仁川「松島」購物及景點介紹
原來仁川「松島」可以咁多嘢行？平價到貴價品牌通通有！韓劇成日都會嚟取景？
Hello，大家好，我哋係由韓國人每日提供最新韓國旅行資訊嘅Creatrip。
唔知大家仲記唔記得當年韓綜《超人回來了》嘅三胞胎呢？佢哋就係住喺「松島」，今日想大家去了解呢一個新都市！原來嗰度可以咁多嘢行！而家就等小編為大家逐一介紹啦！
仁川「松島」購物及景點介紹
1. TRIPLE STREET（트리플 스트리트）
- 地址：인천광역시 연수구 송도과학로16번길 33-1
- 營業時間：10:30 - 22:00
今日小編去到「TRIPLE STREET」，開幕一個月內就吸引超過 200萬人去捧場，佢哋主要賣嘅都係平價品牌，就好似係H&M、ZARA、8Seconds等。
呢度除咗多嘢行之外，仲係好多韓劇都會嚟取景嘅地方。不過唔知係咪因為疫情嘅關係，睇落有啲冷清，甚至有啲餐廳都唔開門。
2. Hyundai Premium Outlet（프리미엄 아울렛）
- 地址：인천 연수구 송도국제대로 123
- 營業時間：11至4月平日10:30 - 20:30、5至10月10:30 - 21:00、週末10:30 - 21:00
如果想行Outlet，不妨都可以去「Hyundai Premium Outlet」！呢度世界各地都熟知嘅COACH、Gucci等貴價品牌都有，甚至仲有美食街，同啱啱介紹嘅「TRIPLE STREET」就喺隔離，一齊行相當方便！
而家商場入面仲有掛咗唔少聖誕氣氛嘅裝飾，睇落都幾溫馨。
3. Home Plus 松島店（홈플러스 송도점）
- 地址：인천 연수구 송도국제대로 165
- 時間：10:00 - 00:00、每個月第二同第四個星期日休息
嚟韓國又點可以唔行超市？就算每日行都唔會覺得厭！松島呢度都有一間超大型Home Plus，一到週末就好多人嚟補貨，如果想行得輕鬆啲，建議平日行完Outlet再去睇。
Home Plus成日都會有一啲促銷活動，想買到平得嚟又高質嘅嘢，真係要嚟睇吓啦！
4. 日出公園（해돋이공원）
- 地址：인천 연수구 해돋이로 51
松島嘅日出公園喺5月嘅時候，係出名睇玫瑰花節，好多韓國人都會趁住放假嘅時候去親子野餐。
雖然小編去到嘅時候睇唔到玫瑰花，不過都有啲紅葉，甚至仲落咗少少雪，完全係另一個氣氛。
5. 松島運河步行街（송도 커넬워크）
- 地址：인천 연수구 아트센터대로 107
松島運河步行街同啱啱介紹嘅大型Shopping Mall有啲唔同，呢度兩邊有啲餐廳、Cafe同埋精品店，想搵個地方嚟醫肚同埋買手信，呢度都係一個唔錯嘅選擇。
唔知大家覺唔覺得呢度有少少帶有歐陸風情呢？除咗shopping之外，天氣好嘅話喺度打卡都幾唔錯。
6. An's Bakery（안스베이커리 송도점）
- 地址：인천 연수구 센트럴로 160
- 營業時間：08:00 - 23:00
日出公園附近有一間出名連鎖麵包店叫做「An's Bakery」，裏面有好多各式各樣嘅麵包、蛋糕、甜品等住大家去試，好多住喺松島嘅人，就算幾忙都好都會嚟到呢個地方。
價錢都唔算好貴，買完之後仲可以喺Cafe入面坐低慢慢食。
水蜜桃冰茶（복숭아 아이스티）₩4,000、西柚蛋撻（자몽타르트）₩7,300
水蜜桃冰茶好香而且唔會太甜，蛋撻中間仲會有忌廉同埋藍莓芝士，超好味！兩款一齊配嚟食，相當之夾！
7. Geogung（거궁）
- 地址：인천 연수구 송도국제대로 157 오네스타 2층
- 營業時間：11:00 - 22:00
舖頭內部相當之闊落，有好多卡位同埋包廂座位。
Geogung韓食（거한식）₩16,000
呢度只係一個人食嘅份量，但係已經有魚、肉、醬油蟹、雜菜等好多小菜，想食得飽，嚟呢度一定唔會有錯！
8. Orakai松島公園酒店（오라카이 송도파크 호텔）
- 地址：인천 연수구 테크노파크로 151
松島Orakai公園酒店係喺松島中央公園、松島Convensia會議中心附近，交通非常方便。
酒店入面有健身房、室內外游泳池等設施，想一次過享受呢兩樣嘅朋友，呢度就啱晒你啦！
小編當日訂咗雙人房，空間都較大，而且望出去仲可以見到好靚嘅景，不過唯一個缺點就係張床有啲偏太軟身，有種好似凹咗落去嘅感覺？另外想提提大家，房入面嘅刮鬍刀、瓶裝水、牙刷牙膏等都係要俾錢先用等，大家最好去之前要先備。
喺首爾市中心，好多shopping Mall已經行厭，咁不如之後就嚟仁川松島尋寶，話唔定會發現好多新驚喜！
如果有更多想知嘅內容，都可以隨時留言或者dm話俾我哋知：）
Instagram：creatrip.hk