仁川「松月洞童話村」介紹
想搵返童年回憶？仁川「松月洞童話村」幫到你！嚟到仲一定要試吓「炸醬麵刨冰」？
Hello，大家好，我哋係由韓國人每日提供最新韓國旅行資訊嘅Creatrip。
人越大反而會覺得細個嘅時候仲開心，咁今日小編想推薦大家去仁川嘅「松月洞童話村」，嚟到呢度可以暫時忘記煩惱，搵返唔少童年回憶，唔單止小朋友，大人仲會玩得好開心！
仁川「松月洞童話村」介紹
1. 松月洞童話村
- 地址：인천 중구 송월동3가
「松月洞童話村」就係喺仁川站附近，呢度周圍都有唔少壁畫，同公仔俾大家打卡，去到好似去咗一個童話世界咁。
以前嚟到都會覺得幾熱鬧，不過唔知係咪因為疫情影響，定係小編喺平日去嘅關係，今次去到好多舖頭都冇開。
「松月洞童話村」因為過去種咗好多松樹，而被稱為「松月洞」。喺度可以見到好多大家熟悉嘅童話故事人物，大家嚟到都會回味以前細個嘅童年回憶。
由主街行冇耐可以見到「TRICK ART STORY（트릭아트스토리）」，佢係一間有兩層規模大嘅錯覺藝術館，館內生動嘅立體作品，令大人同細路都玩得超開心！
不過大家又會唔會好奇點解呢度會變咗一個童話故事村呢？事源可能要講返1883年仁川港開港之後，松月洞開始有外國人入嚟，漸漸形成一個小社區。
不過可能因為年青人都鍾意去其他地方玩，令到呢度開始沒落，政府為咗改善社區環境，就諗到利用各國知名童話故事為主題，等大家嚟到可以打卡同時又可以諗返起細個嘅童年回憶。
呢度有大家熟悉嘅《美人魚》、《拇指姑娘》、《傑克與豌豆》等故事。
行到攰仲可以喺到搵間餐廳或cafe底吓，唔單止街道裝修得好，就連舖頭都會花好多心機落去裝修。
呢間賣精品同雪糕嘅鋪頭，甚至仲有校服租借俾大家著嚟影相，完全好似帶大家返返去童年咁。
唔單止小朋友會鍾意，就連大人都會玩得好開心，每一個角落如果大家細心去觀察，都會發現唔少驚喜，之後不如就搵一日嚟探索吓啦！
2. OZ CAFE
- 地址：인천 중구 동화마을길 21-19
- 營業時間：11:00 - 19:00
呢間OZ Cafe就係喺「松月洞童話村」入口，呢間cafe相當出名，原因就係因為有「炸醬麵刨冰」，好多綜藝節目都嚟過取景。
大家喺入去之前，可能都會諗有冇入錯鋪頭，因為一打開門完全唔似係一間Cafe。
入面有賣好多《ONE PIECE》嘅海報同周邊，甚至仲會播《ONE PIECE》嘅主題曲，有興趣嘅朋友，都可以喺到買返個留念。
入到去如果想坐低，一係最少要叫一杯飲品，不過如果係叫刨冰，就當係2至3人份。
牆上貼滿唔少藝人簽名，包括大家都熟悉嘅《Running Man》、《週三美食匯》等綜藝都有嚟取景。
二樓同樣係每一個角落都被《ONE PIECE》圍住，呢度有提供喬巴嘅帽可以戴嚟影相，另一邊仲展示咗羅洛亞·卓洛嘅服飾，感覺真係好似去咗日本《ONE PIECE》專賣店一樣咁。
而喺三樓同樣都係同《ONE PIECE》有關，不過就更加闊落，而家有陽光射入嚟好舒服，另外露臺仲放咗綠野仙蹤嘅公仔俾大家打卡。
炸醬刨冰（짜장 빙수）₩14,900
影到差唔多，小編叫嘅「炸醬刨冰」終於整好啦！上面嘅炸醬可以揀紅豆或者朱古力，另外仲有士多啤梨、芒果、煉奶等三種醬俾大家試食。麵嘅部分係超濃雲呢拿雪糕，裡面放咗牛奶冰，用料十足，大家都會食到好飽。
而刨冰隔離嘅水果係會因應唔同季節而有變，上面仲會放咗冷凍芒果、軟糖、紅豆麻糬同朱古力麥片，大家露以配刨冰一齊食。
平時食其他刨冰可能食得多，不過炸醬麵刨冰咁特別你之後又會唔會想嚟試吓呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk