高速巴士客運站「三巨里肉舖」介紹
YG藝人經常去嘅燒肉店就係呢度！想撞星就要去「三巨里肉舖」啦！
Hello，大家好，我哋係由韓國人每日提供最新韓國旅行資訊嘅Creatrip。
唔知大家一開始鍾意韓國係因為咩呢？韓國文化？Shopping？美食？定係追星呢？如果係因為追星同美食，咁今日小編同大家介紹嘅YG藝人常去燒肉店，大家一定要Mark低！之後去話唔定仲可以撞星添！
高速巴士客運站「三巨里肉舖」介紹
三巨里肉舖 Central City店（삼거리 푸줏간 센트럴시티점）
地址：서울 서초구 사평대로 205 삼거리 푸줏간 센트럴시티점
營業時間：每日 11:30 - 22:00 （平日 Break Time 15:00 - 16:00 / Last Order 14:30 / 20:45）
小Tips：由高速巴士客運站3號出口行8分鐘左右
今日想同大家介紹嘅呢一間燒肉店好多韓國YG藝人成日都會去，佢就係喺高速巴士客運站3號出口，大約行326米就會到，相當之近而且好易搵到。
只要見到圓形嘅招牌，行入去就會見到好多闊落嘅座位。
小編當日去到就試咗佢哋嘅濟州炭燒豬肉（600g），睇落係咪超厚而且好新鮮呢，價錢係₩64,000，呢個份量啱啱好夠兩人食。
落完單之後，職員好快手就會上小菜，當中包括有沙律、包肉嘅菜同泡菜（辛奇）等，小編特別推薦大家一定要食圖中右下角嘅洋蔥，佢同燒好嘅肉一齊食超好味！
厚厚嘅豬肉放上爐到燒，大家見唔見到啲超多肉汁，而家諗返起都流晒口水。
首先將最厚嘅豬肉剪成一嚿嚿，大家可以放心職員會幫大家！唔知大家見唔見到肉後面有一個醬汁，通常食濟州島豬肉嘅時候都會有，韓文叫做멜젓（鯷魚醬），鹹鹹地得嚟又有少少蝦醬味，好特別，亦都好好味！
燒肉又點可以唔同大蒜一齊食呢？當燒到咁上下嘅時候，大家記得要落埋蒜，咁就可以同時一齊食到。
如果覺得只係食肉唔夠飽，小編推薦大家可以再叫埋佢哋嘅「平壤三巨里冷麵」，價錢係₩12,000，大家可能會覺得有啲貴，不過因為湯底係用咗韓牛低溫去熟成整成嘅蕎麥麵，所以貴少少都係值得！
呢度都有好多唔同款嘅燒酒、紅酒、啤酒同無酒精飲品等，另外如果係自帶紅酒去，職員仲會幫，開瓶費係免費（一檯一支）。
舖頭入面嘅其中一角，大家可以見到好多藝人都有嚟簽名，當中大家又發現到有邊個呢？
唔單止有簽名，甚至仲有好多藝人嘅相，BLACKPINK、Winner、李昇基等都嚟過，如果本身你係YG迷，之後嚟韓國又有多一個打卡點啦！
3 Birds
地址：서울 서초구 사평대로 205 쓰리버즈
營業時間：每日 10:00 - 22:00（平日 Break Time 15:00 -16:00 / Last Order 14:30 / 20:45）
食完燒肉之後，出到嚟隔離有一間叫做3 Birds嘅Cafe，佢係由YG經營，入面有Brunch、咖啡、甜品等提供，甚至連牛扒或者意粉都有。
大家覺唔覺得呢度好有異國情調呢？入面都算多位，不過如果大家預先打嚟預約仲可以有更靚嘅位！不過因為多人去，競爭都幾激烈。
當日小編試咗佢哋嘅黑朱古力蛋糕，真係好濃朱古力味，鍾意食朱古力嘅朋友一定會鍾意！如果大家之後有興趣想買一整個蛋糕，仲可以同職員講聲。
燒肉店同埋Cafe都係由YG經營，兩個地方都有可能撞到星！之後大家嚟韓國，記得加入旅行必去清單入面啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk