓國旅行資訊嘅Creatrip。
如果之後有諗住去仁川玩嘅朋友,今次小編幫大家整理好一個「仁川美食清單」,之後去到唔使再煩要食咩,好多都係係由當地人推薦,保證大家一定可以食到舔舔脷!
仁川當地人推薦美食:江華島
1. 一日定食(하루정식)
- 地址:인천 강화군 강화대로404번길 7 그랑프리타워 1층 105호
- 營業時間:11:30 - 21:00(Break Time 15:00 - 17:00、Lunch Time Last Order 14:00、Dinner Last Order 19:30)、星期六11:30 - 15:00、逢星期日休息
呢間「一日定食」其實唔太易搵到,因為佢喺一條小巷入面,不過仍然有唔少人都會專程去食。
一日定食(하루정식)₩10,000
「一日定食」套餐會根據唔同季節當造時蔬去整出唔同韓定食,今次小編去到嘅時候係「韓式烤肉定食」,有好多款小菜,食得好飽令人好滿足。加上就快到聖誕節,鋪頭入面都有唔少聖誕裝飾,好溫馨。
仁川當地人推薦美食:松島
1. Geogung(거궁)
- 地址:인천 연수구 송도국제대로 157 오네스타 2층
- 營業時間:11:00 - 22:00
以「利川米飯」作為招牌嘅韓定食連鎖店「Geogung」,係好多韓國人都鍾意去嘅餐廳之一,鋪頭內部夠闊,而且夠光,有好多款唔同位俾大家坐。
Geogung韓食(거한식)₩16,000
呢度擺滿成張檯其實都係一人份,係唔係覺得好誇張呢?呢度已經有魚、包肉、醬油蟹、雜菜等,加上多款小菜,一次過可以食到咁多,真係諗返起都覺得幸福。
2. ONSEN天丼(온센텐동)
- 地址:인천 연수구 송도국제대로 123 현대프리미엄아울렛 송도점 B1
- 營業時間:10:30 - 20:00(Last Order 19:40)
ONSEN天丼係一間連鎖店,首爾喺江南、聖水、光化門等地方都有分店,佢哋主要販售日式天婦羅。
ONSEN天丼(온센텐동)₩8,900
雖然大家可能會覺得嚟韓國點解仲要食日本嘢?不過呢間真係好多韓國人,只要一去到「Hyundai Premium Outlet」就會想食。小編叫嘅係佢哋招牌ONSEN天丼,裡面有炸蝦、炸海苔、炸茄子、炸南瓜、炸青陽辣椒同水煮蛋,配上特製鹹鹹地又甜甜地嘅醬汁,真係好好味。
3. An's Bakery(안스베이커리 송도점)
- 地址:인천 연수구 센트럴로 160
- 營業時間:08:00 - 23:00
「An's Bakery」入面有超多款麵包、蛋糕、甜品等,價錢一啲都唔貴,大家喺附近行完,都可以去呢度嘆杯咖啡同坐底休息吓。
水蜜桃冰茶(복숭아 아이스티)₩4,000、西柚蛋撻(자몽타르트)₩7,300
水蜜桃冰茶香得嚟又唔會太甜,配酸酸甜甜嘅西柚蛋撻就真係最適合不過。
仁川當地人推薦美食:月尾島
月光烤貝(달빛조개)
- 地址:인천 중구 월미문화로 65
- 營業時間:17:00 - 24:00、星期六11:00 - 02:00、星期日11:00 - 24:00
月尾島文化街有好間生魚片、烤貝、海鮮刀削麵等海產餐廳,當中如果講到一定要食,就係呢間月光烤貝。
戀人套餐(연인셋트)₩60,000
小編揀咗戀人套餐,包括有各式貝類、蝦同刀削麵。大家只要擺上爐到燒就可以。 元貝好鮮甜,同佢哋提供嘅芝士同蕃茄醬一齊食,可以去腥味,不過烤嘅時候大家一定要小心,啱啱烤好嘅殼好熱,大家一定要用手套去拎。另外有時火太大,貝殼會彈起,有少少危險。
當就燒完嘅時候,職員就會送上大大碗刀削麵, 裡面有幾粒蜆,湯底係用咗海鮮加蒜頭去煮,好濃味,推薦大家一定要試!
仁川當地人推薦美食:中國城
1. 十里香(십리향)
- 地址:인천 중구 차이나타운로 50-2
- 營業時間:12:00 - 20:00
呢度每一間鋪頭都以紅色去裝修,甚至仲有好多大型公仔去吸引大家。
豬肉口味( 고기 맛)₩2,000
甕窯烤餅一共有豬肉、紅豆、蕃薯同甜南瓜四種口味,皮有啲厚,豬肉口味雖然唔多肉汁,但係料都夠足。
蕃薯口味( 고구마 맛)₩2,000
蕃薯口味餡都幾多,不過食落有啲似係月餅嘅奶黃豆沙味,唔太似食緊蕃薯。
2. 紅豆餅(홍두병)
- 地址:인천 중구 차이나타운로 48
- 營業時間:平日10:30 - 20:30、週末10:00 - 21:00
「紅豆餅」 同「十里香」都係喺同一條街,喺當地超出名,成日都要排隊先買得到,佢哋總共有賣紅豆、朱古力、忌廉芝士、抹茶、芒果五個口味。
忌廉芝士 (크림치즈)₩2,000
啱啱做好嘅紅豆餅熱辣辣,內餡好足,忌廉芝士口味鹹鹹甜甜,食落都唔錯,不過最穩陣一定係食紅豆味。
3. 燕京大飯店(연경)
- 地址:인천 중구 차이나타운로 41
- 營業時間:10:30 - 21:30(Last Order 21:00)
「燕京大飯店」有四層樓咁高,只係睇外觀已經有好氣勢,甚至一到Lunch Time都要大排長龍,可想言知佢人氣幾咁高。
炸醬麵(짜장면)₩7,000、麵包蝦(멘보샤)₩20,000
「燕京大飯店」炸醬麵有個焦香味,裡面放咗洋蔥同碎豬肉,韓式炸醬麵普遍偏甜,不過呢碗算偏鹹,小編個人都幾鍾意。麵包蝦價錢偏貴,不過始終係用麵包做皮會好吸油,食到後面會覺得有啲膩。
仁川當地人推薦美食:新浦國際市場
1. 元祖新浦辣雞丁(원조 신포닭강정)
- 地址:인천 중구 우현로49번길 3
- 營業時間:10:30 - 21:30(外賣21:00)、逢星期一休息
講到仁川「新浦國際市場」一定要食咩?咁就一定要提「元祖新浦辣雞丁」啦!而家就算開咗兩間鋪,依然都係大排長龍!
辣雞丁中份(닭강정 중)₩14,000
喺雞粒上面淋上酸酸甜甜嘅醬汁,再灑上少少花生粒,炸雞冇因為淋咗汁邊軟,反而仲係好酥脆,果然36年嚟都係屹立不倒!另外佢哋仲會提供白蘿蔔同沙律俾大家去解膩,之後如果去新蒲國際市場一定要試吓!
2. 流星小吃(유성분식)
- 地址:인천 중구 우현로49번길 6
- 營業時間:09:00 - 21:30
喺元祖新浦辣雞丁附近,仲有一間人氣小食店叫做「流星小吃」,佢哋主要賣嘅係血腸、炸物、餃子、辣炒年糕等。
血腸、辣炒年糕、炸物套餐(셋트메뉴)₩6,000
聽講呢度最出名就係用長條年糕做嘅辣炒年糕,雖然冇平時食嘅年糕咁煙靭,不過每一啖都好紮實,而且一個set仲可以食到三款傳統小食,算係幾抵!
3. 山東餃子(산동만두)
- 地址:인천 중구 우현로49번길 33
- 營業時間:08:30 - 22:00
「山東餃子」係一間營業超過40年,專門賣中式麵包、餃子,仲最出名嘅「空心餅(공갈빵)」,而且仲會限制一人最多只可以買兩個。
空心餅(공갈빵)₩2,000
大家會唔會好奇咁大個餅,裡面會裝咩呢?答案就係空氣 ,麵包入面係空心,不過喺外層就一層糖霜,又脆又甜,好適合當小食嚟食。 老闆娘仲有講到如果同雪糕一齊食會更加好味!不過因為一次出爐有限,出爐之後要等放涼7分鐘,所以小編大約等咗30分鐘左右。
4. 新浦友利餃子(신포우리만두)
- 地址:인천 중구 제물량로166번길 29
- 營業時間:10:00 - 21:00
綜合餃子(모듬만두)₩6,000
「新浦友利餃子」雖然喺全韓國都有分店,但總店就係喺仁川新浦市場入面,即使唔係Lunch time去都依然超多客人喺入面,或者係外賣拎走。 當中佢哋最有人氣就係「綜合餃子」同Q麵(쫄면),綜合餃子裡面有豬肉、泡菜、蝦各2粒,皮薄餡多,如果鍾意食韓國傳統餃子嘅朋友,千祈唔好錯過!
仁川當地人推薦美食:永宗島
1. 海松生菜包飯(해송쌈밥)
- 地址:인천 중구 공항서로 177
- 營業時間:10:30 - 20:30(Last Order 19:50)、逢星期一休息
「海松生菜包飯」一共分咗4層,唔單止係一間餐廳,一樓有賣杯盤、四樓仲係一間景觀Cafe。
螺肉包飯定食(우렁쌈밥정식1인)₩15,000
大家可能都有聽過生菜包肉,但生菜包「螺肉」又聽過未呢?呢度生菜同十幾種小菜都係無限量供應,甚至連辣炒豬肉同蘿蔔燉魚都係可以無限Refill! 包飯醬係用咗20種堅果製作而成,裡面有花生、南瓜籽、葵花籽、核桃等配料,食落有啲似花生醬,好特別!
2. 黃海海鮮刀削麵(황해해물칼국수)
네이버 블로그 nml10
「黃海海鮮刀削麵」招牌有啲褪色,望落雖然有啲舊,但就好有以前嘅感覺,呢度同樣都係超有人氣,只有當地人先知嘅美食店。
海鮮刀削麵(해물칼국수)₩10,000
以黃太魚乾、大蔥、蒜熬煮嘅湯底,飲落好鮮甜,裡面有豐富海鮮,如果覺得太清淡仲可以配泡菜一齊食。一人份其實都幾多,鍾意食海鮮嘅一定要嚟試吓!
3. 仙女風 水生魚片專門店(선녀풍 물회전문점)
- 地址:인천 중구 용유서로 272
- 營業時間:12:00 - 21:00、星期一、二休息
水生魚片係一個相當清爽嘅韓國特色美食,好多韓國人都鍾意食。
仙女水生魚片(선녀물회)₩20,000
「仙女水生魚片」內有麵,碗底層放滿蔬菜,中間就係充滿冰碎嘅肉湯,最上層就係超滿生魚片,上面仲淋咗麻油增添香氣。食落酸酸地又辣辣地,魚嘅肉質都鮮嫩,未食過嘅朋友,之後都可以試吓!
寫到呢度....小編都開始肚餓...唔知當中有冇邊間吸引到大家會想去呢?歡迎留言話俾我哋知。
如果有更多想知嘅內容,都可以隨時留言或者dm話俾我哋知:)
Instagram:creatrip.hk